Тожикистон Республикаси Адлия вазирлиги Тожикистон Республикаси Ҳукумати қошидаги Тил ва терминология комитети томонидан янги туғилган чақалоқлар учун исмлар каталоги тайёрланганлиги ҳақида яқинда ўтказилган матбуот конференциясида маълумот берди.

- Ота-оналар айнан ана шу каталогда келтирилган исмлар билан янги

туғилган чақалоқларни номлашлари шарт, - деди матбуот анжуманида Адлия вазири ўринбосари Ҳаким Мирсайзод. – Ота-оналар фарзандларига туғилганлик гувоҳномаси олиш учун Фуқаролик ҳолатини қайдга олиш (ЗАГС) бўлимига ташриф буюришганда, уларга мазкур каталог тақдим этилади. Ота-она каталог бўйича фарзандига миллий исм танлаши шарт.

Таъкидланишича, каталогдаги исмларни танлашни истамаган ота-оналар ўзларига ёққан исм билан фарзандларини номлаш таклифи билан махсус комиссияга мурожаат қилишлари лозим бўлади. Ота-оналар танлаган ва каталогдан ўрин олмаган исм билан чақалоқни аташ ёки атамасликни комиссия қарори ҳал қилади.

Шу билан бирга, Тожикистонда яшаётган бошқа миллат вакилларига фарзандларига ихтиёрий исм танлашга ижозат берилган.

Адлия вазирлиги матбуот конференциясида жорий йил биринчи ярим йиллигида тожикистонликларнинг хорижий фуқаролар билан никоҳдан ўтиш ҳолатлари камайганлиги қайд этиб ўтилди.

- Жорий йилнинг олти ойида Тожикистон фуқароларининг хорижликлар билан никоҳдан ўтиш 49 ҳолати қайдга олинган, - деди Адлия вазирлиги Фуқаролик ҳолатини қайдга олиш бошқармаси бошлиғи Саодатбиби Сирожзода. – Бу кўрсаткич ўтган йилнинг шу даврида 79 ҳолатни ташкил этганди. Тожикистонликлар Ўзбекистон, Афғонистон, Эрон ва Россия фуқаролари билан, шунингдек,  Литва ва Хитой фуқаролари билан ҳам никоҳдан ўтганлик айрим ҳолатлари кўзга ташланади.

Адлия вазирлиги вакилининг маълумотига кўра, ҳисобот даврида мамлакатда 28 минг 103 никоҳдан ўтганлик ҳолати қайдга олинган бўлиб, 5 минг 40та никоҳ бекор қилинган.

- Жорий йил олти ойида мамлакат ахлоқ тузатиш муассасаларида 27 нафар маҳбус вафот этди, - деди вазир ўринбосари Ҳаким Мирсайзод. – Қайдга олинган 27 ҳолатда ҳам зўравонлик белгилари бўлмай, ўлим табиийдир.

Вазир ўринбосарининг таъкидлашича, маҳбуслар кўпроқ турли хасталиклар туфайли вафот этишган.

- Айни пайтда мамлакат ахлоқни тузатиш муассасаларида сил касаллиги билан хасталанган маҳбуслар жазо ўташмоқда, - деди Ҳ. Мисайзод. – Улар дори-дармон билан ўз вақтида таъминланиб, дўхтурлар назоратида туришади.

Вазир ўринбосарининг маълумотига кўра, айни пайтда мамлакат ахлоқ тузатиш муассасаларида 10 минг нафар атрофида маҳбуслар бўлиб, улардан 237 нафарини аёллар ва 353 нафарини хориж фуқаролари ташкил этади. Шу билан бирга, ахлоқ тузатиш муассасаларида 80 нафар бир умрга қамалган маҳбуслар жазо ўташмоқда. 1 минг 548 маҳбус эса, терроризм ва экстремизм учун озодликдан маҳрум этилган. 

Ўз мухбир.