Хатлон вилоятида боғлар ва узумзорлар майдони яқин беш йил ичида яна ҳам кенгаяди. Мамлакатимиз ички бозорини мўл-кўл мевалар ҳамда узум билан таъминлаш, қишлоқ хўжалигининг айни шу турдаги маҳсулотларини чет элга ҳам экспорт қилиш, соҳибкор боғбонлар меҳнати самарадорлигига эришиш, шу тариқа иқтисодиётнинг аграр секторини янада ривожлантириш давлат ҳокимияти вилоят ижроия органи тасдиқлаган махсус дастур асосида амалга оширилади.

Ана шу муҳим ҳужжатнинг имзоланиши вилоятда 2016-2020 йилларда боғ ва токзорларни барпо этиш суръатларини оширади, интенсив боғлар яратишга кенг йўл очиб, аҳолини иш билан таъминлашга хизмат қилади. Мамлакат озиқ-овқат хавфсизлигини таъминлашга қаратилган бу чора-тадбирлар яқин келажакда агросаноат соҳасида муҳим ўзгаришлар олиб келади. Рақамларга эътибор беринг, шу кеча-кундузда яшнаб турган боғ-роғлар ва токзорлардан ташқари, биргина Данғара ноҳиясида 755 гектар, Мўминободда 530, Ховалингда 500, Панжда 440, Фархорда 405,9, Вахшда 400 гектар майдонда янги боғлар ва токзорлар ташкил этилади. Бундай кенг қамровли режаларнинг амалга оширилиши натижасида аҳоли барча қатлами моддий манфаатдорлиги таъминланади. Мамлакат ички бозорларида мева ва узум фаровонлигига эришилиб, уларни қайта ишлаш корхоналари вужудга келтирилади. Вилоятнинг қулай иқлим шароити, боғ ва узумзорларнинг минтақалар бўйлаб режали жойлашуви, адирлар ҳамда текисликларнинг мутахассис олимлар тавсиялари асосида ўзлаштирилиши кўзда тутилмоқда.

Вилоят ҳокимияти дастурига кўра, 1070 гектардан ошиқроқ майдонда олмазор - боғларни барпо этиш мўлжалланмоқда. Биргина ўрикзор боғлар майдони 787 гектарни ташкил этиши назарда тутилган. Вилоят ҳудудларида бодом дарахтлари экилган майдонлар 670 гектарни ташкил этиши режалаштирилди. Узумзорлар 508 гектарни ташкил этади. Бу эзгу ишларни амалга ошириш муддатлари белгилаб олинганлиги қувончлидир. Шунга кўра, вилоятда иқтисодиётнинг аграр сектори ўсиши таъминланади. Қишлоқ хўжалиги маҳсулотларини етиштириш, экспорт қилиш, жойларда меваларни қайта ишлаш технологиялари вужудга келтирилади.

Боғлар ва узумзорларни  барпо этиш мамлакатимиз қишлоқ хўжалигида эришилаётган илғор тажрибалар асосида йўлга  қўйилиши кўзда тутилган. Олимларнинг илмий изланишлари ва хулосаларида бундай истиқболли лойиҳалар муҳимлиги таъкидланмоқда.

Вилоят ҳудудларида боғ ва узумзорларнинг интенсив ривожланиши учун барча шароитларни яратиш қабул қилинган муҳим стратегик дастурнинг асосий йўналишига айланди. Яқин келажакда Хатлон вилояти мамлакатимизнинг боғ ва токзорлар минтақасига айланиши табиийдир.

Толмас Бўриев.