Кўлоб шаҳри СПИДга қарши кураш маркази ва юқумли касалликлар бўлими бинолари таъмирдан сўнг, фаолиятларини бошлади. Бу тўғрида давлат ҳокимияти Хатлон вилояти ижроия органидан журналистларга хабар берилди.

СПИДга қарши кураш маркази биноси 82 минг сомоний маблағ эвазига таъмирланиб, 29 минг сомоний маблағга марказ учун анализаторлар ҳамда СПИД хасталигини аниқлаш ускунаси сотиб олинди.

Бундан ташқари, маҳаллий бюджет маблағлари ҳисобидан 49 минг сомонийга Кўлоб шаҳри юқумли хасталиклар бўлими биноси таъмирдан чиқарилди.

Ёшлар истироҳати – диққат марказида

Ички сайёҳликни ривожлантириш, ёшларнинг дунёқарашини кенгайтириш, уларни ўлкамизнинг тарихий, маданий обидалари ҳамда табиий мавзелари билан яқиндан таништириш мақсадида, Қўрғонтепа шаҳридан 48 нафар ёшлар Душанбе шаҳрига саёҳатга жўнатилди.

Қўрғонтепа шаҳри Ёшлар, спорт ва сайёҳлик ишлари бўлимидан берилган маълумотга кўра, қўрғонтепалик ёшлар ва ўсмирлар Миллий музей, Байроқ боғи, Давлат цирки, «Устод Рўдакий» боғи ва Ҳисор қалъасини томоша қилишди.

Қўрғонтепа шаҳри ёшларининг бошқа гуруҳи беш кеча-кундуз давомида Варзоб ноҳиясининг «Сафеддара» сайёҳлик минтақасида бўлишди.

Китоб – маънавий бойлик

Ўқувчиларни мутолаага жалб этиш мақсадида, Ёвон ноҳияси кутубхоналарига 2016 йил бюджет маблағлари ҳисобидан 2385 сомонийга янги чопдан чиққан 224 нусха бадиий, болалар ва соҳавий адабиётлар ҳамда 600 сомоний маблағ эвазига 2000 дона ўқувчилар варақаси, шунингдек, ноҳия бюджети маблағи ҳисобидан 10 минг сомонийга 229 нусха китоб сотиб олинди. Бу ҳақда «Ховар» ТМАА мухбирига ноҳия Маданият қасри масъуллари маълумот беришди.

- Ноҳия кутубхоналари хазинасида 149 минг 886 нусха китоб мавжуд бўлиб, жумладан 46 415 нусха тожик адабиёти, 90 319 нусха рус адабиёти ва 13 159 нусха бошқа тиллардаги адабиётлардан иборатдир, - деди Маданият қасри масъули.

Жорий йил ноҳия кутубхоналарига Тожикистон Республикаси Маданият вазирлиги ҳисобидан 4157 сомоний маблағлик 101 нусха китоб бепул тақдим этилган.

Ўз мухбир.

Маърифатпарвар оила ташаббуси

Дўстий ноҳиясининг «Нури Вахш» қишлоқ жамоати, 25-ўрта умумтаълим муассасаси ёнида ноҳия маданият қасри марказий кутубхонасининг филиали очилди. Янги кутубхонада, аллақачон, 3129 нусха китоб жамланган. Жавонга дид билан терилган бадиий, ижтимоий, сиёсий адабиётлар уч - тожик, рус, ўзбек тилида битилган.

- Ҳозирги кунда 220 нафар ўқувчи турли адабиёт мутолааси билан машғул, - дейди Мирзо Турсунзода номли санъат олийгоҳининг кутубхоначилик бўлимини тугатган кутубхоначи Гулнора Туропова.

Ўттиз уч йилдан буён элга зиё тарқатувчи Гулнора Туропова умр йўлдоши, Рўдакий ноҳияси маданият коллежининг кутубхоначилик бўлимини тамомлаган Мамаюсуф Очилдиев билан маслаҳатда йўл тутди. Улар икки хонадан иборат янги кутубхона биносининг қурилиши ва хоналар жиҳозлари учун оила бюджети ҳисобидан 25 минг сомоний қийматида маблағ сарф этди. Маърифатпарвар бу оила аҳли ўз ҳисобларидан адабиётлар сонини кўпайтириш режасини тузганлар.

  И. Эшмуродов.