Қўрғонтепа шаҳрида вилоят раиси Давлатшоҳ Гулмаҳмадзода раҳбарлиги остида давлат ҳокимияти Хатлон вилояти ижроия органининг кенгайтирилган йиғилиши бўлиб ўтди. Унда вилоят шаҳар ва ноҳиялари раислари, ташкилоту идоралари раҳбарлари ва оммавий ахборот воситалари вакиллари иштирок этишди.

- Бир қатор тадбирларни қўллаш натижасида маҳаллий бюджетнинг даромад қисми режаси ижроси 103 фоиздан ортиқ таъминланди, - деди ўз чиқишида Давлатшоҳ Гулмаҳмадзода.

Йиғилишда мамлакат Бош вазири ўринбосари Маҳмадтоҳир Зокирзода иштирок этиб, сўзга чиқди.

Мазкур мажлисда жорий йилнинг 11 ойида Хатлон вилояти ижитимоий-иқтисодий тараққиёти ва келгуси йил учун иш режалари муҳокама қилинди.

Муҳокама қилинган масалалар юзасидан тегишли қарорлар қабул қилинди.

«Қалъаи Балжувон» тарихий музейи

Балжувон ноҳиясида Тожикистон Республикаси Маданият вазирлиги томонидан ажратилган 2 миллион сомонийлик маблағ эвазига «Қалъаи Балжувон» тарихий музейи бунёд этилди. Бу ҳақда давлат ҳокимияти вилоят ижроия органидан хабар берилди.

Манбанинг маълумотига кўра, тарихий бино пишиқ ғиштдан қурилган бўлиб, унинг кириш қисми маҳоратли ўймакор усталар томонидан безатилган.

- Мазкур маданий иншоот яқин кунлар ичида фойдаланишга топширилади, - деб хабар берди манба.

Таълим муассасалари синфхоналари иссиқ сақланади

- Шаҳар таълим муассасаларининг кузги-қишки мавсумда самарали фаолият кўрсатишлари учун маҳаллий бюджет ҳисобидан 104 минг 456 сомоний ажратилган, - деб хабар берди давлат ҳокимияти Норак шаҳри ижроия органи маориф ва илм бўлими мудири Алимурод Исмоилов. – Шаҳарда фаолият кўрсатаётган 37та таълим муассасасидан 15тасида 24 тонна кўмир, 6384 боғлам ўтин ва 643 литр ёнилғи захира қилинган. Шунингдек, 17та таълим муассасалари доимий электр энергия, электр энергияси билан ишлайдиган иситгичлар ҳамда биттадан генератор билан таъминланган.

Норак шаҳри таълим муассасаларининг 2016-2017 йиллар кузги-қишки мавсумига тайёргарлик ҳолатини назорат этиб бориш учун штаб ташкил этилган. Мазкур штаб синфхоналарни мунтазам иссиқ сақлашни назорат қилади.

Сув ва санитария лойиҳаси якуни

Шаҳритуз ноҳиясида «Халқаро яхши қўшничилик» ташкилоти сув ва санитария бўйича лойиҳасининг расмий якунланишида Корея Республикасининг Тожикистон Республикасидаги Фавқулодда ва мухтор элчиси Ли Вёнг Чан, Шаҳритуз ноҳияси раиси ва «Халқаро яхши қўшничилик» ташкилотининг директори иштирок этишди.

«Халқаро яхши қўшничилик» ташкилотининг хабаридан маълум бўлишича, мазкур лойиҳа Шаҳритуз ноҳиясининг Худойназар Холматов қишлоқ жамоати ҳудудидаги Хокак ва Ёқуб Каримов номли қишлоқлар аҳолисини тоза ичимлик суви билан таъминлашга қаратилганди.

Хабарда келтирилишча, Хокак қишлоғида 4900 ва Ёқуб Каримов номли қишлоқда 5100 нафар киши истиқомат қилади.

Жорий йил апрел ойида лойиҳада кўзда тутилган объектлар қурилиши бошланди. Жумладан, лойиҳа бўйича скважиналар қазиш, сув сақланадиган миноралар қуриш, сув ўтадиган қувурлар ётқизиш, трансформаторлар ўрнатиш, шунингдек, сув каналларини тозалаш ишлари йўлга қўйилди.

Маҳаллий аҳоли лойиҳани амалга татбиқ этишда фаол иштирок этди. Айниқса, қурилиш ишларида қишлоқ аҳлининг ёрдами яққол кўзга ташланди. Айни пайтда бу ерлик маҳаллий аҳоли ўртасида Сув хўжалиги комитети ташкил этилиб, унинг таркиби қишлоқ жамоатлари раислари, аёллар ҳам киритилган маҳаллий фаоллардан иборат бўлади. Мазкур комитет келгусида сувдан тўғри фойдаланиш, унинг аҳоли ўртасида тақсимотини назорат этади.

Мазкур лойиҳа бўйича бажарилган ишларнинг умумий маблағи 100 минг Америка долларини ташкил этди.

Ўз мухбир.