Хўжандликлар ва шаҳар меҳмонлари Россиядаги илм ва маданият янгиликлари, бу борада эришилган ютуқлар, соҳанинг кўзга кўринган вакиллари фаолияти билан яқиндан танишиш имкониятига эга бўлдилар. Бу ерда Россия илм ва маданият маркази ўз эшикларини очди.

Марказнинг очилиш маросимида Суғд вилояти раиси ўринбосари Анвар Яъқубий, Россия Федерациясининг Тожикистон Республикасидаги элчиси Игор

Лякин-Фролов, мазкур мамлакатнинг Хўжанддаги бош консули Валерий Бондаренко, Хўжанд шаҳри раҳбарлари ва россиялик бир қатор масъул кишилар қатнашишди.

Янги марказ Тожикистон ва Россия ўртасидаги икки томонлама келишувлар доирасида иш бошлаган бўлиб, кўпроқ маориф ва маданият соҳаларидаги ҳамкорликни қамраб олади. Олдинроқ худди шундай марказ Душанбеда ҳам иш бошлаганди.

Марказ очилиши муносабати билан Хўжандда Россиянинг Санкт-Петербург шаҳри филармониясидан келган санъаткорлар иштирокида маданий тадбир ўтказилди.

Энг яхши кутубхоначи ва китобхон

Хўжанддаги Тошхўжа Асирий номли кутубхонада ўтказилган танловнинг якунловчи босқичида вилоятнинг энг яхши кутубхоначиси ва энг яхши китобхони аниқланди. Мазкур танлов Миллий бирлик кунининг 20 ва Тожикистон Республикаси Олий Кенгаши ХVI сессиясининг 25 йиллигига бағишланганди.

Салоҳиятли ҳакамлар ҳайъати Гулистон шаҳрида элга зиё тарқатаётган Ширинмоҳ Султоналиевани энг яхши кутубхоначи деб топди. У танловнинг бош мукофотига сазовор бўлди. Деваштич ноҳияси болалар кутубхонасида ишлаётган Шаҳноза Маҳкамова биринчи, вилоят болалар кутубхонасидан Зулайҳо Раҳматова иккинчи, Панжакент шаҳридан Заррина Бомуллоева учинчи ўринни эгаллашди.

 Ғолибларнинг ҳаммасига қимматбаҳо эсдалик совғалари берилди.

Панжакентдаги 23-кутубхона эса, вилоятдаги "Намунали кутубхона", деб топилди. Мазкур танлов ҳакамлари бу зиё масканида фаолият юритаётган кутубхоначи Мақсуда Расуловани кутубхонани безатиш, китобхонлар учун қулайликлар яратишдаги маҳоратини таъкидлашди. Мақсуда Расулова китобхонлар қалбида китобга меҳр-муҳаббатни кучайтириш, янги китобхонларни жалб этиш учун мунтазам қизиқарли тадбирлар ўтказиб келади. Бу танлов ғолибига  Суғд вилояти маданият бошқармаси ифтихорномаси ва принтер берилди.

Вилоят кутубхонаси раҳбарларининг билдиришларича, "Энг яхши кутубхоначи" каби "Энг яхши китобхон" танлови ҳам юқори савияда ўтган. Ҳар икки танловда ҳам қатнашишни истаганлар сони ҳар йилгидан кўпайган.

Бадиий китоблар мутолааси бўйича танловда Раъно Насриддиновага тенг келадигани топилмаган. Танловнинг бош мукофотига муносиб топилган бу китобхон Панжакентдаги 28-ўрта умумтаълим муассасасининг саккизинчи синфида ўқийди. Раъно ҳакамлар томонидан берилган саволларнинг ҳаммасига тўлақонли жавоб бера олди.

Ғолиб китобхонга замонавий компютер-планшет совға қилинди.

Китобхонлар беллашувида вилоятнинг барча шаҳар ва ноҳияларидан келган мактаб ўқувчилари қатнашишди. Энг фаол қатнашчиларга давлат ҳокимияти вилоят ижроия органи ва вилоят кутубхонаси ифтихорномалари ҳамда совғалари берилди.

Танловнинг якунловчи босқичида иштирок этган зиёлилар, маориф ходимларининг айтишларича, бу каби тадбирларнинг ўтказилиши  болалар ва ёшлар қалбида китобга меҳр-муҳаббатни кучайтириши шубҳасиздир.

Истаравшанда замонавий кўп қаватли бинолар

Шаҳарнинг энг тарихий мавзеси бўлган Муғтепани янада обод қилиш учун у ерда бажарилаётган ишлар тезлаштирилмоқда. Шаҳар раиси Баҳром Иноятзода бу ишнинг муҳимлиги ҳақида гапирар экан, Муғтепадек тарихий жойларга эътибор бериш истаравшанликларнинг бўш вақтларини мазмунли ўтказиш учун хизмат қилиши билан бирга, шаҳарга келадиган сайёҳлар сонини оширишини таъкидлади.

Айни бир пайтда Истаравшанда замонавий кўп қаватли бинолар қуришга ҳам аҳамият кучайтирилмоқда. Ҳозирда бинолар, асосан, беш қаватли бўлса,  энди 7-9 қаватли иморатлар қуриш кўпаяди. Бу каби замонавий осмонўпар биноларни қуришга маҳаллий тадбиркорлар ҳам бел боғлаб, ишга киришишган. Жумладан, Акмал Бобожонов, Лола Шарипова, Эҳром Комилов, Фирдавс Абдураҳмонов, Абдувоҳид Қулиев каби тадбиркорлар ғайрат-ҳиммати билан қурилаётган кўп қаватли бинолар фақатгина Истаравшан шаҳри эмас, балки унга ёндош "Зарҳалол" жамоати кўркини ҳам очаяпти. Бу биноларнинг биринчи қаватида жойлашаётган хизмат кўрсатиш нуқталари эса, аҳолига қулайлик туғдирмоқда. Шаҳарнинг Исмоил Сомоний, Байроқ ва Миллий Герб майдонларини лойиҳалаштириш давом этмоқда.

- Шубҳасиз, бу майдонлар ҳам истаравшанликлар фахрига айланиб қолади, - деди шаҳар меъморларидан бири.

Ўз мухбир.