5 ноябр куни Тожикистон Республикаси Президенти Эмомали Раҳмон Ивета Григуле бошчилигида Душанбе шаҳрига ташриф буюрган Европа Иттифоқи Парламенти делегацияси аъзоларини қабул қилди.

Давлат бошлиғи Европа Иттифоқи парламенти делегациясининг Тожикистон Конституцияси қабул қилинган кун нишонланиши олдидан келганини яхши белги, дея атар экан, улар ташрифи икки томонлама муносабатлар келгусидаги тараққиётига янги туртки беришига ишонч билдирди. 

«Тожикистон давлат мустақиллигини қўлга киритган биринчи кунларданоқ Европа Иттифоқи билан ҳамкорликларни кенгайтириш тарафдоридир. Европа билан алоқаларни чуқурлаштириш мамлакатимиз ташқи сиёсати истиқболли йўналишларидан ҳисобланади»,- дея қайд қилди мамлакат Президенти Эмомали Раҳмон.

Европа Иттифоқи Парламенти делегацияси раҳбари Ивета Григуле ўз навбатида: «Биз Тожикистонни Марказий Осиёдаги яхши, ишончли ва конструктив шеригимиз, деб ҳисоблаймиз»,- деди.

Мамлакат Президенти Тожикистон ва Европа Иттифоқи, жумладан, Европа Иттифоқи Парламенти ҳамкорликлари даражаси ва мазмунидан қониқиш изҳор этар экан, шу бир бир вақтда: «Бугун муносабатлар жараёнида иқтисодий ҳамкорликлар ва хавфсизлик муаммоларини ҳал этиш билан боғлиқ масалалар биринчи ўринга чиқади»,- дея қайд қилди.

Шу сабабли, энергетика, саноат, тоғ иши ва қишлоқ хўжалиги каби Тожикистон иқтисодиёти фундаментал тармоқларидаги ҳамкорликларни ривожлантиришга алоҳида эътибор қаратилди.

Жумладан, Тожикистон энергетик лойиҳалари амалга оширилишига кўмаклашиш бир вақтнинг ўзида ижтимоий масалалар ҳамда мамлакатимиз ва Афғонистон билан бирга бутун минтақа хавфсизлик муаммоларини ҳал этишга ҳисса қўшиши қайд қилинди.

Шунингдек, Тожикистон жамиятини демократиялаштириш жараёни, Афғонистон билан давлат чегараларини мустаҳкамлашни ҳимоялаш йўлидаги ҳамкорликларни давом эттириш зарурлиги ҳамда Яқин Шарқдаги ҳозирги вазият ва бошқа долзарб масалалар ҳақида мазмунли суҳбат қурилди.

«Ховар» ТМАА.

**

СИРИЛ  МЮЛЛЕР  ДАВЛАТ  БОШЛИҒИ  ҚАБУЛИДА

9 ноябр куни Тожикистон Республикаси Президенти Эмомали Раҳмон Бутунжаҳон банкининг юртимизга иш ташрифи билан келган Европа ва Марказий Осиё бўйича вице-президенти Сирил Мюллерни қабул қилди.

Учрашувда ҳамкорлик, жумладан, Тожикистон ва Бутунжаҳон банки қўшма лойиҳаларини амалга татбиқ этиш масалалари кенг кўламда муҳокама қилинди.

Давлат бошлиғи суҳбат аввалида Сирил Мюллерни масъулиятли лавозим – банк вице-президенти этиб тайинлангани муносабати билан табриклаб, бугунги учрашувни Тожикистоннинг мазкур нуфузли молиявий ташкилот билан ҳамкорликларини мустаҳкамлаш йўлидаги муҳим қадам дея атади.

Мамлакат Президенти: -Биз Бутунжаҳон банкининг Тожикистондаги фаолиятини юқори баҳолаймиз. Чунки унинг кўмагини тараққиётнинг турли соҳалари, энг аввало, энергетика, инфратузилма, қишлоқ хўжалиги, давлат бюджети, ижтимоий ва бошқа истиқболли соҳаларни қўллаб-қувватлашда ҳис этмоқдамиз»,- дея қайд қилди.

Сирил Мюллер Тожикистон Республикаси Президенти Эмомали Раҳмон билан учрашиш имкониятидан қониқиш билдирар экан: -«Биз Тожикистон мушкулликлари ва эҳтиёжлари, жумладан, табиий офат туфайли етган зарар кўламидан яхши хабардормиз. Бутунжаҳон банки сизнинг мамлакатингиз билан ҳамкорликларни кенгайтиришга тайёр»,- деди.

Учрашувда Бутунжаҳон банкининг Тожикистон билан 2015-2018 йилларга мўлжалланган ҳамкорликлари янги стратегиясини самарали амалга татбиқ этиш йўллари ҳақида фикр алмашинди. Бу стратегия, асосан, грант тарзида 250 миллион Америка доллари ҳажмида маблағ ажратишни назарда тутади.

Суҳбат чоғида асосий эътибор Тожикистон иқтисодиётига сармоялар жалб этиш, имтиёзли кредитлар, грантлар, ажратиш, техник ёрдам кўрсатиш, транспорт, давлат бошқаруви, иқтисодий сиёсат, сув билан таъминлаш, хусусий сектор, соғлиқни сақлаш ва ижтимоий ҳимоя соҳаларида кичик ва йирик лойиҳаларни амалга татбиқ этишдаги ҳамкорликларга қаратилди.

Суҳбат чоғида табиий офатлар олдини олиш, Тожикистон дарёларидаги қайта тиклаш ва соҳилларни мустаҳкамлаш ишлари учун қўшимча маблағ жалб этиш зарурлиги қайд қилинди.

КАСА-1000 электр узатиш линияси ва минтақавий аҳамиятга эга бошқа лойиҳаларни амалга татбиқ этиш масалалари юзасидан мазмунли суҳбат қурилди.

Қизиқарли суҳбат жараёнида томонлар келгусида ҳам ҳамкорликларни мустаҳкамлаш ва кенгайтиришдан манфаатдор эканликларини таъкидладилар.

«Ховар» ТМАА.