Тарбия – ҳар қандай жамиятнинг фаол аъзосини, маънан комил шахсни вояга етказишнинг энг муҳим воситасидир.

Айниқса, бугунги террорчи ва бузғунчи ҳаракат, ташкилот ҳамда  партиялар ғояларининг ёшлар онгини заҳарлаб, уларни турли жаҳолат ботқоқларига ботираётган даврда соғлом тарбияга бўлган эҳтиёж бир неча марта кучайди.

Жуда мураккаб бўлган таълим-тарбия жараёнига бир ёқлама ёхуд енгил-елпи ёндашишнинг натижаси бесамар бўлишини ҳаётнинг ўзи исботлаб турибди.

Ёшларнинг оз бўлса-да, турли террорчи ва бузғунчи гуруҳларнинг ёлғон ваъдаларига учиб, жинояту жаҳолат кўчаларига кириб кетиш ҳолатлари жамиятимизда учраб турибди.

Бу эса, ёшлар тарбиясига эътиборни янада кучайтиришни, унинг самарасини ошириш йўлларини излаб топишни тақозо этади.

Бунинг асосий йўналиши – тарбияда мактаб ва оиланинг устувор ҳамкорлигидир.

Демак, тарбия жараёнига мактаб ва оила бараварига кенг кўламли ибратли ишларни қамраб олган ҳолда жалб этилмоғи талаб қилинади.

Бу борада оила соғлом тарбиянинг асосий ўчоғи ҳисобланади. Зеро, тарбияланувчи бир сутканинг, яъни йигирма тўрт соатнинг тўртдан уч қисмида оиланинг қучоғида бўлади.

Бола тарбиясининг ҳар томонлама етук бўлиши учун ота-она зиммасида катта масъулият ётади.

Давлатимиз сарвари ташаббуси билан «Фарзанд тарбиясида ота-онанинг масъулияти тўғрисида»ги Тожикистон Республикаси қонунининг ишлаб чиқилиши ва ҳаётга татбиқ этилиши бежиз эмас.

Шу боис ҳам, мактаб ва оила ўртасида зич алоқа ўрнатилиши шарт ва зарур.

Масаланинг иккинчи томони шундаки, мактабда ҳам боланинг таълим-тарбияси қаттиқ назорат остига олиниши зарур бўлади. Хоҳ дарс, хоҳ тарбиявий соат жараёни бўлсин, боланинг онгига террорчи ва бузғунчи ташкилотлар фаолияти замирида қонли, мудҳиш воқеалар ётганлиги мудом уқтириб борилиши керак.

 Ўқитувчининг тез-тез боланинг оиладаги хатти-ҳаракати, умуман, фаолиятидан огоҳ бўлиб туриши фойдадан холи бўлмайди. Унинг кўча-кўйдаги саъй-ҳаракатлари дарс ёки тарбиявий соат жараёнида рағбат ё танбеҳ билан баҳоланиб борилиши яхши самара бериши мумкин.

Мактаб ва оила ўртасидаги зич алоқанинг аҳамияти шундан иборатки, боланинг оилада олган тарбияси мактабда бериладиган таълим-тарбия билан боғланиб, ёш бўғин маънавиятининг пайдо бўлиши ва шаклланишида ижобий рол ўйнайди. Бола тафаккурида замонавий дунёқараш таркиб топади.

Нима бўлганда ҳам, мактаб ва оила ўртасида мунтазам алоқанинг ўрнатилиши бола тарбиясида ўз олдимизга қўйилган мақсадга эришишнинг унумли йўлларидан биридир.

-Тарбия- виждон иши, таълим эса, фаннинг вазифаси. Кейинчалик инсон вояга етгач, билимнинг бу икки тури бир-бирини тўлдиради,-деган эди донишмандлардан бири.

Хуллас, билимсиз тарбияни, тарбиясиз билимни шакллантириб бўлмайди. Яъни тарбияли инсон том маънодаги билим эгаллаган, ўз навбатида билимли инсон пухта тарбия кўрган бўлиши шубҳасиздир.

Ана шундай замонавий билимлар билан қуролланган, юксак маънавиятли, комил шахсни тарбиялашда оила ҳам, мактаб ҳам бир хилда масъулдир.

Бола тарбиясига ота-она ва устозларнинг виждонан ёндашиши давр қўяётган бирламчи талабдир…

Гавҳар САИДОВА, ўқитувчи.

Турсунзода шаҳри.