Жайҳун ноҳиясида Хатлон вилояти раиси Давлатшоҳ Гулмаҳмадзода раҳбарлигида «Картошка ва эртапишар сабзавотларни экишнинг агротехник қоидалари» мавзусида вилоят семинар-кенгаши бўлиб ўтди.

Тадбирда вилоят раисининг биринчи ўринбосари, вилоят шаҳар ва ноҳиялари раислари, шунингдек, соҳа мутахассислари иштирок этишди.

Семинарда Тожикистонда аграр соҳани ривожлантириш аҳамияти

тўғрисида сўз юритилди. Юқори сифатли уруғлар ва ўғитлардан фойдаланиш, шудгорни белгиланган чуқурликда ўтказиш ва бошқа масалалар муҳокама этилди.

Семинарнинг амалий қисмида қатнашчилар ноҳия деҳқон хўжаликлари фаолияти, пиёз ва кузги картошка экиш билан танишдилар. Назариявий қисмида эса, олимлар сабзавот етиштиришда қўлланиладиган замонавий агротехник усуллар юзасидан чиқиш қилишди.

Семинар иштирокчилари учун қишлоқ хўжалиги маҳсулотлари кўргазмаси ташкил этилди.

Тадбир сўнгида вилоят раиси Давлатшоҳ Гулмаҳмадзода қишлоқ хўжалиги меҳнаткашларини олимлар билан ҳамкорликда ишлашга даъват қилди.

- Сиз ва бизнинг асосий мақсадимиз Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмоннинг кўрсатма ва топшириқларини ҳаётга татбиқ этиш эканлигини унутмаслигимиз лозим, - деди Д. Гулмаҳмадзода.

Имкониятлардан самарали фойдаланилса…

Қўрғонтепа шаҳрида давлат ҳокимияти Хатлон вилояти ижроия органи Хотин-қизлар ва оила ишлари бошқармаси қошидаги Аёллар кенгашининг навбатдаги йиғилиши бўлиб ўтди.

Йиғилиш жараёнида кенгашнинг жорий йилги фаолияти, латиф жинс аъзоларини жамият ишларига жалб этиш, шунингдек, аёл ва қизларни турли касбларга йўналтириш масалалари муҳокама этилди.

- Вилоятда аёлларга нисбатан зўравонликнинг олдини олишга қаратилган тадбирлар, аёл-раҳбарлар мактабларини ташкил этиш, аёл-олимлар ўртасида конференциялар ўтказиш каби талай ишлар йўлга қўйилган, - деди йиғилишда сўзга чиққан вилоят раиси ўринбосари Махфират Хидирзода. –Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон аёлларни жамият ишларига жалб этишга катта эътибор қаратади. Бунинг самараси ўлароқ, бугун вилоятда кўпгина раҳбарлик вазифаларида аёллар фаолият юритмоқда.

Шунингдек, аёллар ўртасида тадбиркорликни ривожлантиришга катта эътибор қаратилмоқда. Бу мақсадда вилоят раиси грантлари тасдиқланган. Фақатгина жорий йилда 21 нафар аёл тадбиркорликни ривожлантириш учун вилоят раисининг грантини олишга муваффақ бўлди.

Истеъмолчилар ҳуқуқи ҳимояси

Қўрғонтепа шаҳрида «Истеъмолчилар ҳуқуқини ҳимоя қилиш маслаҳат марказлари фаолияти» мавзусида семинар ўтказилди. Семинарни ўтказишдан асосий мақсад: «Истеъмолчилар ҳуқуқи ҳимояси тўғрисида»ги Тожикистон Республикаси қонуни талаблари бажарилишини муҳокама этишдан иборат эди. Давлат ҳокимияти Хатлон вилояти ижроия органи Монополияга қаршилик хизмати бошқармаси бошлиғи Фируз Исмонов йиғилиш қатнашчиларига мазкур мавзуга тегишли зарурий маълумотларни тақдим этди.

- Айни пайтда вилоятнинг шаҳар ва ноҳияларида маслаҳат марказлари фаолият юритади, - деди Ф. Исмонов. – Марказларнинг фаолияти истеъмолчилар ҳуқуқини ҳимоя қилишга қаратилган. Фуқаролар мазкур марказларда зарурий маълумотларни қўлга кирита оладилар.

Унинг сўзларига кўра, ҳисобот даврида маслаҳат учун 66 нафар фуқаро мурожаат этган. Барча ариза ва мурожаатлар ўз вақтида кўриб чиқилиб, тегишли чоралар белгиланган.

Ўз мухбир.