- 2016 йилнинг биринчи ярмида банк хазинасига 6,9 миллиард сомоний маблағ келиб тушган. Жумладан, 1,5 миллиард сомоний солиқ ва мажбурий тўловлар воситасида ҳуқуқий ва жисмоний шахслар томонидан қабул қилиниб, республика ҳамда маҳаллий бюджетлар ҳисобига ўтказилган,- деди Тожикистон Республикаси «Амонатбонк» давлат омонат банки раиси Руҳулло Ҳакимзода жорий йил биринчи ярмига бағишлаб ўтказилган матбуот конференциясида.

Тожикистон Республикаси «Амонатбонк» давлат омонат банки мажбурий тўловлар ва солиқлардан ташқари мамлакат бошқа банклари ва аҳолига  қарз маблағлари ҳам тасвия этиб келади. Шу масалага тўхталган Р. Ҳакимзода банк биринчи ярим йилликда ички ва хорижий маблағлар ҳисобидан 8 минг нафардан ортиқ кишига умумий миқдори 553,8 миллион сомоний қарз берганлиги, шу билан бирга, жорий йил олти ойи давомида маҳаллий банкларни қўллаб-қувватлаш, уларнинг тўлов ҳолатини мўътадил ҳолатда сақлаб туриш мақсадида 21 миллион сомонийлик банклараро қарзлар тавсия этганлигини таъкидлади.

Матбуот конференцияси давомида банк томонидан мамлакат иқтисодиётининг афзалиятли соҳаларига қарзлар ажратиш борасида ҳам тўхталиб ўтилиб, олти ой давомида саноат соҳасига 22,8 фоиз, қишлоқ хўжалиги 22 фоиз, ишлаб чиқариш 7,3 фоиз, қурилиш 18,8 фоиз, тижорат 15,5 фоиз, транспорт 12,3 фоиз ва хизмат кўрсатиш соҳасига 1,3 фоиз қарз ажратилгани маълум қилинди.

Мамлакатдаги давлат ва хусусий корхоналар ходимлари ойлик маошларини пластик карталар орқали тўлаш ҳам юртимиздаги банкларнинг асосий иш фаолиятига айланиб, банк ходимлари ва ишчиларнинг мушкулини осон қилмоқда. Шу боисдан ҳам, жорий йилнинг олти ойи давомида «Амонатбонк» турли корхона-ю ташкилотларда тушунтириш ишлари олиб бориб, 6379та бюджет ва ғайрибюджет корхоналар билан «Иш ҳақи» лойиҳасига ўтказиш бўйича ҳамкорликларни йўлга қўйган. Бу эса, ўтган 2015 йилнинг шу даврига нисбатан 1057 адад ёки 20 фоизга кўп деганидир. Банкнинг пластик карталарига эга кишилар сони эса, 1 миллион нафардан ортиб улгурган.

Тинчлик ва миллий бирлик асосчиси – Миллат пешвоси, Тожикистон Президенти муҳтарам Эмомали Раҳмон ўзининг ҳар бир чиқишида мамлакат банклари ходимлари сонини аёллар ҳисобидан ошириш борасида тегишли кўрсатмалар бериб келади. Шу мақсадда, Тожикистон Республикаси «Амонатбонк» давлат омонат банки ҳам 35 нафар қиз, шулардан 15 нафарини танлов асосида ишга қабул қилган.

Бундан ташқари, банк тузилмалари бошлиқлари вазифасида фаолият юритаётган аёллар сони 81 нафар, бош ҳисобчи ўринбосарлари 30 нафар, касса бошлиқлари 15 нафар ва банк хизмат кўрсатиш марказларидаги аёллар сони эса, 146 нафарни ташкил этади.

Тожикистон Республикаси давлат мустақиллигининг 25 йиллигига тайёргарлик ва уни муносиб совғалар билан кутиб олиш борасидаги олиб борилаётган ишлар хусусида тўхталган Тожикистон Республикаси «Амонатбонк» давлат омонат банки раиси Руҳулло Ҳакимзода шундай деди:

- Халқимиз учун энг муқаддас байрамлардан саналган мустақилликнинг 25 йиллик юбилейини муносиб кутиб олиш мақсадида  айни пайтда бир қатор ишлар амалга оширилмоқда. Жумладан, Хуросон ноҳиясидаги «Амонатбонк» янги замонавий биноси қурилиши охирига етказилиб, Шамсиддин Шоҳин ва Шаҳринав ноҳияларидаги бошқа байрам иншоотлари қурилиши давом этмоқда.

Матбуот конференцияси сўнгида журналистлар ўзларини қизиқтирган саволларга аниқ жавоблар олишди.

Нарзулло НУРБОБОЕВ, «Халқ овози».