Тожикистон Республикаси Ҳукумати қошидаги Ёшлар ва спорт комитети раиси Аҳтам Абдуллозода журналистлар ҳузурида жорий йил биринчи ярим йиллигида ёшлар, спорт ва шу билан бирга сайёҳлик соҳасидаги давлат сиёсатини амалга ошириш йўналишида комитет томонидан 3 миллион 901 минг 436 нафар иштирокчи қатнашган 13 минг 615та тадбир ўтказилганини таъкидлади.

Аҳтам Абдуллозоданинг маълум қилишича, 2017 йилнинг «Ёшлар йили», деб эълон қилиниши билан давлат ёшлар сиёсатининг барча йўналишларини амалга ошириш мақсадида республика минтақаларида ўтказиладиган барча тадбирлар Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам  Эмомали Раҳмон ва «Ёшлар йили»нинг бош ҳомийси Тожикистон футбол федерацияси президенти Рустами Эмомалининг бевосита қўллаб-қувватлаши билан юқори ташкилий даражада йўлга қўйилган.

- Спорт миллат маданиятининг муҳим рукнларидан бири ҳисобланади, -деди А.Абдуллозода матбуот конференцияси давомида. – Миллий спорт турларининг йўқолиб кетмаслиги учун 2017 йил бошидан «Миллий спорт турлари» фестивалини янгидан режалаштириб, Душанбе шаҳри раиси Рустами Эмомали бошчилигида унинг биринчи босқичи Наврўз байрами арафасида қишлоқлар ўртасида бўлиб ўтди. Иккинчи босқич эса, Миллий бирлик куни остонасида минтақалардаги шаҳар ва ноҳиялар ўртасида ташкил этилиб, фестивалнинг учинчи босқичида иштирок этувчи терма жамоалар аниқланди.

Унинг сўзларига кўра, Тожикистон Республикаси Ҳукумати қошидаги Ёшлар ва спорт комитети «Миллий спорт турлари» фестивалининг учинчи босқичини Душанбе шаҳрида кўтаринки руҳда ташкил этишга тайёргарлик кўрмоқда.

- «Миллий спорт турлари» фестивалида спортнинг 8 тури бўйича мусобақа ва 12 тури бўйича спорт намойишлари ўтказилиши режалаштирилган, - деди Тожикистон Республикаси Ҳукумати қошидаги Ёшлар ва спорт комитети раиси А. Абдуллозода сўзида давом этар экан. – Биз «Миллий спорт турлари» фестивалини келажакда тақвимга киритиб, ҳар йили ўтказишни режалаштираяпмиз.

Таниқли спортчи Комроншоҳи Устопириённинг икки йил муддатга мамлакатимизда ўтказиладиган миллий кураш мусобақаларида қатнашиш ҳуқуқидан маҳрум қилингани масаласида тўхталган А.Абдуллозода шундай деди:

- Бу - ишчи гуруҳнинг қарори. Масаланинг барча томонлари Комроншоҳи Устопириённинг ўзи ва мураббийси иштирокида видеоёзувчининг ҳар бир дақиқаси синчковлик билан томоша қилиниб, кўриб чиқилди. Хулоса шундай бўлдики, ҳакам спортчига нисбатан ноҳақликка йўл қўймаган.

Унинг фикрича, ҳар бир миллат учун ахлоқ биринчи ўринда туради. Ва бугунги кунда спортчи давлат ва миллатни халқаро миқёсида танитадиган шахсдир. Унинг юксак даражадаги спорт маҳорати бўлиши билан бирга, фуқаролик масъулияти ва намунавий одоби ҳам бўлиши шарт.

Зуҳриддин УМАРОВ, «Халқ овози».