-Давлат ҳокимияти Душанбе шаҳар ижроия органи фаолият йўналишларининг бири саноат соҳасини тараққий эттириш ҳисобланади, - деди Душанбе шаҳри раиси биринчи ўринбосари Маҳмадсаид Зувайдзода шаҳарнинг жорий йил олти ойлик фаолиятига бағишланган матбуот конференциясида. – Ҳисобот даврида турли шаклдаги 463та саноат корхоналари томонидан, тадбиркорлик субъектларини ҳисобга олган ҳолда, саноат маҳсулотларини ишлаб

чиқариш ҳажми 750 миллион 300 минг сомонийга етказилди. Бу кўрсаткичнинг ўсиш суръати ўтган йилнинг шу даврига нисбатан 3,5 фоизга кўп демакдир.

Бу давр мобайнида шаҳарда 24та ишлаб чиқариш корхона-ю цехлари 112та янги иш ўринлари яратиш билан иш бошлагани давлат ҳокимияти Душанбе шаҳар ижроия органи томонидан аҳоли бандлигини таъминлаш ва янги иш ўринлари яратиш борасида олиб бораётган ишлари самараси сифатида баҳоланди.

Матбуот конференцияси давомида, шунингдек, давлат мустақиллиги байрамини юқори даражада нишонлаш мақсадида пойтахт иншоотларини таъмирлаш ва уларни янги замон талабларига жавоб берадиган қилиб реконструкция  қилиш борасида Рўдакий хиёбони, Айний ва Аҳмади Дониш кўчаларидаги маъмурий ва турар жой биноларини бўяш ишлари давом этаётганлиги айтиб ўтилди. 

Шунингдек, пойтахт инфратузилмасини шаҳар меъёрларига мувофиқлаштириш, шаҳар ичидаги,  хиёбонлару маҳаллалардаги йўллар таъмири ва реконструкцияси ишларини тезлаштириш, кўприклар ва ер ости йўллари қуриш борасида саховатли тадбиркорларни жалб этган ҳолда, жами 26 километр 800 метр масофадаги йўллар 207 минг 918 метр квадрат майдонда таъмирлангани ва асфалт ётқизилгани таъкидланди.

Душанбе шаҳри раиси биринчи ўринбосари Маҳмадсаид Зувайдзоданинг сўзларига кўра, жорий йилнинг биринчи ярмида тадбиркорлар томонидан 38 минг 242 метр квадрат майдондаги турар жойлар қурилиб, фойдаланишга топширилган.

-Транспорт соҳасида хизмат кўрсатишни янада яхшилаш ва шаҳар аҳолиси ҳамда меҳмонлари талабларини қондириш мақсадида жорий йилнинг апрел ойида Туркия Республикасидан 40та замонавий турдаги автобуслар келтирилди, -деди М.Зувайдзода.  – Шунингдек, Душанбе шаҳар раисининг тегишли қарори ва Туркия Республикаси автомобил корхоналари билан бўлган икки томонлама шартнома асосида  қўшимча 24та автобуслар харид қилиниб, улардан бештаси жорий йилнинг 10 июл кунигача шаҳарга етказиб келинди ва қолганлари яқин кунларда келтирилади.

Тантана, анъана ва миллий урф-одатларни тартибга солиш борасида Душанбе шаҳрида 1 минг 86та  жамият комиссиялари фаолият юритаётганликлари ҳамда шаҳарнинг бешта мувофиқлаштирувчи комиссиялари билан биргаликда Тожикистон Республикасининг «Тожикистон Республикасида тантаналар, анъаналар ва миллий урф-одатларни тартибга солиш тўғрисида»ги қонунининг асосий мазмун-моҳиятини аҳоли ўртасида тушунтириш билан машғул эканликлари таъкидланди.

Умуман, мазкур комиссиялар томонидан ҳуқуқни ҳимоя қилиш органлари билан ўтказилган  муштарак рейдлар вақтида 81та қонунбузарлик ҳолатлари ошкор этилиб, 43 нафарга нисбатан Тожикистон Республикаси Маъмурий ҳуқуқбузарликлар кодексининг талабларига мувофиқ, 212 минг 700 сомоний миқдоридаги маъмурий жазолар қўлланилган.

Матбуот конференцияси сўнгида шаҳарда олиб борилаётган ободонлаштириш ва бунёдкорлик ишлари, аҳолини қийнаётган баъзи муаммо ва камчиликлар, келгусидаги режалар борасида кенг доирадаги савол-жавоб бўлиб ўтди.

Зуҳриддан УМАРОВ, «Халқ овози».