Халқаро футбол ассоциациялари федерацияси (ФИФА) ноябр ойи учун жаҳон терма жамоаларининг янги рейтинг варақасини эълон қилди.

Унинг натижаларига кўра, Тожикистон миллий терма жамоаси 159 очко билан 160-ўринни ўзида сақлаб қолди. Осиё футбол конфедерациясига аъзо 46 давлат терма жамоалари ўртасида эса, 28-ўринда бормоқда.

«Жаҳон чемпионати-2018» турнирининг саралаш босқичи «В» гуруҳида мамлакатимиз бош жамоасига рақиблик қилаётган термалар қуйидаги ўринларни эгаллаб турибди: Австралия-60, Иордания-82, Қирғизистон-124, Бангладеш-180.

ФИФАнинг навбатдаги рейтинг варақаси жорий йилнинг 3 декабри куни эълон қилинади.

ЯНГИ ЧЕМПИОН АНИҚ

Футбол бўйича олий лига жамоалари ўртасида ўтказилган мамлакат XXIV чемпионатининг олтин ва кумуш медаллари совриндорлари муддатидан илгари аниқланди.

Душанбенинг «Истиқлол» жамоаси мавсум тугашига тўрт тур қолганида ўзининг чемпионат олтин медалига муносиб эканлигини исботлади.

Биринчилик 14-турининг кечиктирилган учрашувида «Равшан» (Кўлоб) ва пойтахтнинг «Истиқлол» жамоалари ўртасидага беллашувда дуранг-1:1 ҳисоби қайд этилгач, шимолий минтақа вакили – Хўжанд шаҳрининг «Хўжанд» клубига муддатидан илгари Тожикистон чемпионатининг кумуш медали насиб этди.

Энди биринчиликнинг бронза медали учун Кўлобнинг «Равшан», Ваҳдат шаҳрининг «Хайр» ва Турсунзоданинг «Регар-ТадАЗ» жамоалари кураш олиб боради.

Кейинги икки тур бронза медали соҳибини аниқлаб беради.

УНВОНЛАР ҲИМОЯ ҚИЛИНДИ

Россия Федерациясининг Қозон шаҳрида касбий бокснинг турли йўналишлари бўйича чемпионлик жанглари кечаси бўлиб ўтди.

WBC (Бутунжаҳон боксчилар кенгаши)  йўналишида ўта оғир вазнли спортчилар ўртасида кечган жангда россиялик Александр Поветкин ва полшалик Мариуш Вахлар муштлашишди.

Ғолибнинг тақдири жангнинг 12-уч дақиқалигига бориб ҳал бўлди. Россиялик чарм қўлқоп устаси рақибини техник нокаут ҳолатига туширди ва ўз камарини сақлаб қолди.

Айнан шу вазн тоифасида WBA (Бутунжаҳон боксчилар ассоциацияси) йўналиши бўйича жаҳон чемпиони россиялик Денис Лебедев чемпионликка даъвогар нигериялик Латиф Кайодага қарши рингга кўтарилди.

Денис Лебедев 8-раундгача ўз рақибини уч марта нокдаун ҳолатига туширди.

Шундан сўнг, ринг ҳаками жангни муддатидан олдин тўхтатди ва россиялик боксчи ғолиб, деб топилди.

МОСКВАДА ДАЪВОГАРЛАР ТУРНИРИ

Халқаро шаҳмат федерациясининг маълум қилишича, 2016 йилда ўтказиладиган жаҳон чемпионатида иштирок этиш ҳуқуқини қўлга киритишни истаган даъвогарлар турнири Москва шаҳрида ўтказилади.

Амалдаги жаҳон чемпиони, норвегиялик Магнус Карлсенга қарши дона суриш ҳуқуқини қўлга киритиш учун ҳиндистонлик Вишванатан Ананд, америкалик Хикару Накамура ҳамда Фабиана Карауна, болгариялик Веселен Топалов, голландиялик Аниш Гири, россиялик Сергей Корякин ва Пётр Свидлер, арманистонлик Левон Аронянлар ўзаро беллашадилар.

Эслатиб ўтиш жоизки, келгуси 2016 йилда Франциянинг Монако шаҳрида шаҳмат бўйича аёллар ўртасида жаҳон чемпионати мусобақаларини ўтказиш режалаштирилган.

УКРАИНА ВАКИЛЛАРИ – СОВРИНДОР

Бирлашган Араб Амирликларининг Абу-Даби шаҳрида курашнинг дзюдо тури бўйича «Катта дубулға» туркумига кирувчи халқаро мусобақа ниҳоясига етди.

Унда Украина дзюдо мактабининг икки нафар вакили кумуш ва бронза медаллари соҳиби бўлди.

Яков Хамо (100 килограммдан ортиқ вазн тоифаси) финал учрашувида кореялик Ким Сунг Минга ютқазиб қўйди ва 2-ўринни ишғол қилди.

Шунингдек, 66 килограмм вазн тоифасида гиламга чиққан Георгий Зантария ғолиблик шоҳсупасининг учинчи поғонасига кўтарилди.

Қайд этиш жоизки, дзюдо бўйича Қозоғистонда бўлиб ўтган «Жаҳон чемпионати-2015» турнирида Яков Хамо бронза медали совриндори бўлган эди.

«Халқ овози»нинг спорт шарҳловчиси.