- Муҳтарам Президентимиз Эмомали Раҳмоннинг мамлакат парламентига йўллаган Паёмини республикамиз меҳнаткашлари қаторида Рўдакий ноҳияси марказида жойлашган, бизнинг Сомониён шаҳарчаси аҳолиси ҳам жуда катта қизиқиш билан кутиб олишди.

Аҳолининг турли табақалари орасида илиқ гап-сўзларга сабаб бўлаётган Паём чиндан ҳам барчамиз учун маёқ вазифасини ўтаб, Ватан ободлиги учун келажакда амалга оширишимиз лозим бўлган вазифаларимизни белгилаб берадиган асосий ҳужжат саналади.

Давлат сарварининг бу йилги Паёмида барча соҳалар қаторида хотин-қизлар, ёшлар масаласига алоҳида эътибор беришлари ва уларни миллат келажаги яратувчилари, деб аташлари бу борада берилган юксак баҳо дейиш мумкин. Айниқса, Президентимизнинг жорий  2015 йилни Оила йили, деб эълон қилишлари барчамиз учун янгилик бўлди, десам хато бўлмас. Зотан, давлат келажаги мустаҳкам оила тарбиясига жуда-жуда боғлиқ.

Чинданам келажак фарзандларини таваллуд этиб, вояга етказувчилар булар - хотин-қизларимиздир. Улар соғлому маърифатли бўлсалар, албатта, келажак фарзандлари ҳам соғлому юксак маърифат эгалари бўлиб улғайдилар.

Бугунги глобаллашув даврида эркаклар билан баб-баравар рўзғор юкини тортаётган, тўрт танга топиш илинжида олис юртларга бориб ишлаётган, йиллаб фарзандлари дийдорига муштоқ бўлиб юрган аёлларимизга ғамхўрлик навбатдаги Паёмнинг асосий нуқталаридан бири бўлганлиги барчамизга қувонч улашди, албатта.

Бундан ташқари Ҳукуматимизнинг гендерлик бўйича олиб бораётган сиёсати натижаси ўлароқ хотин-қизларимизнинг юқори мансаб-вазифаларга тайинланишлари, шунингдек, уларнинг жамиятимиз барча соҳаларидаги иштироклари тобора ортиб бораётганлигини ҳам ўз мавридида эслатиб ўтмоқчиман.

Мамлакат Президенти Эмомали Раҳмон Жаноби олийлари ташаббуслари билан Тожикистон Ҳукуматининг «Фарзандлар таълим-тарбиясида ота-оналар масъулияти ҳақида»ги Қонуни илму маориф соҳасида жиддий ўзгаришларга, фарзандлари тарбиясига панжа орасидан қараб келаётган баъзи ота-оналарнинг жигарбандлари билим савияси, равишу рафторига эътибор қаратишларига сабаб бўлган эди.

Бу йилги Паёмда Президентимизнинг болалар тарбияси ва уларнинг жамиятда муносиб ўсиб-улғайишлари учун қайғуришлари оқибатида Болалар ҳуқуқига доир ваколатдор вазифаси таъсис этиш борасидаги фармойишлари ҳам, айни муддао бўлди деб ўйлайман. Зеро, оила фарзандлар билан обод, оила обод бўлса, юрт ҳам обод бўлади.

Ҳа, шундай. Модомики, Тожикистон Ҳукумати ва унинг Раиси жамиятнинг асосий ячейкаси саналмиш  оилага алоҳида эътибор берар экан, юрт келажаги ободлигига тобора ишонч ортиб бораверади!..

Дилором Қаландарова,

Рўдакий ноҳияси, Сомониён шаҳарчаси раиси аппарати бошлиғи.