Ваҳдат шаҳрида курашнинг дзюдо тури бўйича Тожикистон Республикаси Президенти кубоги мусобақалари бўлиб ўтди.

Турнирда Афғонистон, Белгия, Италия, Непал, Куба, Озарбайжон, Покистон, Россия, Ўзбекистон, Украина, Япония, Эрон, Қозоғистон, Қирғизистон, Тожикистон сингари давлатларнинг 45 нафардан ортиқ намояндалари ўзаро ғолиблик учун курашишди.

Ачинарли томони шундаки, мусобақа мезбонлари - тожикистонлик полвонлардан бирор нафари ҳам турнир совриндори бўлолмади.

Беллашувлар натижаларига кўра, бош соврин украиналик дзюдочи Станислав Бондаренкога насиб этди.

Ғолиблик шоҳсупасининг иккинчи поғонасига кубалик Гарсиа Мендоз кўтарилди.

Иккита учинчи жойни Ўзбекистон вакиллари Муҳсин Қисомиддинов ва Абдулла Тангриевлар эгаллашди.

Эслатиб ўтиш жоизки, дзюдо бўйича Тожикистон Республикаси Президенти кубоги мусобақалари 2013 йилдан бери ўтказиб келинади.

-----------    Футбол    -----------

ЎРТОҚЛИК УЧРАШУВИ НАТИЖАСИ

Тожикистон миллий терма жамоаси «Осиё кубоги-2019» мусобақаларининг саралаш босқичига ҳозирлик кўриш доирасида ўзининг навбатдаги ўртоқлик учрашувини ўтказди.

Республика марказий стадионида ташкиллаштирилган учрашувда юртдошларимиз Фаластин термасига қарши майдонга тушишди.

Хавфли вазиятлар ва голларга бой бўлган учрашувда муроса йўли танланиб, дуранг 3:3 ҳисоби қайд этилди.

Аслида мухлислар ғалаба кутган беллашувда тожикистонлик футболчилар икки марта ҳисобда ортда қолдилар. Бош ҳакам томонидан қўшиб берилган вақтдагина уни тенглаштиришга муваффақ бўлдилар.

Тожикистон терма жамоаси бош мураббийси Ҳаким Фузайлов ўйиндан кейин ўтказилган матбуот анжуманида учрашув ҳақида фикр билдириб, шундай деди: - Ўқув-машғулотлари учун ажратилган вақт қисқа бўлгани боис, ўйинчиларнинг бир-бирларини тушуниб етишлари анча қийин кечди. Хорижда тўп сураётган барча легионерларни жалб этганимизга қарамай, дуранг натижага эришдик…

======    Жаҳонда    ======

------------    Шаҳмат    ------------

МЕЗБОН АНИҚ – ХАНТИ-МАНСИЙСК 

Илгари огоҳлантирганимиздек, шаҳмат бўйича 2020 йилда ўтказилиши кўзда тутилган Бутунжаҳон олимпиадасига мезбонлик қиладиган шаҳар номи маълум бўлди.

Россия Федерациясининг Ханти-Мансийск шаҳри ушбу халқаро шаҳмат тадбирини қабул қилади.

Бу ҳақда Озарбайжон пойтахти Боку шаҳрида бўлиб ўтган халқаро шаҳмат федерациясининг бош ассамблеяси қарор қабул қилди.

Шунингдек, 2020 йилда ўтказиладиган Бутунжаҳон шаҳмат олимпиадасига мезбонлик учун Аргентина ва Словакия давлатлари ҳам даъвогарлик қилган эди.

Қайд этиш лозимки, 2018 йилда бўладиган Бутунжаҳон шаҳмат олимпиадасини Грузиянинг Батуми шаҳрида ўтказиш мўлжалланган.

------------    Бокс    ------------

ТОМОНЛАР КЕЛИШИБ ОЛИШДИ

Касбий бокснинг WBC (Бутунжаҳон боксчилар кенгаши) йўналишининг ўта оғир вазнли спортчилар ўртасида «муваққат» чемпионлик жангини ўтказиш учун россиялик Александр Поветкин ва канадалик Бермейн Стиверннинг промоутерлик компаниялари келишиб олди.

Вақтинчалик чемпион унвонини қўлга киритиш жанги Россияда бўлиб ўтади.

Бу ҳақда «Мир бокса» («Бокс дунёси») промоутерлик компанияси бошлиғи Андрей Рябинский расман эълон қилди.

WBC йўналишининг амалдаги чемпиони америкалик, енгилмас Деонтей Уайлдер ўтган жангида жароҳат олганлиги сабабли, 2016 йилнинг охиригача рингга чиқа олмайди. Бу ҳолат эса, даъвогарлар ўртасида «муваққат» чемпионлик жангини ўтказиш имконини беради.

------------    Дзюдо    ------------

ГРАН-ПРИ МУСОБАҚАЛАРИ

Ўзбекистон Республикаси пойтахти Тошкент шаҳрида дзюдо бўйича халқаро Гран-при мусобақалари ўз якунига етди.

Соврин жамғармаси 100 минг Америка долларини ташкил этган мазкур турнирда дунёнинг 15та мамлакати дзюдочилари бош мукофот учун кураш олиб бордилар.

Унда эркаклар ва аёллар ўртасида 14та вазн тоифасидаги курашчилар гиламга чиқдилар. 

Уч кун давом этган мусобақалар натижалари шуни кўрсатдики, майдон эгалари, ўзбекистонлик дзюдочилар ҳаммадан кўп медални қўлга киритиб, турнир ғолиби бўлишди.

Иккинчи ўринни қозоқ полвонлари, учинчи жойни эса, россияликлар эгаллашди.

------------    Теннис    ------------

ЧИМКЕНТ ОЧИҚ ЧЕМПИОНАТИ

Қозоғистоннинг Чимкент шаҳрида теннис бўйича Shymkent Open очиқ чемпионати ниҳоясига етди.

Турнирнинг ҳал қилувчи финал босқичида россиялик Иван Гохов ва ўзбекистонлик теннисчи Санжар Файзиев кортга чиқишди.

Икки соату 45 дақиқа давом этган беллашувда омад рус спортчисига кулиб боқди. У рақибини 6:2, 5:7, 6:2 ҳисобида мағлуб этиб, майдондан бош эгиб чиқишга мажбур қилди.

Ярим финал босқичида бўлса, вице-чемпион россиялик рақиби, ғолиб эса, ўз юртдоши устидан ғалабага эришди.

«Халқ овози»нинг спорт шарҳловчиси.