Биз билан боғланинг:

   

Бизга қӯшилинглар

ХАБАРЛАР

НАЗМ

Муаллиф: Super user Категория: НАЗМ
Чоп этилган 02 Феврал 2017 Кӯришлар: 893
Печат

 

x axmedova 2017Ҳам наср ва ҳам назмда бемалол қалам тебратиб келаётган иқтидорли ижодкор Ҳуснинисо Аҳмедовани муштарийларга таништиришга ҳеч бир ҳожат йўқ. Зеро, унинг ўзига хос услубда битган қиссаю ҳикоялари ҳамда кўнгилнинг туб-тубидан садо бера оладиган, гоҳо ўйга толган, гоҳида жўшқин мисралари, дилбар шеърияти билан аллақачон халқ кўнгил мулкига айланиб улгурган.

Шоиранинг шеърларини мутолаа қиларкансиз, бунга амин бўласиз, деган умиддамиз.

"Азизим" туркуми

Нақшинкор дарбоза қанотингни ёз,

Зилдек темир ҳалқа бонг урар уч бор.

Уйғонгин, Ойкумуш, ташқари аёз,

Бекни уйга қўймас отанг Қутидор.

 

Отабекни ҳайдар кекли остона,

Бек, хўрликка чидаш сизнинг галингиз.

Майхона машшоқдан сўрар мастона,

"Ҳайдалиш" куйини чалингиз.

 

Бастакор, нечун йўқ бундай куй ҳали,

Заҳарланган ишқий достон бор бунда.

Бу куйнинг яратмоқ етгандир гали,

"Ҳайдалиш" куйи йўқ дунёи дунда.

***

Азизим, кўп экан дунё ташвиши,

Қовжиратиб қўйди дилимни кузак.

Азизим, кўпмикан дунё олқиши,

Ҳар баҳор қайтадан гуллайди юрак.

 

Ҳаёт

Очиқ деразанинг дарпардасига,

Тегишиб ўтади безори шамол.

 Саф тортган тераклар саркардасига,

 Қуёш салом берар, ёноқлари ол.

 

Томнинг тепасида турган қизғалдоқ,

Сепларини ёяр куннинг кўзига.

Қўғирчоқнинг сочин силар қизалоқ,

Лабларини босиб, хушрўй юзига.

 

Чайқалиб, хўрсиниб қўяди ҳовуз,

Боқиб толнинг заррин кокилларига.

Тол сезиб, пинҳона сузиб қўяр кўз,

Ошиғи чиққандек ишқ йўлларига.

 

Бугун қурбақага айланмоқ керак,

Итбалиқ кўккўрпа остидан чиқар.

Чапак чалиб турар атроф-теварак,

Кўк терак курашиб соясин йиқар.

 

 Ҳовуз толга боқиб, оғир хўрсинар,

Қўғирчоқ юммас кўз, ухлар қизалоқ.

Негадир қушларнинг хониши тинар,

Ёйган сепин зумда йиғар қизғалдоқ.

***

Бехос хира тортиб қолар кўзларим,

Моҳтоб изғирини жонимдан ўтар.

Забонимда музлар сўнгги сўзларим,

Совуқ бошдан оёқ қонимдан ўтар.

 

Қароқларим ёпинг бармоқ учинда,

Мабодо кўзларим очиқ кетмасин.

Дард билан олишиб чарчадим жуда,

Сиз қолинг, болалар қўрқиб-нетмасин.

 

Ўксиниб йиғлайсиз, шивирлаб секин,

Қўй энди, ўлимдан сўз очмагин, бас.

Азизим, яшагим келар-у лекин..,

Йиғламанг, эркакка кўз ёш ярашмас.

 

Хонамни ёрита бошлар тўлин ой,

Юлдузим мўралар кўзи жовдираб.

Қонимга иссиқлик югурар шу он,

Бу гал ҳам чекинар ўлим довдираб.

 

Яна хира тортса, тун ёки кундуз,

Йиғламанг, розиман, сиздан кўнглим тўқ.

Ғира-шира ичра боқса ой, юлдуз,

Бирга яшамоқ бор, бирга ўлмоқ йўқ.

***

Қиш. Чиллада ёмғир ёғмоқда сим-сим,

Тахлаб, тугиб қўйдим, сарпо - сабримни.

Буни яхшиликка йўйдим, азизим,

Ёмғир юмшатгандир тубжой - қабримни.

 

Мен тайёр, кўз юмсам бўлаверади,

Гўрковлар кенгашиб, ишга шайланар.

Биров сабри жамил тилайверади,

Тунда ёмғир тиниб қорга айланар.

 

Тонг. Қабрим бошига чиқар аёллар,

Қорни ғарч-ғурч босиб, йиғлашиб уввос.

