31 март куни мамлакат Президенти, Тожикистон Республикаси Ҳукумати Раиси Эмомали Раҳмон бошчилигида Тожикистон Республикаси Ҳукуматининг навбатдаги мажлиси бўлиб ўтди.

Мажлис бошида 2020 йилгача Тожикистон Республикаси аҳолиси экологик тарбияси ва таълимини ривожлантириш давлат комплекс дастури кўриб чиқилди ва қабул қилинди.  

Мазкур дастурни самарали амалга ошириш учун Давлат бошлиғи республика ҳар бир фуқароси табиат ҳимояси ва атроф-муҳит тозалигига юксак масъулиятни ҳис этиши учун барча таълим-тарбия имкониятлари ва захираларидан кенг фойдаланиш топшириғини берди.

Тожикистоннинг жаннатмакон табиати энг бебаҳо миллий бойликлардан бири саналиши, уни муносиб ҳимоялаш мамлакат келгусидаги тараққиёти, жумладан, сайёҳлар ва сармоядорларни жалб этиш муҳим шарти эканлиги қайд қилинди.

Тожикистон Республикасининг «Тожикистон Республикаси фуқаролиги тўғрисида»ги қонун лойиҳаси тасдиқланиб, Тожикистон Республикаси Олий Мажлиси Намояндалар мажлисига кўриб чиқиш учун тақдим этилди. Шунингдек, Тожикистон Республикасининг «Тожикистон Республикаси Конституцион суди тўғрисида» ва «Тожикистон Республикаси судлари тўғрисида»ги конституцион қонунлари ҳамда «Сиёсий партиялар тўғрисида» ва «Жамоатчилик бирлашмалари тўғрисида»ги қонунларига ўзгартиш ва қўшимчалар Тожикистон Республикаси Олий Мажлиси Намояндалар мажлисига кўриб чиқиш учун юборилди.  2015-2020 йиллар учун Тожикистон Республикаси фуқаролик авиацияси хавфсизлиги миллий дастури тасдиқланди.

Хатлон вилояти Ховалинг ноҳияси ва Ҳисор ноҳияси давлат ҳокимияти ижроия органларига аҳолига тақсимлаб беришлари учун ер ажратилди.

Мажлис охирида баҳорги экин-тикин ишларини кенгайтириш ва экин майдонларидан самарали фойдаланиш, электр насос станцияларини ишга тушириш, ёшларни баҳорги ҳарбий хизмат  чақириғига тайёрлаш, давлат сармоявий лойиҳаларини амалга ошириш сифати назоратини кучайтириш, автомобил йўллари, айниқса, қайта тикланган йўллардан фойдаланишни тартибга солиш, саноат ишлаб чиқариш ҳажмини ошириш, миллий валюта курси назорати, бу йўналишдаги суиистеъмол ва қаллобликлар олдини олиш, сел, дўл, сув тошқини, ўпирилиш ва тош кўчиши каби баҳорий табиий офатлар оқибатларини бартараф этиш учун жиддий тайёргарлик кўриш юзасидан аниқ топшириқлар берилди.

«Ховар» ТМАА.