Венгрия пойтахти Будапешт шаҳрида курашнинг дзюдо тури бўйича катталар ўртасида жаҳон чемпионати турнири бўлиб ўтмоқда.

Тожикистон дзюдо федерациясидан берилган хабарга қараганда, мамлакатимиз миллий терма жамоаси қуйидаги таркибда Ватанимиз шарафини ҳимоя қилмоқда: Комроншоҳ Устопириён, Суҳроб Боқиев, Хушқадам Хусравов, Беҳруз Хўжазода, Саидмухтор Расулов, Садр Бобоев,

Муҳаммадмурод Абдураҳмонов, Хуршид Мажидов.

Дунёнинг 86 давлатидан 450 нафар спортчи иштирок этаётган ушбу нуфузли турнир 3 сентябргача давом этади.

------------    Теннис    ------------

"ПРЕЗИДЕНТ КУБОГИ" ТУРНИРИ

Душанбеда Тожикистон Республикаси давлат мустақиллигининг 26 йиллигига бағишланган теннис бўйича ўсмирлар ўртасидаги "Президент кубоги" халқаро турнири якун топди.

Тожикистон Республикаси Ҳукумати қошидаги Ёшлар ва спорт ишлари бўйича комитетдаги манба тарқатган маълумотга кўра, халқаро мусобақа "Тожикистон темир йўллари" давлат унитар корхонасининг теннис кортида ташкил этилди. Унда Тожикистон, Украина, Ўзбекистон, Қозоғистон, Россия, Афғонистон ва Туркия давлатларидан 80 нафар намоянда, жумладан, 27 нафар қизлар иштирок этишди.

Халқаро турнир шахсан Тожикистон Республикаси Президентининг қўллаб-қувватлаши билан саккизинчи маротаба ўтказилди.

Ғолиблар соврин фондида белгиланган пул мукофотлари ва қимматбаҳо совғалар билан тақдирланишди.

------------    Футбол    ------------

"ЦЕРЕС НЕГРОС" "ТОР-МОР" ЭТИЛДИ

Ҳисор шаҳридаги марказий стадионда қитъа клублари ўртасидаги  "Осиё футбол конфедерацияси кубоги-2017" турнирининг минтақалараро ярим финал учрашуви ўтказилди.

Бош соврин учун курашни давом эттириш ҳуқуқини берувчи йўлланмани қўлга киритиш мақсадида мамлакатимизнинг амалдаги чемпиони, пойтахтнинг "Истиқлол" ва Филиппиннинг "Церес Негрос" жамоалари "яшил майдон"га тушди.

Қизғин кечган ўйиннинг якуний натижаси йирик- 4:0 ҳисобида Тожикистон чемпиони фойдасига ҳал бўлди. Беллашувда истиқлолчилар ҳужумчиси Манучеҳр Жалилов "дубл"га эришган бўлса, Ахтам Назаров ва Ромиш Жалиловлар биттадан голга муаллифлик қилишди.

Меҳмонлар устози Ристо Видоковичнинг журналистларга берган интервюсида таъкидлашича, бу ўйин филиппинликларнинг "Осиё футбол конфедерацияси кубоги" мусобақаларидаги энг ёмон чиқиши бўлган.

Жавоб учрашуви 2017 йил 17 сентябрда Баколод шаҳрида ўтказилади.

======    Жаҳонда    ======

------------    Футбол    ------------

ПОРТУГАЛИЯЛИК - ЕВРОПАДА ЭНГ ЯХШИ

Мадриднинг "Реал" жамоаси ва Португалия термаси ҳужумчиси Криштиану Роналду УЕФА (Европа футбол ассоциациялари бошқармаси) йўналиши бўйича 2016-17 йиллар мавсумининг энг яхши футболчиси, дея тан олинди.

Шунингдек, бу мукофот учун Турин (Италия) шаҳрининг "Ювентус" жамоаси дарвозабони Жанлуижи Буффон ва "Барселона" клуби ҳамда Аргентина терма жамоаси ҳужумчиси Лионел Мессилар ҳам даъвогарлик қилишган эди.

Европа футбол ташкилоти йиғилишида Чемпионлар лигаси турнирининг ўтган мавсумдаги энг яхши футболчилари ҳам аниқлаб олинди.

Жанлуижи Буффон ("Ювентус" Италия) энг яхши дарвозабон, "Реал" (Испания) клубининг аъзолари Серхио Рамос, Лука Модрич, Криштиану Роналдулар энг яхши ҳимоячи, ярим ҳимоячи ва ҳужумчи сифатида  эътироф этилдилар.

ГУРУҲЛАР ИШТИРОКЧИЛАРИ АНИҚЛАНДИ

Франциянинг Монако шаҳрида Чемпионлар лигаси 2017-18 йиллар мавсумининг гуруҳ босқичи қатнашчиларини белгилаб олишга бағишланган қуръа ташлаш маросими ўтказилди. Унинг натижасига кўра, жамоалар гуруҳларга қуйидаги тартибда тақсимландилар:

"А" гуруҳи: "Бенфика" (Португалия), "Манчестер Юнайтед" (Англия), "Базел" (Швейцария), ЦСКА (Россия);

"В" гуруҳи: "Бавария" (Германия), "ПСЖ" (Франция), "Андерлехт" (Белгия), "Селтик" (Шотландия);

"С" гуруҳи: "Челси" (Англия), "Атлетико" (Испания), "Рома" (Италия), "Қорабоғ" (Озарбайжон);

"D" гуруҳи: "Ювентус" (Италия), "Барселона" (Испания), "Олимпиакос" (Греция), "Спортинг" (Португалия);

"Е" гуруҳи: "Спартак" (Россия), "Севиля" (Испания), "Ливерпул" (Англия), "Марибор" (Словения);

"Ғ" гуруҳи: "Шахтёр" (Украина), "Манчестер Сити" (Англия), "Наполи" (Италия), "Фейенорд" (Нидерландия);

"G" гуруҳи: "Монако" (Франция), "Порту" (Португалия), "Бешикташ" (Туркия), "Лейпциг" (Германия);

"Н" гуруҳи: "Реал" (Испания), "Боруссия" (Германия), "Тоттенҳэм" (Англия), АПОЭЛ (Кипр).

Гуруҳ босқичи мусобақаларида 1-2- ўринларни "забт" этган жамоаларга чорак финал йўлланмаси берилади. Учинчи ўринни ишғол этган клублар эса, Европа лигаси плей-офф босқичида иштирок этади.

"Халқ овози"нинг спорт шарҳловчиси.