14 июл, куннинг иккинчи ярмида Миллат қасрида Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон Американинг Мустақил Давлатлар Ҳамдўстлигидаги «Женерал Электрик» компанияси Вице-президенти – Бош ижроия директори Роналд Поллеттни қабул қилди.

Учрашувда Тожикистоннинг Америка компанияси билан энергетик лойиҳаларни амалга татбиқ этиш йўналишидаги ҳамкорликлари истиқболи кўриб чиқилди.

Мамлакат Президенти «Женерал Электрик» компанияси раҳбариятини мамлакатимизнинг гидроэнергетик соҳасига алоҳида эътибор қаратиш, иқтисодиётимизнинг бу ва бошқа истиқболли соҳаларини сармоялаштиришда фаол иштирок этишга таклиф қилди.  

Учрашув чоғида суҳбатдошлар Тожикистоннинг катта гидроэнергетик захираларидан самарали фойдаланиш, энергетика соҳасидаги ҳамкорликларни ривожлантириш имкониятлари, жумладан, гидроэлектростанциялар қурилиши учун сармоялар жалб этиш, электростанциялар реконструкцияси, электр узатиш линиялари қурилиши,  истиқболли соҳаларни турли энергетик ускуналар билан таъминлаш масалаларини кўриб чиқишди.

Америка тадбиркорлик доиралари, жумладан, нуфузли «Женерал Электрик» компаниясининг фаол иштироки икки мамлакат савдо-иқтисодий ва сармоявий алоқалари ривожланиши ҳамда кенгайишига жиддий туртки бериши қайд қилинди.

Учрашувда ҳамкорликнинг иккала томон учун ҳам манфаатли бўлган бошқа мавзулари юзасидан мазмунли суҳбат қурилди.

«Ховар» ТМАА.