30 август куни пойтахтнинг "Соҳилий" кўчасида Тинчлик ва миллий бирлик асосчиси - Миллат пешвоси, Тожикистон Республикаси Президенти Эмомали Раҳмон рамзий лентани кесиш орқали "Дунёи нав" ишлаб чиқариш корхонасини тантанали тарзда ишга туширди.

Корхона биноси 8 қаватдан иборат бўлиб, энг замонавий шаҳарсозлик меъёрларини ҳисобга олган ҳолда бунёд этилган.

Танишув чоғида Миллат пешвосига мазкур бино 9000 квадрат метр майдонни эгаллаб, унда тикувчилик маҳорати, гилам тўқиш, кашта тикиш ва зардўзлик санъати учун барча зарур шароитлар мавжудлиги маълум қилинди.

"Дунёи нав" ишлаб чиқариш корхонаси биринчи қаватида қўли гул аёллар мижозлар буюртмаси, диди ва истаги асосида гилам тўқиш билан шуғулланадилар.

Ишлаб чиқариш корхонаси маҳаллий тадбиркор Аваз Кабиров томонидан қурилган. Касб-ҳунар ўрганиш марказларида аёллар бир неча ой мобайнида мазкур ҳунарлар нозикликларини ўрганишди.

Мамлакат Президентига бинонинг 7-қаватида жисмонан имконияти чекланган кишиларнинг фаолияти учун зарур шароитлар мавжудлиги билдирилди. Яратилган шароитлардан фойдаланган ҳолда уларда тикувчилик иши билан шуғулланиш ва яхши маош олиш имконияти бор. Янги бинонинг бошқа қаватларида ҳунарманд аёллар тикувчилик иши, гилам тўқиш ва кашта тикишнинг бошқа турлари билан машғул бўлишади.

Масъул шахсларнинг маълум қилишларича, мазкур бинода умуман, 500 киши яхши маошга эга иш жойи билан таъминланди. Келгусида мазкур тадбиркор бу бино ёнида маданий-маиший комплекс, аквапарк, спорт, хизмат кўрсатиш ва коммунал иншоотларини қуриб, фойдаланишга топшириш ниятида эканлиги қайд қилинди.

Давлат бошлиғи Эмомали Раҳмон бино билан танишув чоғида қурувчилар ишини юқори баҳолаб, тадбиркорларнинг бундай ташаббусларини намунали, дея атади.

"Ховар" ТМАА.