Бирлашган Араб Амирликларининг Абу-Даби шаҳрида футбол бўйича 2019 йилда ўтказиладиган Осиё чемпионати саралаш босқичи гуруҳлари иштирокчиларини аниқлаб берувчи қуръа ташлаш маросими бўлиб ўтди.

Унинг натижаларига кўра, жамоалар қуйидаги квартетларга ажратилди:

«А» гуруҳи: Қирғизистон, Ҳиндистон, Мянма, Макао;

«В» гуруҳи: Корея Халқ Демократик Республикаси, Гонгконг, Ливан, Малайзия;

«С» гуруҳи: Иордания, Ветнам, Афғонистон, Камбоджа;

«D» гуруҳи: Уммон, Фаластин, Малдив ороллари, Бутан;

«Е» гуруҳи: Баҳрайн, Туркманистон, Хитой Тайпэйи, Сингапур;

«Ғ» гуруҳи: Филиппин, Тожикистон, Яман, Непал.

Тожикистон миллий терма жамоаси саралаш босқичидаги дастлабки учрашувини жорий йилнинг 28 март куни Қатар пойтахти Доха шаҳрида Филиппин термасига қарши ўтказади.

Саралаш босқичи турнири келгуси 2018 йилнинг 27 мартига қадар давом этади.

«ИСТИҚЛОЛ»ДА СИЛСИЛА МАҒЛУБИЯТЛАР

«Миллионлар ўйини»-футбол бўйича беш карра мамлакат чемпиони, пойтахтнинг «Истиқлол» жамоаси Туркиянинг Анталия шаҳрида янги «Футбол-2017» мавсумига тайёргарлик доирасида иккинчи босқич ўқув-машғулотларини ўтказди.

Муҳсин Муҳаммадиев шогирдлари ҳозирлик жараёнида бир қатор хорижий клублар билан ўртоқлик учрашувлари ўтказишди.

Истиқлолчилар биринчи учрашувда Озарбайжоннинг «Интер» жамоасига қарши майдонга тушдилар.

Тенг курашлар асосида кечган беллашув 1:2 ҳисобида озарбайжонликлар фойдасига ҳал бўлди.

Вакилларимиз иккинчи ўйинда Қозоғистоннинг «Қайсар» жамоаси билан куч синашдилар.

Бу учрашувда ҳам омад истиқлолчилардан юз ўгирди. Қозоқ тўптепарлари 1:3 ҳисобида устунликка эришдилар.

Сўнгги икки ўртоқлик учрашувида «Истиқлол» Руминиянинг «Пандурий» жамоасига 0:1, Россиянинг биринчи дивизиони вакили «Енисей» (Красноярск) клубига 0:2 ҳисобида ютқазди.  

----------------    Бокс    ----------------

ФЕДЕРАЦИЯДА ЯНГИ ПРЕЗИДЕНТ

Душанбе шаҳрида Тожикистон касбий бокс федерациясининг йиллик ҳисобот йиғилиши бўлиб ўтди.

Унинг кун тартибидан ўрин олган ташкилий масала муҳокамаси жараёнида мамлакат касбий бокс федерациясига янги президент сайланди.

«Варзиш-Спорт» спорт-ахборот агентлиги Бош директори Шуҳрат Неъматуллаев мазкур лавозимни эгаллади.

-Тожикистонда касбий бокс федерацияси таъсис этилганига ўн йил бўлди, аммо у атиги бир йилдан кўпроқ муддатда фаолият юритди, холос. Энди биз федерация фаолиятини «нол»дан бошлашимиз лозим,- деди янги президент журналистларга берган интервюсида.

Кези келганда қайд этиш лозимки, Шуҳрат Неъматуллаев «Тадж Промоушен» промоутерлик кампаниясининг раҳбари бўлиб, ўтган 2016 йилда Тожикистонда халқаро касбий бокс кечасини ҳам ўтказган эди.

=======    Жаҳонда    =======

----------------    Бокс    ----------------

ЧЕМПИОН ЯНА РАҚИБСИЗ ҚОЛДИ

Иккинчи ярим енгил вазн тоифадаги спортчилар орасида касбий бокснинг WBO (Бутунжаҳон боксчилар ташкилоти) йўналиши бўйича жаҳон чемпиони, украиналик Василий Ломаченко яна рақибсиз қолди.

Илгари мексикалик Орландо Салидо билан «қасос» жанги ўтказишга келишиб олинганди. Аммо мексикалик боксчи яқинда бу жангни ўтказмаслигини маълум қилди.

Бундан ташқари Василий Ломаченко жамоаси кубалик чарм қўлқоп устаси Юриокис Гамбоа билан муштлашишини режалаштириб, оғзаки келишувга эришган эди.

Кубалик боксчи ҳам бошқа промоутерлик кампанияси билан шартнома имзолагани боис, бу учрашувдан бош тортишга қарор қилди.

Энди Василий Ломаченконинг ёлғиз умиди WBA (Бутунжаҳон боксчилар ассоциацияси) йўналиши чемпиони Хесреел Корралесдан.

-------------    Футбол    -------------

ИСТЕЪФОЛАР БЎЙИЧА РЕКОРД

Италиянинг «Палермо» жамоаси раҳбарияти бош мураббий Эуженио Корини истеъфога чиқариш ниятида эканлигини маълум қилди. Унинг асосий сабаби жамоанинг «қониқарсиз» чиқиш қилаётганлиги билан изоҳланмоқда.

Борди-ю, жамоа маъмуриятининг «эзгу нияти» амалга оширилса, бу клуб бош мураббийларининг жорий мавсумдаги учинчи истеъфоси бўлади.

Қизиқарли томони шундаки, ўтган мавсумда «Палермо» футболчилари тўққиз марта мураббий алмаштиришганди.

Бу кўрсаткич-истеъфо борасидаги жаҳон рекордидир…

Айни пайтда «Палермо» «А» серияси турнир жадвалида 17-ўринни эгаллаб турибди.

-------------    Теннис    -------------

ИЛК БОСҚИЧ БЕЛЛАШУВЛАРИ

Нуфузли теннис турнири - Дэвис кубогининг Жаҳон гуруҳи биринчи босқичида Сербия ва Россия терма жамоалари кортга чиқадиган бўлди.

Терма жамоаларнинг таркиби қуйидагича:

Сербия: Новак Жокович, Виктор Троицки, Ненад Зимонич, Лушан Лайович;

Россия Федерацияси: Андрей Кузнецов, Карен Хачанов, Даниил Медведев, Константин Кравчук.

Жаҳон гуруҳи биринчи босқичининг учрашуви 3-5 феврал кунлари ўтказилади.

«Халқ овози»нинг спорт шарҳловчиси.