Тожикистон Республикаси Ҳукумати қошидаги Дин ишлари, миллий анъана, тантана ва урф-одатларни тартибга солиш комитетининг ўтган йил якунига бағишланган матбуот йиғини бу дафъа ҳам қизиқарли ва жонли ўтди. Дастлаб комитет раиси биринчи ўринбосари Жумахон Ғиёсов иштирокчиларни ўтган - 2016 йилда амалга оширилган ишлар мазмун-мундарижаси билан таништиргач, шуни кутиб туришганмикин, журналистларнинг саволлари ёғилиб кетди.

Журналистлар нафақат савол беришар, балки жамият фойдаси учун ўз таклифларини ҳам ўртага ташлардилар. Масалан, «Чархи гардун» ходимаси Азиза опа Кличева пойтахтдаги баъзи қабристонларнинг оёқ ости бўлиб кетганлиги, ваҳоланки, ўша ерда ётганлар ўзимизнинг ота-боболаримиз эканлигини эслатди ва ўз номидан келиб чиқиб, Дин ишлари, миллий анъана, тантана ва урф-одатларни тартибга солиш комитети ҳашар усулини қўллаб, қабристонларни тартибга солса, яхши бўлар эди, дейди.

Ундан сўнг, Тожикистон Журналистик тадқиқот маркази ходими, журналист Саиди Ҳайдар мавзуни Конибодомда урфга айланиб бораётган дабдабали тўйларга бурди. Саиди Ҳайдарга кўра, бу ҳақда у ўз мушоҳадаларини «Фараж» газетасида чоп қилган, бироқ масъул идоралар томонидан ҳанузгача жавоб олганича йўқ.

Ўзига хос тарғиботга ўхшаб кетадиган филмларда кўриб қоламиз: қизини турмушга узатаётган ота куёвига тўлиқ жиҳозланган квартира, машина калити ва бошқа уй-рўзғор анжомлари совға қилади. Айнан, шу ҳолат кейинги йилларда Тожикистоннинг ҳам баъзи минтақаларида жорий бўлмоқда. Тожикистон Журналистик тадқиқот маркази ходими, журналист Саиди Ҳайдар эса, бу ҳолни Конибодомда мушоҳада қилган.

Дарҳақиқат, бундай нохуш кўринишнинг олди олиниши шарт. Зеро, бир-иккита бой, пулдор киши қизларини ана шу тартибда узатишса, кейин кўрасиз, камбағал бечора ҳам қиз узатаман деб, қарзу қаволага ботганини!

Саиди Ҳайдарнинг ушбу сўзлари бошқа журналистларни ҳам қизиқтириб қўйди, шекилли, «Ватан» радиоси бошловчиси ҳам мавзуни давом эттирди ва хотин-қизларимиз ҳуқуқи поймол бўлаётгани, фарзандларнинг тирик етим бўлиб қолаётгани ҳақида куюниб гапирди:

- Мана, ваҳдатлик бир йигит кейинги йилларда тўрт марта уйланган, аммо ЗАГСдан ўтмаган. Оилалари ундан кўмак сўрашса, қонунан менинг фарзандларим эмас, дея ўз пушти камаридан бўлган болаларидан воз кечишгача бормоқда. Шу боис, ЗАГС қоғози бўлмаган уйланувчиларни никоҳлаган муллаларга нисбатан қаттиқроқ чора кўрилса, яхши бўларди,- дейди у.

Хуллас, матбуот йиғини қизиқарли ва мароқли ўтиб, журналистлар ҳам келгусида ёзажак мақолаларига бир талай мавзу топган бўлсалар, не ажаб?!

А. САИДОВ,

«Халқ овози».