8 январ куни Тожикистон Республикаси Президенти Эмомали Раҳмон Рўдакий ноҳиясининг Султонобод қишлоқ жамоатига ташриф буюриб, кўчатлар ўтқазиш бўйича ҳашарда бевосита иштирок этди.

Султонобод қишлоқ жамоатининг 300 гектар лалми ерларида барпо этиладиган янги боғ яратилишида Рўдакий ноҳиясининг минг нафардан зиёд аҳолиси иштирок этди.

Давлат бошлиғининг ташрифи ва кўчат ўтқазиш ҳашарида бевосита иштирокидан асосий мақсад, энг аввало, янги мавсумда кўчатлар ўтқазиш ишларини бошлаб бериш ва халқни фойдали машғулот – боғдорчиликка тарғиб қилишдан иборат.

Сўнгги ўн йилда боғдорчилик ва токпарварликни ривожлантириш бўйича давлат иккита дастури кўрсаткичлари ортиғи билан ижро этилгани таъкидланди. Айни пайтда соҳанинг янги дастури ишлаб чиқилган ва мамлакат Ҳукумати тавсия қилинган бўлиб, унга биноан, 30 минг гектардан зиёд майдонда янги боғлар ва токзорлар барпо этилади.

Соҳа мутахассисларининг маълумотига мувофиқ, мазкур ерлар лалми бўлишига қарамасдан, денгиз сатҳидан 1100 метр баландликда жойлашган мавзе иқлими ва тупроғи боғлар ва токзорлар барпо этиш учун жудаям қулай. Агротехник талабларга риоя этилса, бу ерда етиштириладиган мевали дарахтлардан бой ҳосил олиш мумкин.

Режага биноан, ушбу мавсумда бу ерда 300 гектар янги боғлар ва токзорлар барпо этилади. Келажакда эса ушбу мавзе майдонларида 3 минг гектардан ортиқ боғлар ва токзорлар яратиш имконияти мавжуд.

Аввал фақат ғалла етиштириш билан шуғулланиб, ундан кам ҳосил олиб келган ушбу мавзе деҳқон хўжаликлари раҳбарияти ва аъзолари бу ташаббус учун миннатдорчилик изҳор этдилар. Чунки лалми ерлардаги боғдорчилик ғаллакорликдан кўпроқ фойда келтиради.

Таъкидлаш жоизки, ушбу қишлоқлар аҳолисини боғдорчилик ва токпарварликка рағбатлантириш учун ерларни кўчатлар ўтқазишга тайёрлаш, ўнлаб қишлоқ хўжалиги техникаларини ишга солган ҳолда, давлат ҳисобидан бепул бажарилмоқда. Бундан ташқари, шу тарзда сифатли пайвандланган кўчатлар республика турли бурчаклари, жумладан, Суғд ва Хатлон вилоятлари хўжаликлари ҳамда республика бўйсунишидаги кўчат ўстириш билан шуғулланувчи ноҳиялардан келтирилмоқда.

Шунингдек, кўчатларни тўғри ўтқазиш, боғлар ва токзорларни парваришлаш учун бу ерга Қишлоқ хўжалиги фанлари академияси соҳаси мутахассислари, Шириншо Шотемур номли Тожикистон аграр университети ўқитувчи ва студентлари жалб этиладилар.

Давлат бошлиғи Эмомали Раҳмон аҳоли билан суҳбатда йилдан-йилга мамлакат ичкариси ва унинг ташқарисида Тожикистон меваю сабзавотларига талаб ошиб бораётганини қайд қилди. Сифатли боғлару токзорлар барпо этган ва мевалар етиштиришни тўғри йўлга қўйган шахслар катта даромад олишлари таъкидланди.

«Ховар» ТМАА.