14 октябр куни Арманистон Республикасининг Ереван шаҳрида Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон Коллектив Хавфсизлик Шартномаси Ташкилоти Хавфсизлик кенгаши мажлисида иштирок этди ва нутқ сўзлади.

КХШТ Коллектив хавфсизлик кенгаши навбатдаги мажлиси кун тартибидаги масалалар делегациялар раҳбарларининг дастлаб тор доирадаги, сўнгра кенгайтирилган таркибдаги учрашувларида муҳокама қилинди.  

Навбатдаги мажлисда Тожикистон Республикаси Президенти муҳтарам Эмомали Раҳмон, Россия Федерацияси Президенти Владимир Путин, Арманистон Президенти Серж Саргсян, Белорус Президенти Александр Лукашенко, Қирғизистон Президенти Алмазбек Атамбаев ва Қозоғистон Бош вазири Бакитжон Сагинтаевлар иштирок этишди.

Мажлисда Коллектив Хавфсизлик Шартномаси Ташкилотининг 2025 йилгача бўлган давр учун Коллектив хавфсизлик  стратегияси билан боғлиқ масалалар, терроризмга қарши кураш бўйича қўшимча чора-тадбирлар муҳокама қилинди.

Ўз чиқишида Тожикистон Республикаси Президенти муҳтарам Эмомали Раҳмон халқаро терроризм, экстремизм, зўравонлик, наркотик моддалар, қурол-яроқлар ноқонуний савдоси, трансмиллий жиноятларга қарши биргаликда ва шафқатсиз кураш заруратини яна бир бор қайд қилар экан, КХШТ давлатлари бошлиқлари эътиборини минтақа ва жаҳондаги бугунги ҳолат, айниқса, Афғонистондаги мушкул ҳарбий-сиёсий вазиятга қаратди.

Президент Эмомали Раҳмоннинг сўзларига кўра, Афғонистондаги мушкул ҳарбий-сиёсий вазият КХШТга аъзо давлатлар жанубий чегараларига таҳдид ва хавф туғдираётган бўлиб, минтақавий хавфсизлик ва барқарорликка рахна солмоқда.

Тожикистон Президенти муҳтарам Эмомали Раҳмон минтақавий ва дунёвий замонавий таҳдидлару хатарларга қарши биргаликда кураш олиб бориш зарурлигини алоҳида таъкидлар экан, Тожикистон бу ҳодисаларга қарши курашда биринчи сафда турганини ва бу йўналишда КХШТ доирасида эришилган келишувларни қўллаб-қувватлашини қайд қилди. 

Навбатдаги йиғилиш якуни бўйича КХШТга аъзо давлатлар бошлиқларининг халқаро терроризм ва жамиятнинг бошқа салбий ҳодисаларига қарши ҳамкорликлари тўғрисида муштарак баёнотлари қабул қилиниб, бир қатор муҳим ҳужжатлар имзоланди.

 «Ховар» ТМАА.