Хатлон вилояти барча ноҳияларидан дастлабки даъват этилганлар мамлакатимиз Қуролли кучлари сафига жўнатилди. Ўтган ҳафта пайшанба куни Қўрғонтепа шаҳри ҳарбий комиссариатида 100 нафар йигитнинг ҳарбий хизматга жўнатилиш тантанали маросими бўлиб ўтди. Бу тадбирда вилоят ҳокимияти раҳбарлари, ҳарбий хизматга даъват этилган ёшларнинг ота-оналари ҳамда яқинлари, уруш ва меҳнат фахрийлари, шунингдек, жамоатчилик фаоллари қатнашди.

Ватан ҳимоясига отланган ёшлар олдида Хатлон вилояти раиси ўринбосари Ражабали Ражабов чиқиш қилди.

- Қуролли кучлар сафида хизмат қилиш – ҳар бир ватанпарвар йигитнинг фуқаролик бурчи ҳисобланади, - деди вилоят раиси ўринбосари. – Бугун сизлар она-Ватан ҳимоясига бел боғлаган экансиз, ҳаётларингда яна бир масъулиятли давр бошланганлигини чуқур ҳис қилишларинг лозим. Сиз ҳимоячи ва жангчи бўласиз. Бу мард киши учун жуда юксак ифтихордир. Ҳамиша яхши хислатларинг билан ажралиб туринглар. Чунки Хатлон вилояти қадимдан ҳарбий-ватанпарварлик ва оммавий-мудофаа соҳасида ўзига хос анъаналари билан ажралиб туради.

Дарҳақиқат, қонларида ватанпарварлик ҳисси жўш урган фарзандлари бор юртнинг ҳимояси ишончли қўлларда бўлади.

-Баҳорги даъват дастлабки куни вилоятнинг Сарбанд шаҳри ва Носир Хисрав ноҳиялари ҳарбий комиссариатлари режани бажарганликлари ҳақида маълумот берди, - деди Ражабали Ражабов. – Бу ташаббус олқишлашга арзийди. Ишончимиз комилки, хатлонлик ёшлар орасида ҳарбий хизматга ихтиёрий отланганлар сафи кенгаяверади. Давлатимиз чегаралари мустаҳкам бўлиши, юртимиз осмонининг софлиги бугун Ватан ҳимояси масъулиятини зиммаларига олган йигитларимизнинг фуқаролик ҳамда фарзандлик бурчларидир.  

Тантанали маросимда даъват этилганларга вилоят ҳокимиятининг эсдалик совғалари топширилди. Тадбир давомида Ёшлар, спорт ва сайёҳлик комитетининг вилоят бошқармаси турли спорт мусобақаларини ташкил этди. Бундан ташқари, йиғилганларга концерт дастури тақдим этилди.

Хатлон вилояти раиси ўринбосари Ражабали Ражабов Қўрғонтепа шаҳар ҳарбий комиссариати иши билан атрофлича танишди.

Шунингдек, баҳорги даъватнинг биринчи куни Кўлоб, Восе, Қумсангир, Ж. Румий ва бошқа бир қатор шаҳру ноҳиялар ҳарбий комиссариатларида ҳам ихтиёрийларни ҳарбий хизматга жўнатиш тантанали маросими бўлиб ўтди. Энг асосийси, Ватан ҳимоясига отланган бу ёшларда ватанпарварлик ҳисси юқори эканлиги намоён бўлиб турарди.

М. ИСКАНДАР.