Тожикистон Республикаси Ҳукумати қошидаги Ижтимоий суғурта ва нафақа агентлигининг 2017 йил биринчи ярмида бажарилган ишлар ҳисоботи ҳақида агентлик директорининг биринчи ўринбосари Назокат Одиназода ахборот бериб, жорий йилнинг январ ойидаги индексация бўйича белгиланган нафақалар кўп сонли нафақахўрларнинг талаб ва истаклари инобатга олиниб, қайта кўриб чиқилиши ҳақида маълум қилди.

Биринчи ярим йилликда бюджетдан ижтимоий суғурта ва нафақа учун 1 миллиард 164 миллион сомоний маблағ ажратилган бўлиб, ўтган йил шу даврга нисбатан ўсиш 133,6 миллион сомонийни ташкил этади ёки 13 фоиз демакдир. Нафақа ва ёрдампули учун дастлабки ярим йилликда режада тасдиқланган маблағ ўз вақтида вилоятлар, шаҳар ва ноҳиялар учун 250 миллион сомоний ажратилган.

Жорий йилнинг биринчи ярмида агентликка республиканинг 9 минг 666 нафар фуқаросидан аризалар келиб тушган. Агентлик директорининг биринчи ўринбосари Назокат Одиназода қайд этганидек, нафақаларни мижозларга етказиб беришда «Амонатбонк» давлат банкининг хизмати таҳсинга сазовордир.

Кўпчилик журналистлар ўқитувчиларга белгиланган нафақа улар меҳнатининг қадрланишига арзимаслиги ҳақида сўрашганда, Назокат Одиназода қуйидагича жавоб берди:

-Ҳақиқатан ҳам, ўқитувчилар нафақасининг янги индексациядаги кўрсаткичи паст бўлиб, 2017 йил январ ойидан тайинланган нафақалар замирида ўқитувчилар нафақаси ҳам қайта кўриб чиқилиши режалаштирилган.

Ҳисобот даврида ижтимоий суғурта ва нафақани такомиллаштириш учун 4та лойиҳа ишлаб чиқилди ва шундан иккитаси Тожикистон Республикаси Ҳукуматига тавсия қилинган. Бошқа икки қонун лойиҳаси эса, тегишли идора ва вазирликларга кўриб чиқиш учун жўнатилган.

Ярим йил мобайнида шаҳар ва ноҳияларда 29 минг 431 кишига нафақа тайинланганлиги ҳақида ҳам ахборот берилди. Бу нафақалар Суғд вилояти бўйича ўртача 260, Хатлон вилоятида 261, Тоғли Бадахшон мухтор вилоятида 337, республика бўйсунишидаги ноҳияларда 260 ва Душанбе шаҳрида 371 сомонийни ташкил этган бўлиб, ўтган йил шу давридагидан ўртача 20 фоиз ортиқ демакдир.

Ярим йиллик ҳисоботгача республика фуқароларидан 265та ариза қабул қилиниб, улар ўз вақтида кўриб чиқилган ва жавоблар қайтарилган. Шунингдек, фуқаролар агентлик фаолиятидан мунтазам хабардор бўлиб туриш учун интернет орқали  www.nafaqa.tj сайтига мурожаат этишлари мумкин.

Ҳайтали Боев,

«Халқ овози».