30 июн куни Тожикистон Республикаси Президенти, мамлакат Ҳукумати раиси Эмомали Раҳмон бошчилигида Тожикистон Республикаси Ҳукуматининг навбатдаги мажлиси бўлиб ўтди.

Мажлис аввалида кадрлар масаласи кўриб чиқилиб, Тожикистон Республикаси Ҳукумати қошидаги Хотин-қизлар ва оила комитети ҳайъати янги аъзолари тасдиқланди. 

Сўнгра Тожикистон Республикаси Ҳукуматининг 2015 йил иккинчи ярим йиллиги Иш режаси ҳамда 2015-2019 йиллар Тожикистон Республикасида донорлик қони ва унинг компонентларини ривожлантириш миллий дастури тасдиқланди.

Тожикистон Республикасининг “Хўжалик субъектлари фаолиятини текшириш тўғрисида”ги қонун лойиҳаси ҳамда Тожикистон Республикасининг “Ижозатнома тизими тўғрисида”ги қонунига ўзгартиш киритиш лойиҳаси тасдиқланиб, кўриб чиқиш учун Тожикистон Республикаси Олий Мажлиси Намояндалар мажлисига йўналтирилди. Таъкидланишича, мазкур қонун лойиҳаси Давлат бошлиғи Эмомали Раҳмоннинг жорий йил Тожикистон Республикаси Олий Мажлисига йўллаган Паёмидаги топшириқларига биноан, ишлаб чиқилган ва тавсия этилган.

Мазкур лойиҳани тайёрлаш ва таклиф этишнинг асосий мақсади: текширувда шаффофликни таъминлаш, такрорий асоссиз ва узоқ текширувларни бартараф этиш ҳамда тадбиркорлар ва сармоядорлар ишини соддалаштиришдан иборатдир. Лойиҳада текширув муддатлари йирик тадбиркорлик субъектлари учун 10 кундан кўп бўлмаслиги, ўрта тадбиркорлик субъектлари учун 5 кунгача ҳамда кичик субъектлар учун 2 кун қилиб белгиланади.

Мажлис давомида Тожикистон Республикасида бепул ҳуқуқий ёрдам кўрсатиш концепцияси, 2015-2018 йиллар Тожикистон Республикаси соғлиқни сақлаш соҳасини молиялаштириш бўйича келгусидаги ислоҳотларни ўтказиш стратегик режаси, 2015-2020 йиллар Тожикистон Республикаси энергетика соҳасида истиқболли лойиҳаларни амалга ошириш бўйича тадбирлар режаси, мамлакат олий ўқув муассасаларига студентларни Тожикистон Республикаси Президенти квоталарига мувофиқ қабул қилиш қоидалари, қишлоқ жойларда ўз фаолиятини олиб бораётган ёш ўқитувчилар ойлик маошларига қўшимча тўлов тартиблари кўриб чиқилди.

Мажлиснинг якуний қисмида масъул шахслар олдига республика халқ хўжалигининг қишлоқ хўжалиги маҳсулотларини йиғиб-териб олиш ва такрорий экин экилишини йўлга қўйиш бўйича биринчи ярим йилликдаги фаолияти натижалари хусусида аниқ вазифалар қўйилиб, келгуси йил кузги-қишки мавсумига озиқ-овқат ва ёнилғи материалларини жамғариш ҳамда Афғонистон билан давлат чегаралари хавфсизлиги ва мустаҳкамлигини таъминлаш бўйича чора-тадбирлар ишлаб чиқиш топширилди.

“Ховар” ТМАА.