Бирлашган Миллатлар Ташкилотининг маданий ёдгорликларни рўйхатга олиш ва тантаналарини нишонлаш бўлинмаси ЮНЕСКО томонидан қайдга олинган Ҳисор ноҳиясининг уч минг йиллик юбилейини кўтаринки халқаро руҳда ўтказиш фурсати ҳам тобора яқин келмоқда.

Мазкур юбилейнинг халқаро миқёсда нишонланиши Ҳисор ноҳиясини мамлакатимизнинг қадимий ва навқирон гўшаси сифатидаги қадриятларини тиклайди, бутун дунёга таништиради.

Уч минг йиллик юбилей тантаналари Ҳисор ноҳиясининг маданий, ижтимоий, иқтисодий тараққиётида янги даврни бошлаб бериши, шубҳасиз.

Бу нарса давлатимиз сарварининг яқинда Ҳисор ноҳиясига қилган иш сафари чоғида яна бир бор ўз исботини топди.

Тожикистон Республикаси Президенти Эмомали Раҳмон сафари жараёнида бир нечта маданий ва маърифий объектларни фойдаланишга топширди.

Жумладан, лаёқатли болаларга ихтисослаштирилган Президент мактабининг биноси шулар сирасига киради.

Билим даргоҳи 640 нафар ўқувчи ўрнига мўлжалланган бўлиб, 43та замонавий жиҳозланган фан кабинетлари ва 7та лабораториядан иборатдир. Президент мактабида 50 нафар юқори малакали ўқитувчилар ёшларга таълим-тарбия берадилар.

Ёшларнинг пухта билим олишлари учун барча шарт-шароитлар яратилган: 400 нафар ўқувчи ўрнига мўлжалланган ётоқхона, стадион, спорт зали ва бошқалар.

Ўқитувчиларни ижтимоий ҳимоялаш, уларга сифатли коммунал хизмат кўрсатиш мақсадида, битта 9 қаватли турар жой биноси квартираларининг калитлари ўз эгаларига тақдим этилди.

Қадимий Ҳисорда ноҳия музейининг очилиши минтақанинг кўҳна маданияти сирларини ўрганишнинг муҳим манбаи вазифасини ўтайди.

Ноҳия музейининг майдони қарийб бир гектарни ташкил этиб, маданият маскани биноси ертўласида тикувчилик, кулолчилик ва шиша маҳсулотларини таъмирлаш, тарихий обидалар нусхасини олиш устахоналари жойлашган.

Музейнинг кўргазма залларида халқ ҳунармандчилиги соҳалари: заргарлик, кулолчилик, темирчилик, мисгарликнинг IX-XIX асрларга тегишли бўлган 3 мингдан ортиқ тарихий обидалари жой олган. Минтақанинг иқтисодий ривожини таъминлаш ҳам Давлат бошлиғи эътиборидан четда қолмади.

Мамлакат Президенти боғ-узумчилик ва чорвачиликка ихтисослаштирилган «Баракат» корпорацияси фаолияти билан яқиндан танишди. Корпорацияда етиштирилаётган боғ-узумчилик ҳамда чорвачилик маҳсулотлари сифатига юқори баҳо бериб, хўжаликда етиштирилаётган маҳсулотлар тури ва ҳажмини кўпайтириш билан боғлиқ фойдали маслаҳатлар берди.

Уч минг йиллик юбилейи нишонланадиган ноҳияда маданият қасри, марказий кутубхоналарнинг очилиши ҳам рамзий маъно касб этиб, Ҳисорнинг маданият ва илм ривожига муносиб улуш қўшган кўҳна маскан эканлигидан гувоҳлик беради.

Зеро, маданият ва илм миллатнинг маънан ривож топишининг асосий манбаларидан саналади. Шунинг учун ҳам, маданият тушунчаси инсоннинг энг оддий ҳаракатидан тортиб, одам боласи тафаккурининг олий чўққиларигача дахлдордир. Шунинг учун ҳам, у барча фанларга тегишли – археология, тарих, адабиёт, санъатшунослик… Ҳа, у маълум ҳудудлар ила чегараланиб қолмайди. Шу боис, нафақат  ҳисорликлар, балки республикамиз фахри саналган Ҳисор обидаларию тарихий иншоотлари, маърифий-маданий жараёнларни ўрганиш байрам тантаналаридан кейин ҳам давом эттирилиши лозим.

Зеро, Ҳисор ноҳиясининг маданий ёдгорликлари, маданияти, илм-фани асрлар оша Тожикистон халқлари маънавиятининг меҳвари бўлиб келган ва шундай бўлиб қолади…

Хурсаной Алланазарова, ўқитувчи.