Панжакент шаҳрида баҳорги ишларга тайёргарлик авжида. Шаҳар раиси вазифасини ижро этувчи Ислом Шафиевнинг бевосита раҳбарлигида барча соҳа мутахассислари, деҳқонлар билан биргаликда экин майдонларига сув етказиб берадиган каналлар, ариқ-зовурларни тозалаш ишлари қизғин бормоқда. Айниқса, шаҳарни сув  билан таъминлайдиган энг йирик «Халифа Ҳасан», «Марғидор», «Эшон» ва «Тўқсон корез» каналлари тозаланиб, тўлиқ таъмирдан чиқирилиши режалаштирилган.

Ҳозиргача ноҳиянинг 4 минг гектар экин майдони суғориладиган «Тўқсон корез» каналининг 9-10 километри тўлиқ тозаланди. Мазкур канал Чорбоғ қишлоғидан бошланади ва «Косатарош», «Халифа Ҳасан», «Чинор», «Саразм» қишлоқ жамоатлари ҳудудидаги экин майдонларини сув билан таъминлайди.

Қувонарлиси шундаки, каналларни тозалаш ва таъмирлаш ишлари ҳашар усулида йўлга қўйилган бўлиб, унга шаҳар барча мутахассислари бош қўшган. Шаҳар раиси ташаббусини сув хўжалиги раҳбари Ҳожи Қурбон Усмонов, бош инженер Имомуддин Саидмуродов, шаҳар санитария-эпидемиология хизмати бошлиғи Аловиддин Сўфиев, «Чорбоғ» қишлоқ жамоати раиси Раҳимқул Жўраевлар қўллаб-қувватлаб, каналларни тозалаш ва таъмирлаш ишларига бошчилик қилишмоқда.

Ҳашар усулида олиб борилаётган ишларга кўпчилик панжакентликлар бош қўшаётганлиги қувонарлидир. «Чорбоғ» деҳқон хўжалиги аъзоси Абдуазиз Ҳомидов ўзининг шахсий техникалари билан ҳашарчиларнинг мушкулини осон этаётганлиги таҳсинга лойиқ.

Яқинда шаҳар раиси вазифасини ижро этувчи Ислом Шафиев барча мутахассислар билан биргаликда яқин 17-18 километрлик канални пиёда кўздан кечирди. Улар каналнинг барча муаммоли жойларини яқиндан ўрганиб, уларнинг ечимини топиш пайидан бўлмоқдалар.

Баҳорги ишларга тайёргарликка бағишлаб шаҳар раиси қошида ўтказилган йиғилишда оммавий-ахборот воситалари вакиллари ҳам қатнашдилар.

- Деҳқонларга сув ўз вақтида муаммосиз етказиб берилса, ишончим комилки, улар кетмонларини олиб, қадрдон далалари бағрига ишонч билан йўл оладилар, - деди йиғилишда Ислом Шафиев.

Айни пайтда панжакентлик деҳқонлар мамлакат Президенти кўрсатмаларига амал қилган ҳолда, баҳорги экин-тикин ишларига жиддий тайёргарлик кўришмоқда. Ҳар бир деҳқон хўжалик мавжуд экин майдонларининг яқин 30-40 фоизига картошка экишни мўлжаллаган. Зеро, сабзавотнинг бу турини етиштириш учун Панжакент об-ҳавоси жуда қулай ҳисобланади.

- Агар Чорбоғ қишлоғида «Тўқсон корез» каналидан бир сонияда 5,5 кубометр сув оқиб ўтса, шаҳарнинг энг чекка қишлоқ жамоати «Саразм»гача бир сонияда 1-1,5 кубометр сув етиб боради, - деди шаҳар раиси. – Бунча миқдордаги сув деҳқончилик қилиш учун бемалол етиб-ортади. Биз каналларнинг санитария-эпидемиология ҳолатларини яхшилашимиз зарур, чунки, кўплаб қишлоқларда канал сувидан ичимлик суви сифатида ҳам фойдаланишади.

Дарҳақиқат, панжакентликлар каналлар тозалигига эътибор қаратиб, аҳоли соғлиги ҳақида ҳам қайғурмоқдалар.

Кўклам эшик қоқмоқда ва панжакентликлар баҳорги ишларга атрофлича тайёргарлик кўришмоқда.

Раҳимберди БЕРДИЕВ, Панжакент шаҳри.