Дунё аслида саховатлилар, ўзгалар ғамини ўзиники деб билувчилар туфайли обод бўлса, ажабмас. Сахийларни Худо ҳам ўз Каломида, Пайғамбар (с.а.в.) ҳам муборак ҳадисларида мақташган. Дарҳақиқат, сахийлар мақтовга сазовор кишилар эканлигини ўз кўзларимиз билан кўриб, кузатиб келаяпмиз.

Мамлакатимизнинг олис бир гўшаси саналмиш Мурғоб ноҳияси Тоғли Бадахшон мухтор вилоятининг пурвиқор тоғ этакларида жойлашган.

Чекка бир гўшада жойлашганига қарамай, мурғобликлар мамлакат ижтимоий-иқтисодий ҳаётида фаол қатнашиб келади. Асосий машғулоти чорвачилик бўлган бу ернинг асл инсонлари ҳам мустақил Тожикистонимизнинг ҳар бир ютуғидан, тобора юксалиб бораётган Ватанимиз шону шарафидан астойдил хурсанд бўлишади. Айниқса, истиқлолият туфайли қайд қилинаётган қатор байрам арафаларида уларнинг шодликлари ортади.

Мурғобликлар бу йилги Наврўзни ҳам шодиёна билан кутиб олишди. Жойларда ушбу халқаро байрамга бағишланган чора-тадбирлар ўтказилди. Ва, албатта, ана шундай тадбирларда юқорида эслатиб ўтганимиздек, ҳукумат ҳамда саховатманд кишиларнинг аҳоли камтаъмин оилаларига кўрсатаётган меҳр-мурувватлари байрамларга янада кўрк бағишлаши турган гап.

Республика Президенти Ижроия аппарати ходимаси Олуфта Ботурова, Мурғоб ноҳияси раиси Мурзабай Жошбаев, «Бадахшонроҳ» ширкати раиси Маҳмаджон Ширинжоновлар иштирокида бўлиб ўтган Наврўзий тадбир ҳам кишилар хотирасида узоқ йиллар сақланиб қолади, шубҳасиз.  Зеро, унда байрам ўйин-кулгилари қаторида мамлакат Президенти ташаббуслари билан саховатманд кишилар ноҳиядаги Мурғоб ва Ғожа Бердибаев номли жамоатлардан 40 нафар боланинг суннат тўйлари ҳам ўтказилди ҳамда уларга эсдалик совғалар улашилди.

- Мурғоб ноҳияси гарчи олис бир гўшада жойлашган бўлса-да, ҳамиша Республика Ҳукумати диққат марказида бўлиб, бу ернинг ободлиги йўлида саъй-ҳаракатлар қилиб келинаётир. Ишончим комилки, Мурғоб келажакда энг тараққий этган ноҳияларимиздан бирига айланади, -деди Олуфта Ботурова йиғилганларни мамлакат Президенти Эмомали Раҳмон Жаноби олийлари номидан табриклар экан.

Мурғоб жамоати раиси Жамила Кенжеқулова ва Ғожа Бердибаев номли жамоат раиси Маматсали Маматумаров ҳамда бир қатор ота-оналар уларга қаратилаётган эътибору кўрсатилаётган меҳру мурувватдан бошлари кўкка етганлигини изҳор қилишди.

Ҳа,  болакайлару улар ота-оналари юзидаги табассумни кўриш қанчалик ҳузурли, ҳаловатли. Шу тобда Яратганга шукроналар айтгинг келади, кишининг.

Султан Парманов,

Мурғоб ноҳияси.