Хатлон вилояти раиси Давлатшоҳ Гулмаҳмадзода вилоятнинг Қабодиён ноҳиясига иш сафари билан борди. Вилоят раисининг ташрифи жараёнида ноҳиянинг Носир Хусрав номли қишлоқ жамоати ҳудудида 54-ўрта умумтаълим муассасасининг янги биноси фойдаланишга топширилди.

Замонавий тарзда қурилган янги ўқув муассасаси 8та синфхонадан иборат бўлиб, тўлиқ мебел ва ўқув қуроллари билан таъминланган.

Мактаб қурилиши 2015 йилнинг декабр ойида бошланган ва унинг қурилишига 1 миллион 240 минг сомоний маблағ сарфланди.

- Янги ўқув муассасасининг фойдаланишга топширилиши ўқувчиларга замонавий мактабда билим олишлари учун қулай имконият яратади, - деди вилоят раиси Давлатшоҳ Гулмаҳмадзода мактаб очилиши тантанали маросимида чиқиш қилиб. - Тинчлик ва миллий бирлик асосчиси - Миллат пешвоси, Тожикистон Президенти муҳтарам Эмомали Раҳмоннинг бевосита қўллаб-қувватлаши туфайли мустақиллик йилларида маориф соҳаси ривожланмоқда. Жумладан, бу даврда вилоятимизда жуда кўплаб янги ўқув муассасалари қурилиб, фойдаланишга топширилди. Мазкур замонавий мактаб ўқувчилар учун мустақилликнинг 25 йиллигига аталган муносиб совға ҳисобланади.

- Мамлакатда маорифни ривожлантириш дастури асосида 2017-2021 йиллар Хатлон вилоятида 566та маориф соҳаси объектлари қурилади, - деди янги мактаб очилиши маросимида иштирок этган Тожикистон Республикаси маориф ва илм вазири ўринбосари Бозорали Одиназода. - Бунинг учун 1,5 миллиард сомоний маблағ ажратилиши кўзда тутилган.

Ногиронларга ғамхўрлик

Вилоят раиси Давлатшоҳ Гулмаҳмадзода Қабодиён ноҳиясига иш сафари жараёнида ноҳияда истиқомат қилаётган ногиронлар билан учрашди. Учрашув жараёнида Д. Гулмаҳмадзода 32та ногиронлик аравачаси тақдим қилди.

- Тинчлик ва миллий бирлик асосчиси - Миллат пешвоси, Тожикистон Республикаси Президенти муҳтарам Эмомали Раҳмон ҳамиша ногиронлар, камтаъминланган оилалар ва етимларга ғамхўрлик кўрсатади, - деди вилоят раиси ўз мулоқоти пайтида. - Шунинг учун ҳам, жорий йил ғамхўрликка эҳтиёж сезаётган фуқаролар ҳолатини эътиборга олган мамлакат Президенти нафақа ва ёрдам пулларини ошириш ҳақида фармон чиқарди.

Ўз навбатида ногиронлар мамлакат Ҳукуматига кўрсатилаётган ғамхўрлик ва эътибор учун миннатдорчилик изҳор этишди.

Ўқувчилар қувончи

Носир Хусрав ноҳиясида янги ўқув муассасаси фойдаланишга топширилди. Ноҳиянинг янги қурилган 15-билим даргоҳининг очилиши тантанали маросимида Тожикистон Республикаси Маориф ва илм вазири ўринбосари Бозорали Одиназода, Хатлон вилояти маориф ва илм бошқармаси бошлиғи Ҳокимхон Вализода ва Носир Хусрав ноҳияси раиси Рамазон Оймаҳмадзодалар иштирок этишди.

Янги мактаб 6та синфхона, ўқитувчилар хонаси ва мактаб раҳбарияти учун кабинетлардан иборатдир. Мактаб 360 ўқувчи таълим олиши учун мўлжалланган. Унинг қурилишига 2 миллион сомоний маблағ сарфланди. 

Юксак хирмон илинжида…

Энг сўнгги маълумотларга кўра, сентябр ойи охиригача Хатлон вилоятида 14 минг 223 тоннадан ортиқ "оқ олтин" жамғарилди. Бу кўрсаткич кўзланган режанинг 44 фоизини ташкил этади.

Хатлон вилояти Қишлоқ хўжалиги бошқармасидан берилган маълумотга кўра, жорий йил хатлонлик деҳқонлар 260 минг 200 тонналик хирмон яратишни режалаштиришган. Вилоят маҳнаткашлари бу йил 115 минг 535 гектар майдонга чигит қадашганди.

Айни пайтда ҳосил йиғим-терими авжида. Далаларда ҳосил чўғи баландлиги хатлонликлар кўзлаган марраларини эгаллашларига ишонч уйғотади. 

Кутубхоначилар малака оширишди

Вилоят кутубхоначилари учун Ш. Шоҳин номли вилоят кутубхонаси қошида "Кутубхона-ахборот фаолияти" мавзусида бир ҳафталик малака ошириш курслари ўтказилди. Мазкур тадбир Тожикистон Миллий кутубхонаси ташаббуси билан ташкил этилди.

Курсларда малака оширган 50 нафар кутубхоначиларга Тожикистон Миллий кутубхонаси мутахассислари Некрўз Мансуров, Акбари Муҳиддин ва Фирдавс Аминовлар машғулотлар ўтказишди.

Ўз мухбир.