1 феврал куни Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон Тожикистон Республикаси Ҳукуматининг бир қатор шаҳру ноҳиялар, мамлакат географик иншоотлари номларини ўзгартириш тўғрисидаги қарорларини имзолар экан, уни Тожикистон Республикаси Олий Мажлиси Миллий мажлисига кўриб чиқиш учун тавсия этди.

Тожикистон Республикаси Ҳукуматининг вилоятлар, шаҳарлар ва ноҳиялар халқ депутатлари мажлислари таклифлари асосида ишлаб чиқилган ва имзоланган қарорларига мувофиқ, бир қатор шаҳру ноҳиялар номлари қуйидаги тарзда ўзгартирилади:

Ҳисор ноҳияси – Ҳисор шаҳри;

Тавилдара ноҳияси – Сангвор ноҳияси;

Жирғатол ноҳияси – Лахш ноҳияси;

Жалолиддин Румий ноҳияси – Жалолиддин Балхий ноҳияси;

Жиликўл ноҳияси – Дўстий ноҳияси;

Қумсангир ноҳияси – Жайҳун ноҳияси;

Шўрообод ноҳияси – Шамсиддин Шоҳин ноҳияси;

Қайроққум шаҳри – Гулистон шаҳри;

Чкалов шаҳри – Бўстон шаҳри;

Ғончи ноҳияси – Деваштич ноҳияси;

Қайроққум сув омбори – Тожик денгизи сув омбори.

Қадимий Ҳисор 3000 йиллик юбилейини ўтказишга тайёргарлик доирасида ободонлаштирилган Ҳисор ноҳиясининг Ҳисор шаҳрига айлантирилиши таклифи мазкур юбилей нишонланаётган кунда Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон томонидан эълон қилинганди.

Таъкидлаш жоизки, шаҳарлар ва ноҳиялар номини ўзгартириш Тожикистон Республикаси «Тожикистон Республикаси маъмурий-ҳудудий бўлиниш масалаларини ҳал этиш тартиби тўғрисида»ги Конституцион қонунининг 10, 18 ва 19-моддалари ҳамда Тожикистон Республикасининг «Географик иншоотлар номланиши тўғрисида»ги қонунига мувофиқ, вилоятлар, шаҳарлар ва ноҳиялар халқ депутатлари мажлислари таклифларига биноан, амалга оширилади.

Шаҳру ноҳиялар ва мазкур сув омборининг номини ўзгартиришдан мақсад халқнинг ушбу мавзелар тарихий номларини қайта тиклаш ҳақидаги ватанпарварона таклифу орзуларини амалга ошириш, миллий қадриятлар тарғиботи, улар жойлашган минтақани ҳисобга олиш, миллий фазилатлар туйғусини ошириш, айниқса, ёш ва ўсиб келаётган авлодда аждодлар бой маданияти ва яратувчан тожик халқининг замонавий давлатчилиги тўғрисида тарихий хотирани уйғотишга ёрдам беришдан иборат.

 «Ховар» ТМАА.