27 декабр куни Миллат қасрида Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмон Ўзбекистон Республикаси Бош вазири ўринбосари, Тожикистон ва Ўзбекистоннинг савдо-иқтисодий ҳамкорликлар бўйича ҳукуматлараро комиссияси ҳамраиси Рустам Азимовни қабул қилди.

Давлат бошлиғи муҳтарам Эмомали Раҳмон бу дўст ва қўшни мамлакат раҳбарияти ва халқини Ўзбекистон Республикаси Президенти сайловлари юксак даражада ўтганлиги муносабати билан яна бир бор табриклар экан, бу мамлакат ҳукумати расмий делегациясининг Тожикистонга ташрифини давлатлараро алоқаларни келгусида ривожлантириш ва чуқурлаштириш йўлидаги муҳим қадам, дея атади.

-Тожикистон Ўзбекистон томонининг икки мамлакат ўртасида авиапарвозларни қайта йўлга қўйиш ташаббусини ижобий баҳолайди,- дея таъкидлади  Давлат бошлиғи. -Бизнинг мамлакатимиз темир йўллари участкаларини қайта тиклаш, темир йўл орқали юк ташиш тарифларини камайтириш, электр энергияси импорти ва экспортини амалга ошириш, қишлоқ хўжалиги соҳасида ҳамкорликларни кенгайтириш, виза тизимини соддалаштириш ва бекор қилиш, чегара масалаларини ҳал этишдаги муносабатларни келгусида яхшилашни қўллаб-қувватлашини қўшимча қилди.

Суҳбатдошлар иқтисодиёт, савдо, транспорт ва коммуникация, сув, энергетика, маданият, чегара ҳимояси соҳаларидаги икки томонлама ҳамкорликлар ҳозирги ҳолати ва келгусидаги тараққиёт истиқболлари борасида фикр алмашишиб, бу соҳаларда ҳамкорликларни ривожлантириш йўлидаги тўсиқларни бартараф этиш бўйича конструктив таклифларни илгари суришди.

Икки мамлакат давлатлараро муносабатлари шартнома-ҳуқуқий базаси юздан зиёд ҳужжатдан иборат бўлиб, уларни амалга татбиқ этиш икки мамлакат манфаатларига тўлиқ жавоб бериши қайд қилинди.

Тожикистон ва Ўзбекистоннинг савдо-иқтисодий ҳамкорликлар бўйича ҳукуматлараро комиссияси иши доирасида муҳим ва долзарб масалалар муҳокама қилиниши, давлатлараро муносабатларни келгусида ривожлантиришнинг янги йўлларини топиш бўйича самарали чоралар қабул қилинишига ишонч билдирилди.

Учрашувда, шунингдек, минтақа ва жаҳондаги ҳарбий-сиёсий вазият, терроризм, экстремизм, наркотик моддаларнинг ноқонуний савдоси, бошқа трансмиллий жиноятларга қарши курашни кучайтириш билан боғлиқ масалалар юзасидан фикр алмашинди.

"Ховар" ТМАА.