Илгари маълум қилганимиздек, жорий йилнинг 18 октябр-4 ноябр кунлари Индонезиянинг Жакарта, Бекаси, Сикаранг, Сибинанг ва Бандунг шаҳарларида футбол бўйича ёшлар (U-19) ўртасида «Осиё чемпионати-2018» турнири бўлиб ўтади.

Жакарта шаҳрида ташкил этилган қуръа ташлаш маросими қитъа биринчилигида иштирок этиш ҳуқуқини қўлга киритган ёшлар терма жамоаларини гуруҳларга тақсимлаб берди.

Унинг натижаларига кўра, Тожикистон ёшлар терма жамоаси «D» гуруҳида Саудия Арабистони, Хитой ҳамда Малайзия вакилларига қарши майдонга тушади.

Турнирда 16та ёшлар термаси қатнашади ва ҳар бир гуруҳда биринчи, иккинчи ўринларни эгаллаган жамоалар чорак финал босқичига йўлланма олади.

Қитъа чемпионатининг энг яхши тўртта терма жамоаси Полшада ўтказилиши режалаштирилган ёшлар ўртасидаги (U-20) «Жаҳон чемпионати-2019» мусобақалари йўлланмасига эгалик қилади.

----------   Футзал   ----------

«СИПАР» ҚИТЪА МИҚЁСИДА

Тожикистон биринчилигининг вице-чемпиони Хўжанднинг «Сипар» футзал жамоаси Индонезияда ўтказиладиган клублараро IX Осиё чемпионатида мамлакатимиз шарафини ҳимоя қилади.

Жамоа турнирнинг «D» квартетида «Мес Сунгун» (Эрон), АГМК (Ўзбекистон) ва «Банк-Байрут» (Ливан) клубларига қарши курашиб, ғолиблик учун беллашувни бошлайди.

Тўрт гуруҳда юқори икки ўринни ишғол қилган жамоалар плей-офф босқичига чиқади.

Эслатиб ўтамиз, футзал бўйича Тожикистоннинг амалдаги чемпиони Душанбенинг «ДИСИ-Инвест» жамоаси молиявий муаммолар туфайли фаолиятини тўхтатганлиги сабабли, «Сипар» жамоаси мазкур мусобақада иштирок этмоқда.

----------   Кураш   ----------

ТОЖИКИСТОНЛИК – ВИЦЕ-ЧЕМПИОН

Монголиянинг пойтахти Улан-Батор шаҳрида курашнинг самбо тури бўйича қитъа чемпионати мусобақалари ниҳоясига етди.

Тунирда 70 килограмм вазн тоифасида гиламга чиққан юртдошимиз Разави Навбаҳоров кумуш медални қўлга киритди.

Финал босқичигача вакилимиз Хитой ва Қирғизистон намояндаларини доғда қолдирди.

Олтин медал тақдирини ҳал қилувчи беллашувда эса, қозоғистонлик Жумадулло Онгалбойга имкониятни бой бериб қўйди.

======   Жаҳонда   ======

----------   Хоккей   ----------

ШВЕЦИЯ – САЙЁРАДА БИРИНЧИ

Данияда шайбали хоккей бўйича жаҳон чемпионати мусобақалари ўз ниҳоясига етди.

Чемпионлик учун кечган шиддатли учрашувда Швеция ва Швейцария терма жамоалари музли майдонга тушди.

Ўйин учун ажратилган асосий вақтда ҳам, белгиланган қўшимча қисм (овертайм)да ҳам дуранг ҳисоби қайд этилди.

Буллитлар бўйича курашда эса, омад швецияликларга кулиб боқди ва 3:2 ҳисобида ғалабани илиб кетишди.

Бронза медали учун Америка дербиси, яъни Америка Қўшма Штатлари ва Канада терма жамоалари ўзаро ҳисоб-китоб қилди. Учрашувнинг асосий вақтида 4:1 ҳисобида устунликка эришган америкаликлар бронза медали соҳибига айланишди.

----------   Футбол   ----------

«ОЛТИН БУТСА-2018» – МЕССИДА

Испания чемпионати - Ла-лига якунига кўра, «Барселона» жамоасининг аргентиналик ҳужумчиси Лионел Месси мавсумда рақиблар дарвозасини 36 ўйинда 34 бор аниқ нишонга олди. Унинг тўплаган очколари сони 68тага етди ва «Олтин бутса» танловида ғолиб чиқди.

Бу унинг тўпурарлик борасидаги бешинчи марта зафар қучишидир. Месси илгари ҳам, 2010, 2012, 2013, 2017 йилларда энг маҳсулдор ҳужумчи, деб тан олинган эди.

«Кумуш бутса» Англия Премер-лигаси иштирокчиси, «Ливерпул» клубининг мисрлик ҳужумчиси Муҳаммад Салоҳга насиб этди.

У мавсумда дарвозаларни 32 бор ишғол этиб, 62 очко жамғаришга эришган.

----------   Баскетбол   ----------

«РАЕЛ» РЕКОРД ЎРНАТДИ

Белград шаҳрида баскетбол бўйича Европа лигаси туркумидаги «Тўртлик финали» турнирининг финал босқичи учрашуви бўлиб ўтди.

Унда Мадрид шаҳрининг «Реал» (Испания) жамоаси ва Истанбулнинг «Фенербахчи» (Туркия) жамоалари бош соврин учун кураш олиб борди.

Ўйинда 85:80 ҳисоби қайд этилиб, испанияликлар ўзларининг ҳам тактик, ҳам стратегик жиҳатдан устун эканликларини кўрсатиб қўйишди.

Бу билан «Реал» мазкур мусобақада ўнинчи бор ғалаба қозонди ва ўзига хос рекорд ўрнатди.

Учинчи жой учун борган рақобатда Вилнюснинг «Жалгирис» (Латвия) клуби Москванинг ЦСКА (Россия) жамоасини 77:79 ҳисобида мағлубиятга учратди.

«Халқ овози»нинг спорт шарҳловчиси.