Тожикистонда умр ўртача давомийлиги 73 йилдан бироз ошади. Бу ҳақда 27 июл куни бўлиб ўтган матбуот анжуманида Тожикистон Республикаси Президенти қошидаги Статистика агентлиги директори Гулнора Ҳасанзода маълум қилди.

Унинг сўзларига кўра, айни пайтда юртимизда ёши 100дан ошган 80 киши истиқомат қилади. Шундан 50 нафарини аёллар, 30 нафарини эркаклар ташкил

қилади.

Статистика агентлигининг демография ва аҳоли бандлиги бошқармаси бошлиғи Абдували Қулов мамлакатда сўнгги йилларда аҳоли умри ўртача давомийлиги бир-икки йилга ошганини айтди. «Бунинг устига, эркакларда ўртача яшаш давомийлиги 69 ёшни ташкил қилади. Аёллар эса, узоқроқ – 74 ёшдан кўпроқ яшайдилар»,- деди Абдували Қулов.

Унинг сўзларига кўра, мамлакат аҳолиси сони жорий йил 1 июл ҳолати бўйича 8 миллион 829 минг кишини ташкил қилган.

Гулнора Ҳасанзоданинг таъкидлашича, Бутунжаҳон банкининг қўллаб-қувватловида ўтказилган Статистика агентлигининг тадқиқотига биноан, Тожикистонда жорий йилда камбағаллик сатҳи 30 фоизни ташкил қилган.

«2017 йил учун камбағаллик сатҳи шундай даражада белгиланган: агар одам ўз ойлик маошининг 75 фоизини озиқ-овқат учун сарфласа, унда у камбағал ҳисобланади», - деди Статистика агентлиги директори.

Маълум бўлишича, жорий йилнинг олти ойи мобайнида республика хўжаликлари барча тоифаларида 624 минг 315 тонна ғалла, 142 минг 62 тонна картошка, 567 минг 33 тонна сабзавот, 171 минг 155 тонна полиз маҳсулотлари, 77 минг 342 тонна мева ва 1564 тонна узум етиштирилган. Бу ўтган йилнинг шу даврига нисбатан ғалла 6,4 фоиз, сабзавотлар 17,9 фоиз, полиз экинлари қарийб 11, мевалар 11 фоизга кўп. Картошка етиштириш ҳажми эса, ўтган йилга нисбатан қарийб 22 фоизга камайган.

-Картошка ҳосилининг кам бўлишига об-ҳавонинг ноқулай келгани, экин майдонларининг камайгани сабаб бўлган,- деди Статистика агентлиги директори.

Гулнора Ҳасанзода журналистларнинг саволларига жавобан ҳисобот даврида статистика органлари томонидан учта бир марталик статистик тадқиқот, жумладан, «Тожикистон Республикасида иш кучи», «Тожикистон Республикасида сувдан фойдаланувчилар» ва «Тожикистон Республикасида савдо обороти» тадқиқоти ўтказилгани ҳақида хабар берди.

2017 йилнинг январ-июн ойларида ФҲДЁ органлари томонидан қонунда белгиланган муддатда таваллуд қилганлар сони 106,5 минг киши ва ўлим ҳолати 17,2 мингни ташкил қилган. Шундан бир минг нафари 1 ёшгача бўлган болалардир. Туғилиш ва ўлим ҳолатлари умумий коэффициенти дастлабки баҳолашга кўра, ҳар 1000 аҳолига 24,4 ва 3,9ни ташкил қилди.

Г. Аюпова, «Халқ овози».