Тиббиёт ва табиблар эъзозланган жамият баркамол, келажаги буюк шахслар эътиборида узоқ яшайди.Табобот илмининг бобокалони Абу Али ибн Сино ва унинг устози Абу Бакр Муҳаммад Закариё, нафақат, Шарқ, балки дунё тиббиётининг асосчиларидан ҳисобланади. Ибн Синодан мерос қолган тиббий билим башариятнинг абадий таълимотига айланиб бўлган. Алломанинг инсон саломатлиги учун яратган дори-дармонлари орасида ноннинг  ҳам муҳим

шифобахш хусусиятлари ҳақидаги тавсиялари алоҳида аҳамиятга эга.

Шу ўринда тош тегирмон унидан тайёрланган ноннинг кўпгина касалликларни даволашдаги хусусиятлари ҳақидаги кексаларимизнинг тажрибаси билан ўртоқлашсак, фойдадан холи бўлмас.

Қўрғонтепалик 78 ёшли Момогул момонинг буғдой нони дориворлиги ҳақидаги фикрлари бунинг исботидир:

Милклар қочиб, тишлар бўшашганда қаттиқ нонни чайнаш айни муддао экан.

Йирингли ярага қаттиқ нон билан бирга қўй ёғидан олинган жиззани янчиб қўйилса, яра тез етилиб, ёрилади.

Сариқ касалига чалинган одамлар анор шарбатига ивитилган қаттиқ нон ейишлари керак.

Ошқозон бузилиб, ич кетса ёки ичбуруғ касалига чалинганлар кунига уч маҳал қаттиқ нон еб, орқасидан бир пиёла қатиқ ичса, касаллик тезда тўхтайди. Ёки қаттиқ нон талқонини қатиққа аралаштириб, истеъмол этиш зарур. Бу ичбуруғнинг зарарсиз давоси ҳисобланади. Яна тандирдан узилиб, офтобда қуритилган обинон ич ўтганда ва ҳатто, қон аралаш ич кетиш каби юқумли касалликка шифо бағишлайди.

Кўнгил айниб, еганини қайтариш даражасидаги ва ошқозонида ачишиш пайдо бўлган беморларга буғдой нонини тоза асалга ботириб ейиш тавсия қилинади.

Қотган ноннинг сигир сутига ивитилгани ошқозон ва ичак яллиғланиши, шунингдек, пешоб йўлининг ачишиш касалликларига даво ҳисобланади.

Аёлларнинг кўнгли беҳузур бўлган вақтда қайнатиб совитилган сувга нон тўғраб, сўнгра суви докадан ўтказилиб ичилса, дарддан тез фориғ бўлиши таъкидланади.

Нонни туз билан янчиб, сувда ҳўллаб, темираткига суртилса, доғлар тез тарқалади.

Қон босими ошиб, асаблар изтиробга тушса, хамиртурушни илиқ сувда эритиб ичиш яхши натижа беради.

Гўшт қиймаси ёки жизза қўшиб тайёрланган нон-патирдан тўйиб еган кишининг қуввати ошади.

Ҳайтали Боев тайёрлади.