Энергетика захиралари давлат иқтисодиёти ва ижтимоий ҳаёт жабҳалари тараққиётининг муҳим омилларидан бири саналади.

 Баски шундай экан, ҳаётий заруратга айланган бу соҳани ривожлантириш, айни пайтда, жиддий эътибор талаб қилиши, шубҳасиз.

Шунинг учун ҳам, Роғун ГЭСи қурилиши ҳозирги даврнинг долзарб ҳамда ҳалталаб масалалари сирасига киради.

Мазкур гигант гидроузелнинг бунёд этилиши Тожикистон Республикаси Ҳукумати ва унинг раиси эътиборидан ташқарида қолгани йўқ.

Қолаверса, Тожикистон Республикаси Ҳукумати 2015 йилда Роғун ГЭСи қурилишини молиялаштириш кўламини кўпайтирган. Унинг жорий йилдаги ҳажми 1,6 миллиард сомонийни ташкил этади. Бу миқдор маблағ ўтган йилдагига нисбатан 260 миллион сомоний кўпдир.

Тожикистон Республикаси Президенти Эмомали Раҳмон Бутунжаҳон банки президентининг Европа ва Марказий Осиё давлатлари бўйича  ўринбосари Лора Так билан ўтказган мулоқоти чоғида Роғун ГЭСи қурилиши лойиҳасининг таҳлилий масаласи атрофлича муҳокама қилинганди.

Халқаро молиявий идора раҳбаридан бири бўлган Лора Так Роғун ГЭСи қурилиши ҳақида қуйидаги фикрларни баён қилган эди:

-Биз Роғун ГЭСи қурилиши лойиҳасига тегишли барча масалалар муҳокамасида фаол иштирок этяпмиз. Унинг техник, ижтимоий ва экологик таҳлиллари бўйича муносиб натижалар яқин келажакда эълон қилинади…

Лора Так таҳлилнинг шаффоф чиқишига чин юракдан ишонч билдирган эди.

Дарҳақиқат, кейинги етти йил давомида Роғун ГЭСи қурилиши лойиҳасининг Бутунжаҳон банки, мустақил халқаро таҳлилчилар, хорижий компаниялар ва мутахассислар томонидан ўтказилган техник, ижтимоий ва экологик таҳлиллари ижобий натижа билан тугади.

Бу натижа эса, гидроузелнинг қурилиши ҳақида асоссиз миш-миш тўқувчи «ижодкор»ларнинг «оғзига чўп ўлчаб» қўйди…

Шуни алоҳида таъкидлаш жоизки, Роғун ГЭСи қурилиши, нафақат, Тожикистон, балки Марказий Осиё минтақаси давлатлари манфаатларига ҳам хизмат қилиши исбот талаб қилмайдиган аксиомадир.

Қозоғистон Республикаси «Мегаполис» газетасининг журналисти Арман Темиржоновнинг ёзишича, Роғун ГЭСи бутун Марказий Осиё давлатлари манфаатларига хизмат қиладиган муҳим энергетик объектлардан бири бўлади…

Ҳатто, расмий Остона Роғун ГЭСи қурилишида фаол иштирок этишга тайёр эканлигини маълум қилишининг ўзи битмас-туганмас нур манбаи бўлган гидроэлектростанциянинг Марказий Осиё минтақаси давлатлари иқтисодиёти равнақида тутган ўрни нечоғли эканлигини белгилаб беради.

Роғун ГЭСи қурилиши ва фойдаланишга топширилиши Тожикистон Республикаси устувор иқтисодиётининг меҳвари бўлиб қолади.

Оқибат шундай экан, мазкур энергетика объектининг яратилиши сув ва ҳаводек зарурдир.

Тожикистон Республикаси Президенти Эмомали Раҳмон Норак шаҳри раҳбарлари ва фаоллари билан ўтказган учрашуви чоғида шундай деган эди:-… Яна бир марта таъкидлайман, Роғун ГЭСи қурилиши ушбу йўналишда мамлакат энергетика мустақиллигини таъминловчи муҳим стратегик объектдир…

Тожикистон Республикаси устувор иқтисодиёти келажагини белгилайдиган бу муҳим объектни қурмасликнинг сира иложи йўқлигини иқтисодиёт эшигини «тақиллатмаган» оддий одам ҳам тушуниб етди.

Яқинда Тожикистон Республикаси Ҳукумати томонидан Роғун ГЭСига уюштирилган саёҳат иштирокчилари - оддий одамлар даврасида бўлиб ўтган суҳбатни гувоҳ сифатида кузатиб, шунга иймон келтирдимки, аҳоли қатламининг ҳар бир фуқароси Роғун ГЭСи қурилиши ҳаётий эҳтиёжга айланганини англаб улгурибди.

У ерда амалга оширилаётган бунёдкорлик ишларини ўз кўзи билан кўрган отахон ҳайратдан тўлқинланиб, шундай нақл қилади:-Рости гап, давлатимизнинг бундай ишларни амалга ошириш қудратига эга эканлигини тасаввур ҳам қилмаган эдим. Бунча кўламдаги яратувчанлик иқтидорини кўриб, юрагим шошиб қолди. Қурилиш ишлари ниҳоясига етса, иншооллоҳ, элимизнинг ҳаётига баракот ёғилади. Юртимиз дунёнинг энг нурли ўлкаларидан бирига айланади.

Шунинг учун, Роғун ГЭСи қурилиши билан боғлиқ бўлган ҳар қандай «мағзи пуч» уйдирмаларга ишонмаслик керак…

Қадимгилар фурсати етиб, рўёбга чиқадиган ишнинг ҳузурбахш самараси ҳақида жуда ажойиб фикрларни баён қилишган:- Сабр қилсак,  ғўрадан ҳолва пишади.

Роғун ГЭСи олам-олам нурнинг манбаи бўлиб, халқларимиз ва Ватанимизнинг келажагини чароғон қилади…

Бу нурафшонликдан ойдину обод бўлгувчи ҳаёт ҳали олдинда…

Ёрқин келажак,  порлоқ истиқбол кутмоқда бизни…

Абдуҳафиз  МИРЗААҲМЕДОВ,

«Халқ овози» мухбири.