Кувайт давлати дин бӯйича вазири биринчи ӯринбосари Одил Абдуллоҳ ал-Фаллоҳ, Ислом динида сиёсий партиялар тузишни инкор этиб, бундай сиёсий партиялар фаолияти мобайнида жамият тараққиётида мушкуллик ва ихтилофлар келтириб чиқаради, дея таъкидлади.

Ал-Фаллоҳ Тожикистон давлат телевидениесига берган мусоҳабасида: «Ислом дини буюк диндир. У бирор-бир сиёсий партияга, унга тегишли устав ва қонунлар ёки бирор-бир асосга эга бӯлмаган фатво бериш билан шуғулланувчи алоҳида шахсларга муҳтож эмас»,- деди. Яна такрорлайман, «Бу диннинг Худованд каби ҳеч кимга эҳтиёжи йӯқдир»,- деди у.

Кувайт давлати дин бӯйича вазири биринчи ӯринбосарининг айтишича, бу мамлакат раҳбарияти ва халқи сиёсий характердаги диний партияга ҳурмат назари билан эмас, балки ихтилофлар келтириб чиқарувчи бузғунчи партия сифатида қарашади.

«Кувайт раҳбарияти ва халқи диний қарашларга қориштирилган сиёсий партияларга яхши назар билан қарашмаслигининг асосий сабабларидан бири, бундай партиялар фаолияти мушкулликларнинг асосий сабабчисидир. Агар дурустроқ эътибор қаратсак, Парвардигор буюк Қуръонни бандалари учун асосий қонун сифатида нозил қилган.

Биз ундан фойдаланишимиз ва унинг ҳукмларига қулоқ тутишимиз лозим, токи турмуш тарзимиз низоларсиз, пок ва осойишта бӯлсин. Биз ӯзимизнинг ёмон хулқимиз, рафторимиз билан Ислом дини ва Қуръони Каримга доғ туширмаслигимиз керак. Ислом номи билан қилинган ҳар қандай нолойиқ ишлар Ислом нуфузини пастга уради.

Ислом буюк диндир. У бирон партия, устав ва алоҳида шахсларнинг асоссиз фатволарига муҳтож эмас. «Яна такрорлайман, бу диннинг Худованд каби ҳеч кимга эҳтиёжи йӯқ», дея таъкидлади ал-Фаллоҳ.

Одил Абдуллоҳ ал-Фаллоҳнинг суҳбат мобайнида билдиришича, 60-йилларда қабул қилинган Кувайт давлати Бош қонунига кӯра, мамлакатда сиёсий партиялар фаолияти тақиқланган. «Ҳозир мамлакатимизда бирон сиёсий партия фаолият юритмайди, бироқ демократия жуда яхши ривожланган. Инсон озодлиги ва парламент вазияти юқори кӯрсаткичларга эгадир».

Кувайт давлати дин бӯйича вазири биринчи ӯринбосари суҳбат давомида никоҳ ва талоқ масаласи, кӯпинча ажралиш ҳолатлари олдини олиш ва оилавий низоларни бартараф қилиш борасида ӯз мамлакати тажрибасидан фойдаланишни таклиф этди.

У: «Кувайтда ажралиш, яъни талоқ бериш масаласи тегишли маҳкамаларда кӯрилади. Маҳкама эса эр-хотин, жамиятшунослик ходими, дин ходими музокара столига ӯтирмасдан бирор ҳукм чиқаришга ожизлик қилади. Бу қонуният натижаси ӯлароқ, 60 фоиз оила юқорида қайд қилинган музокара столидан сӯнг ажралиш ҳақидаги фикрларидан қайтишади. Ва ӯзларининг тинч ва осуда ҳаётларини давом эттирадилар. Тожикистонда ҳам оила масаласида бизнинг тажрибамиздан фойдаланилса, яхши бӯларди», - дейди.

Шунингдек, у телефон орқали берилган талоқни нораво деб таъкидлаб, бу амал бутун жаҳон Ислом олимлари томонидан тақиқланганлигини айтиб ӯтди. Ал-Фаллоҳ: «Телефон ва «SMS» орқали талоқ беришга ижозат йӯқ. Эр узоқ масофадан туриб, бу воситалар орқали ӯз хотинини талоқ қилади. Мен ишонаманки, дин олимлари бу амални қаттиқ қоралашади ва тақиқлашади. Чунки бундай ҳолатлар кӯпинча бӯҳтон ва туҳматлар сабабли рӯй беради. Олисларда юрган муҳожирнинг ноҳақ туҳматларга учраган хотинини ӯзи мусофирликда юриб «SMS» хабари орқали талоқ қилиши ҳаргиз дуруст эмас.

Унинг таъкидлашича, хотинига талоқ берган эр уни уйдан ҳайдаб чиқаришга ҳаққи йӯқ.

Маълум бир муддат бир хонада яшаб туришлари, шоядки, оиланинг қайта тикланишига сабаб бӯлса: «Қуръони Каримда таъкидланишича, эр талоқ қилгач, ӯз турмуш ӯртоғини кӯчага ҳайдаб солишга ҳаққи йӯқ. Зеро, вақт ӯтиши билан улар яна ярашиб кетишлари мумкин. Яъни, бу муносабат қайта ярашувга йӯл очиб беради».