Менинг руҳим ичра ўзга хаёллар,

Қабримда оқ гуллар очилмиш қийғос.

 

Қор чойшаби узра ястанган гуллар.

***

Кетаётиб қўйдингиз қараб,

"Хайр" ўрнига синиқ табассум.

Ўтирдим мен сочларим тараб,

Кўзгу боқар ийманиб, маъсум.

 

Ёноқларим ранг талашганда,

Синиқ ранглар эдилар қайда?

Ҳаёт шамол каби шошганда,

Тушириб қўйдимми ё йўлу чўлда?

 

Юзим синиқликлар ичра яшнамас,

Ранг синиққан нигоҳим синиқ.

Энди ёноқларим ранглар талашмас,

Вужудда не бўлса, барчаси синиқ.

                 

Дарвишона

Қирқинчи жоним ҳам кетди узилиб,

Фарзандларим фарёд солар бошимда.

Мен эса, ётибман, бежон чўзилиб,

Бир тола нур ўйнар кўзу қошимда.

            Миллионлаб капалак қанотларидан,

Кампирлар мен учун кўйлак бичарлар.

Ўрнак олдим улар саботларидан,

Ҳар битта қанотнинг тарҳин ечарлар.

Тобутим бошида йиғлар дўсту ёр,

Давра қуриб, садр тушар аёллар.

Тангрим, чин дунёда бўлгин мададкор,

Дуога қўл очар бор мусулмонлар.

          Алвон албисамнинг нафислигидан,

Қимтиниб турибман, Ё Ҳу, Ё Аллоҳ.

Калтабин ҳисларим ноқислигидан,

Тилимдан тушмади астағфируллоҳ.

Ё Ҳу, Ё Аллоҳ!

 Аршу аълога ҳеч етганми оҳим,

Ё қилча гуноҳ ҳам кечирилмайди.

Азиз этармисан мени Аллоҳим,

Биламанки, савоб ўчирилмайди.

Ё Ҳу, Ё Аллоҳ!

             Даврадан жой беринг, қолмади сабр,

Мен қанотсизларим учун йиғлайин.

Уларнинг ҳаққига тушайин садр,

Қанотларин ўпиб, бағрим тиғлайин.

Ҳақ дўст, Ё Аллоҳ.

  Фаришталар тушиб, олиб кетар вақт,

 Капалаклар йиғлар беҳол, жонсарак.

 Бир кунлик умри ҳам тугар бешафқат,

 Ўзин ҳар ён урар миллион капалак.                        

 Ҳақ дўст, Ё Аллоҳ.

 

Ҳуснинисо Аҳмедова,

Деваштич ноҳияси. 

КАЛЕНДАР

« Август 2020 »
Дш Сш Чш Пш Жм Шб Яб
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

МАҚОЛАЛАР

Орзуга завол йўқ

 

Чошгоҳга яқин эшик тақиллади. Ўғлим Шуҳрат эшикни очиб, келган киши билан самимий сўраша кетди. Мен зал ўртасидаги хонтахта ёнида ёнбошлаб, чой хўплаганимча телевизор томоша қилардим. Хона эшигидан "Ассалому алайкум, акажоним", дея Абдужаббор Мўминов кириб келди. Уй ёришиб кетгандай бўлди. Бир амаллаб, ўрнимдан турдим. Қучоқлашиб кўришдик, сўнг ўтириб фотиҳа қилдик, ҳол-аҳвол сўрашдик.

Муфассал...

Асрларга татигулик лаҳзалар

 

Ёхуд Миллат пешвоси раҳбарлиги остида амалга оширилган бунёдкорликлар хусусида

Роппа-роса 27 йил муқаддам тожиклар давлати мустақилликка эришиб, ўз герби, байроғи, мадҳияси ва ҳудудий бирлигига эга бўлди. Бу, халқимиз учун чиндан ҳам олий туҳфа эди, десак янглиш эмас.

Аммо истиқлолиятнинг илк йилларида Парвардигорнинг бу бебаҳо неъматига ношукрлик қилганлар ҳам топилиб, мамлакат баъзи ноҳияларида тўполонлар чиқишига сабаб бўлдилар ва шунда мустақил давлатимиз

Муфассал...

СТАТИСТИКА

Сайтга кирганлар
1
Мақолалар
872
Мақолаларни кӯрганлар сони
811256

ӮҚУВЧИЛАР СОНИ

3244233
Бугун
Кеча
Шу ҳафта
Ӯтган ҳафта
Шу ой
Ӯтган ой
Ҳаммаси
620
4651
24266
3179442
34467
138308
3244233

Сизнинг IPнгиз: 34.200.222.93
Бугун: 08-08-2020 02:39:43

ҲАМКОРЛАР

 

 

   

2015