Панжакент ноҳиясининг Рўдакий қишлоқ жамоатига қарашли Кошона қишлоғидаги 9-асосий умумтаълим муассасаси ўқитувчилари Миллат пешвоси, Тожикистон Президенти Эмомали Раҳмоннинг мамлакат парламентига йўллаган Паёмини диққат билан тинглашди.

Айниқса, давлатимиз сарвари маорифчилар маоши жорий йилнинг 1 июлидан 20 фоизга оширилиши ҳақида сўз юритганларида ўқитувчилар қувонишди.

Паёмгача мактабимиз ҳаётига назар ташлайдиган бўлсак, ушбу муассасамиз ўқитувчиларининг самарали меҳнатлари туфайли 9-синф ўқувчиси Ҳамид Рустамов рус тили фанидан ноҳияда ўтказилган олимпиадада 1-ўринни, Дилафрўз Кенжаева ўзбек тили ва адабиёти фанларидан бўлиб ўтган олимпиадада 2-ўринни эгаллаган эдилар. Ўқитувчи Сайфиддин Кенжаев тайёрлаган қизлар гуруҳи эса, Панжруд қишлоғида Рўдакий ҳаёти ва ижодига бағишланган шеърхонлик кечасида жамоатдаги 11та мактаб ўқувчилари орасидан 2-ўринни эгаллаб, 100 сомоний мукофот пули билан қайтган эдилар. Шунингдек, давлат тили ўқитувчиси Исмат Бобоев улуғ шоир Нақибхон Тўғрал таваллудининг 150 йиллигига атаб қизиқарли мушоира кечасини ўтказди. Бундан ташқари, математика ва физика фанларидан ҳам кечалар ташкил қилинди.

Мактабимиз директори Хўжамурод Қулов Миллат пешвоси, Тожикистон Республикаси Президенти муҳтарам Эмомали Раҳмоннинг 2016 йил 20 январда Олий Мажлисга йўллаган Паёмидан бир кун кейин мактабда ўқитувчилар ўртасида йиғилиш ташкил этиб, ушбу Паём юзасидан муҳокама юритди. Яъни Паёмга жавоб сифатида таълим-тарбияни янада яхшилаш, Наврўзни муносиб кутиб олиш ва унга тайёргарлик ишларини олиб боришни ўқитувчи Нажмиддин Тошевга топширди. Иккинчи ярим йилликда эса, тарих, химия ва биология фанларидан кечалар ўтказилишини режалаштирди. Жумладан, иккинчи рейтинг давомида инглиз тили ва рус тили фанлари дарсларини чуқур текшириш ҳамда ўқувчиларнинг билим савиясини ўрганиб чиқиш кераклигини айтди, чунки давлатимиз сарвари ўз Паёмида ҳам айнан ушбу масалага алоҳида тўхталиб ўтган эдилар.

Йиғилишда ўқитувчилардан Баҳром Икромов, Жалолиддин Кенжаевлар сўзга чиқиб, Паём ҳақида ўз фикрларини билдиришди.

Бир сўз билан айтганда, бизнинг 9-асосий умумтаълим муассасамиз ўқитувчилари Миллат пешвоси, Тожикистон Республикаси Президенти Эмомали Раҳмоннинг Паёмини тинглагандан кейин ундан ўзларига керакли хулосаларни чиқариб олишди ва мактабимизда таълим-тарбияни янада яхши йўлга қўйиб, бор билимларини келажак ёш авлод таълим-тарбиясига бағишлайдилар. Зеро, буюк келажак бугундан бошланади.

Мирзоҳамдам АЗИЗМУРОДОВ,

Панжакент ноҳиясидаги 9-асосий умумтаълим муассасаси директори ўринбосари.