18 август куни Тожикистон Республикаси Президенти Эмомали Раҳмон Коллектив Хавфсизлик Шартномаси Ташкилоти Бош котиби Николай Бордюжани қабул қилди.

Учрашувда Тожикистоннинг КХШТга раислиги, мазкур ташкилотга аъзо давлатлар раҳбарларининг жорий йил сентябр ойида бўладиган навбатдаги саммитига тайёргарлик билан боғлиқ ҳамда бошқа долзарб масалалар муҳокама қилинди.

Николай Бордюжа Тожикистоннинг КХШТга раислиги жараёни ва моҳиятини юқори баҳолар экан, хусусан, бу ташкилотга аъзо давлатлар раҳбарларининг Душанбе шаҳридаги навбатдаги саммитидан умид берувчи натижалар кутилаётганини қайд қилди.

КХШТга аъзо давлатлар бошлиқларининг Тожикистон Республикасига Афғонистон билан давлат чегараларини мустаҳкамлаш учун тезкор ёрдам кўрсатиш тўғрисида 2013 йил, 23 сентябрдаги  қарори ижроси бўйича мазмунли суҳбат қурилди.

Шунингдек, Афғонистон ва дунёнинг бошқа оловли нуқталаридаги бугунги вазият ва келгусидаги истиқболлар ҳамда терроризм, экстремизм тарқалиши, бошқа минтақавий ҳамда халқаро таҳдиду хатарларга қарши биргаликдаги курашни кучайтириш масалалари юзасидан фикр алмашинди.

КХШТга аъзо давлатлар томонидан ишлаб чиқилган қўшма чора-тадбирлар минтақада барқарорликни сақлашда амалий рол ўйнашига ишонч билдирилди.

«Ховар» ТМАА.