11 ноябр куни Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмон рассомларнинг тинчлик учун "Ипак йўли дурдоналари" номи остида ўтказилган "Рассомлар тинчлик учун" халқаро кўргазмасида иштирок этди ва нутқ сўзлади.

Халқаро кўргазма Тожикистон Миллий музейида ўтказилиб, шу мақсадда музей байрамона тарзда ясатилди. Халқаро кўргазмада дунёнинг 30дан зиёд мамлакатидан рассомлар ўз ижод намуналарини намойиш этишди.  

Давлат бошлиғи муҳтарам Эмомали Раҳмон барча иштирокчиларни ушбу кўргазма ўтказилиши билан табриклар экан, тасвирий санъат ролига алоҳида тўхталиб, унинг тараққиёти, рассомларнинг маданиятлар ғояларини тарғиб этишдаги ҳиссалари ҳақида сўзлади.

Рассомлар маданият ва санъат арбоблари орасида маданият тарғиботчилари бўлиш билан бир қаторда, тинчлик ва дўстлик даракчилари ҳам ҳисобланиши ва ўз асарларида одамларни эзгулик, яхши амаллар, саховат ва олийжаноблик, шон-шараф ва қадр-қимматга ҳидоят этишлари қайд қилинди. 

Ўз чиқиши охирида мамлакат Президенти муҳтарам Эмомали Раҳмон рассомлар бу имкониятдан фойдаланишлари ҳамда мамлакатимизнинг ранг-баранг манзараларидан имкон қадар кўпроқ фойдаланишлари, юртимизнинг турли минтақаларининг гўзал кўринишлари улар асарларида жой топишига умид билдирди.

Сўнгра кўргазма меҳмонлари ва иштирокчилари номидан "Сайёҳлик тинчлик йўлида" маданий алмашув маркази раҳбари жаноб Шао Чанчун чиқиш қилиб, олиймақом меҳмонларга бу тадбирда иштироклари учун миннатдорчилик билдирди. Ш.Чанчун Тожикистон Республикаси Президенти муҳтарам Эмомали Раҳмонга мустаҳкам тинчлик ва тожик халқи бирдамлигининг даракчиси сифатида "Рассомлар тинчлик учун" халқаро иттифоқи номидан ноёб картинани совға қилди.

"Рассомлар тинчлик учун" халқаро кўргазмасида жаҳон даражасидаги юксак муваффақиятга эришганлик учун 6 нафар рассомга олтин, кумуш ва бронза медаллари топширилиб, Тожикистон Республикаси Президенти муҳтарам Эмомали Раҳмон  хотира учун совриндорлар билан суратга тушди.

Тинчлик ва миллий бирлик асосчиси - Миллат пешвоси, Тожикистон Республикаси Президенти Эмомали Раҳмон медаллар топширилганидан кейин, Тожикистон Миллий музейининг учинчи қаватида рассомларнинг тинчлик учун "Ипак йўли дурдоналари" халқаро кўргазмасини расман очди ва  рассомлар ижод намуналари билан яқиндан танишди.

Тожикистон Республикаси Президенти муҳтарам Эмомали Раҳмон, шунингдек, хорижлик меҳмонлар ва рассомлар билан биргаликда Тожикистон Миллий музейининг иккинчи қаватида Тожикистон Республикаси Президенти Совғалари музейини томоша қилди.

«Ховар» ТМАА.