Суғд вилояти ҳудудида жойлашган олтита ҳарбий қисм аскарлари ва офицерлари «Сарбози Ватан» номли танловда ғолиб чиқиш учун беллашишди. Тожикистон Республикаси Қуролли кучларининг 23 йиллигига бағишланган мазкур танлов Чкалов шаҳрида жойлашган ҳарбий қисмлардан бирида бўлиб ўтди.

Танлов қатнашчилари унинг шартлари бўйича қўшиқ, рақс ижро этишди, ҳажвий саҳнача кўрсатишди, бадиий ўқиш маҳоратини намойиш айлашди.

Аскарлар ҳарбий маҳорат сирларини яхши ўрганаётганликлари билан бирга, бадиий ижрочилик истеъдодлари борлигини ҳам кўрсатишди.

Аскарларнинг айтишларича, улар хизмат қилаётган ҳарбий қисмларда бўш вақтни мазмунли ўтказиш учун барча имкониятлар яратиб берилган. Китоб ўқишлари, маданий ҳордиқ чиқаришлари мумкин. Айни кунларда вилоятда яшаётган шоир ва адиблар билан учрашувлар бўлиб ўтмоқда. Ана шундай учрашувлар асносида ижодкорлар аскарларга янги китоблар совға қилишган.

- Биз ҳарбий қисмлардан бирида  ўтказилган учрашувда аскарларга 40 дона китоб тақдим этдик. Аскарлар «Тожикистон нурборон мешавад» («Тожикистон ёғдуга тўлади»), Муҳаммад Ғоибнинг шеърлар тўплами, Мажид Салимнинг «Темурмалик», Дадахон Эгамзоднинг «Балогардон», Венера Қодирийнинг «Армон», шунингдек, «Ваҳобийлар гумроҳлиги» китобларини зўр қизиқиш билан қабул қилиб олишди,- дейди Тожикистон Ёзувчилар иттифоқи Суғд вилояти бўлими раиси, Тожикистон Халқ шоири Аҳмаджон Раҳматзод.

Аҳмаджон Раҳматзоднинг айтишича ижодкорларнинг ҳарбий қисмлардаги мулоқотлари давом этади. Бу мулоқотлар давомида аскар ва офицерларга 150 минг сомонийлик 10 минг дона китоб совға этиш назарда тутилган.

Ўз мухбир.