Тожикистон касбий футзал лигасининг навбатдаги мавсуми ҳам ниҳоясига етди.

Мамлакат биринчилиги учун кечган турнирда 78 очко жамғарган Душанбенинг «ДИСИ Инвест» клуби Тожикистон чемпиони унвонини ўзида сақлаб қолди.

Суғд вилоятининг маъмурий маркази - Хўжанд шаҳрининг «Сипар» футзал жамоаси фаолияти давомида биринчи марта мамлакат биринчилиги мусобақасининг кумуш медали совриндори бўлди.

Касбий футзал лигаси турнирида илк бор иштирок этган дебютант - Кўлоб шаҳрининг «Равшан» жамоаси 55 очко билан учинчи ўринни эгаллади.

Тўпурарлар баҳсида ҳам кўлобликлар вакили Шоди Муродов ғолиб чиқди. У мавсумда рақиблар дарвозасини 46 марта аниқ нишонга олди.

------------    Футбол    ------------

 «КОХИ НАВРЎЗ»ДА ТАҚДИРЛАШ МАРОСИМИ

Жорий йилнинг 23 декабрида Душанбедаги «Кохи Наврўз» маданият ва истироҳат қасрида «Футбол-2017» мавсумининг совриндорларини тақдирлаш маросими бўлиб ўтади.

Тантанада 20дан ортиқ номинация бўйича ғолиб чиққанлар ўз совринларига эгалик қиладилар.

Улар орасида энг яхши футболчи, футболчи аёл, футзалчи, мураббий, ҳакам ва бошқалар бўлишади.

Ҳар йили футбол мавсуми якунлангач, бундай маросимнинг ўтказилиши анъана тусини олган.

=======    Жаҳонда    =======

------------    Волейбол    ------------

«ЗЕНИТ» КЛУБЛАРАРО ЖАҲОН ЧЕМПИОНИ

Россия Федерациясининг «Зенит» (Қозон шаҳри) волейбол жамоаси клублар ўртасида ўтказилган жаҳон чемпионати турнирида ғолиб чиқди.

Полшада бўлиб ўтган мундиалнинг финал босқичида россияликлар Италиянинг «Чивитанову» жамоасини 3:0 ҳисобида доғда қолдиришди.

Бронза медали учун Бразилиянинг «Крузейро» ва Полшанинг «Скра» жамоалари ўзаро куч синашди.

Майдон эгаларини 3:0 кўринишидаги ҳисобда мағлуб этган бразилияликлар бронза медалини ўзлариники қилиб олишди.

Волейбол бўйича клублар ўртасидаги жаҳон чемпионати турнири 1989 йилдан буён ўтказиб келинади.

-----------    Хоккей    -----------

«БИРИНЧИ КАНАЛ КУБОГИ» РОССИЯ ТЕРМАСИДА

Москвада шайбали хоккей бўйича «Биринчи канал кубоги» мусобақалари ниҳоясига етди.

Турнирнинг ҳал қилувчи финал босқичида Россия термаси Финляндия бош жамоасидан 3:0 ҳисобида устун келди. Учта учрашувда юз фоизлик натижа қайд этган Олег Знарок шогирдлари 9 очко тўплашди ва зафар қучишди.

Турнир давомида 8 очко жамғарган чехияликлар иккинчи ўринни ишғол қилишди.

Учинчи ўрин эса, финляндиялик хоккейчиларга насиб этди.

Ушбу турнир Жанубий Кореяда ўтказиладиган қишки олимпиада ўйинларидан олдин ўқув-машғулотлари вазифасини ўтади.

------------    Футбол    ------------

ПЛЕЙ-ОФФ БОСҚИЧИГА ҚУРЪА ТАШЛАНДИ

Швейцариянинг Нон шаҳрида Европа футбол клублари ўртасидаги энг нуфузли мусобақа - Чемпионлар лигасининг плей-офф босқичи жуфтликларини аниқлаб беришга бағишланган қуръа ташлаш маросими ўтказилди. 

Унинг натижаларига кўра, турнирнинг 1/8 финалида қуйидаги жуфтликлар тўқнаш келади: «Ювентус»-«Тоттенхэм», «Базел»-«Манчестер Сити», «Порту»-«Ливерпул», «Реал»-ПСЖ, «Челси»-«Барселона», «Бавария»-«Бешикташ», «Севиля»-«Манчестер Юнайтед», «Шахтёр-Д»-«Рома».

Жамоалар ўртасидаги дастлабки ўйинлар 2018 йилнинг 13-14, жавоб учрашувлари эса, 20-21 феврал кунлари ўтказилади.

***

Шунингдек, Европа лигаси 1/16 финал босқичи жуфтликларига ҳам ойдинлик киритиб олинди.

Улар қуйидаги кўринишда: «Црвена Звезда»-ЦСКА, «Астана»-«Спортинг», «Боруссия-Д»-«Атланта», «Ницца»-«Локомотив-М», «Спартак-М»-«Атлетик», «Реал Соседад»-«Залцбург», «Лудогорец»-«Милан», «Эстерсунд»-«Арсенал», «Марсел»-«Брага», «Копенгаген»-«Атлетико», АЕК-«Динамо-К», «Селтик»-«Зенит», «Наполи»-РБ «Лейпциг», «Лион»-«Вилярреал», «Партизан»-«Виктория-Пл», «Стяуа»-«Лацио».

Европа лигаси турнири иштирокчиси бўлган жамоалар ҳам икки мартадан, яъни ўз майдонида ва сафарда беллашади.

«Халқ овози»нинг спорт шарҳловчиси.