Фуқароларнинг ҳуқуқий маърифатини ошириш ва аҳолининг ҳуқуқий ҳимоясини таъминлаш, ҳуқуқий ғояларни тарғиб этиш, гендер масалалари моҳиятини очиб бериш мақсадида Тожикистон Республикаси Адвокатлар иттифоқи ташаббуси билан Норак шаҳрида  семинар ўтказилди. Семинарда Норак шаҳри, Дўконий ҳамда Пули Сангин қишлоқ жамоатларидан 120 нафар киши қатнашди.

Бу ҳақда давлат ҳокимияти Норак шаҳри ижроия органи Ижтимоий тараққиёт ва жамоатчилик билан алоқалар бўлими мудири Ҳабиба Сафарова хабар берди.

Масъул шахслар алимент тўлаш мажбурияти, эр-хотиннинг муштарак мулки, зўравонлик тушунчаси ва унинг турлари, оилавий зўравонликка дучор бўлган шахсларни ҳимоя қилиш воситалари, одам савдоси олдини олиш ва бошқа мавзулар юзасидан йиғилиш иштирокчилари билан суҳбат уюштирдилар.

Шунингдек, адвокатлар эҳтиёжманд кишиларга бепул ҳуқуқий маслаҳатлар беришди.

Ёшлар кунига бағишланган тантана

Тожикистон Ёшлар куни вилоят маркази – Қўрғонтепа шаҳрининг «Пахтакор» стадионида тантанали қайд қилинди.

Тадбирда Хатлон вилояти раиси Давлатшоҳ Гулмаҳмадзода иштирок этди. Тантанада 11 минг нафардан ортиқ киши қатнашди.

- Ёшлар куни мамлакатимизда муҳим байрамлардан бири сифатида қайд қилиб келинади, - деди сўзга чиқиб Д. Гулмаҳмадзода. – Айниқса, жорий йил мамлакат Президенти томонидан Ёшлар йили, деб эълон қилиниши бу байрамнинг шукуҳини оширади. Ёшлар – давлат ва миллатнинг ёрқин келажаги.

Тадбир сўнггида қизиқарли театрлаштирилган намойиш кўрсатилди.

Ҳамкорликнинг янги йўллари

Қўрғонтепа шаҳрида Хатлон вилояти раиси Давлатшоҳ Гулмаҳмадзода ва Франциянинг Тожикистон Республикасидаги элчиси Ясмин Гуадерлар учрашуви бўлиб ўтди.

Томонлар маданий ва савдо алоқаларини тиклаш йўлларини муҳокама этишди.

Шунингдек, Хатлон вилояти маориф ва илм муассасаларида француз тилини ўргатишни йўлга қўйиш масаласи муҳокама қилинди.

Мактаб-интернат иссиқлик билан таъминланди

Хатлон вилояти раиси Давлатшоҳ Гулмаҳмадзода ва Япониянинг Тожикистон Республикасидаги элчиси Хажиме Китаока Вахш ноҳиясидаги мактаб-интернатда иккита буғ қозони (котельный) фойдаланишга топширилиш маросимида иштирок этишди.

Тадбир жараёнида буғ қозонларининг фойдаланишга топширилиши мазкур ўқув муассасаси учун муҳим бўлиб, эндиликда кузги-қишки мавсумда ўқувчилар зарур иссиқлик билан таъминланиши қайд қилинди.

Буғ қозонлари Япониянинг Халқаро ҳамкорликлар агентлиги лойиҳаси (JICA) доирасида қуриб битказилди. Бундан ташқари, мактаб-интернат ётоқхонаси қисман мебел билан таъминланди.

Агентлик томонидан мазкур лойиҳани ҳаётга татбиқ этиш учун 80 минг АҚШ доллари миқдорида маблағ сарфланди.

Картошка етиштириш учун қулай мавзе

Хатлон вилояти раиси Давлатшоҳ Гулмаҳмадзода Мўминобод ноҳияси аҳолиси билан учрашув ўтказди. Учрашув фуқароларни қабул қилиш кунлари доирасида бўлиб ўтди.

Мўминобод ноҳияси аҳолиси вакиллари автомобил йўллари таъмири, яшаш манзили қуриш учун ер участкалари ажратиш, тиббиёт нуқталарини  зарур ускуналар билан таъминлаш масалалари юзасидан вилоят раисига саволлар беришди.

Шунингдек, Д. Гулмаҳмадзода ноҳия фаоллари билан мулоқот уюштирди. Учрашувда ноҳия  ижтимоий-иқтисодий тараққиёти борасида сўз юритилди. Вилоят раҳбари «Фарзандлар таълим ва тарбиясида ота-оналар масъулияти тўғрисида»ги ва «Тожикистон Республикасида анъаналар, тантаналар ва урф-одатларни тартибга солиш тўғрисида»ги Тожикистон Республикаси қонунларига риоя этиш ва аҳолига уларнинг моҳиятини етказиш лозимлигини таъкидлаб ўтди.

Йиғилишда саноат соҳасини ривожлантириш масаласи кўтарилди.

- Хом ашёни қайта ишлаш ва маҳаллий маҳсулотларни ишлаб чиқаришни ошириш йўли билан саноат соҳасини ривожлантириш лозим, - деди Д. Гулмаҳмадзода. – Бу ҳақда Тинчлик ва миллий бирлик асосчиси – Миллат пешвоси, Тожикистон Президенти муҳтарам Эмомали Раҳмон мамлакат Олий Мажлисига йўллаган Паёмида айтиб ўтган.

Учрашувда, шунингдек, картошка етиштиришни ривожлантириш масаласига ҳам тўхталиб ўтилди.

- Мўминобод ноҳиясида картошка етиштириш учун барча табиий шароитлар мавжуд, - деди вилоят раиси. – Ҳалол меҳнат қилиб, қишлоқ хўжалигининг бу муҳим маҳсулотини етиштириш кўрсаткичини ошириш лозим.

Ўз мухбир.