– Санобод  ГЭСи 100-125  мегаватга баробар бўлиб, одатда  ҳар 1 мегаватнинг қурилиш ишлари учун 1 миллион, кўп ҳолларда эса, 1,5 миллион АҚШ доллари лозим бўлади. Биз Санободнинг қурилиш ишлари учун қанча маблағ лозимлигини тахминан биламиз, аммо аниқ маълумотлар олиш учун қурилишнинг техник жиҳатини эътиборга олишга мажбурмиз, - деди Тожикистон Республикаси Энергетика ва сув захиралари вазири Усмонали Усмонзода жорий йилнинг олти ойлик якунига бағишланган матбуот конференциясида.

Усмонали Усмонзода Бадахшонда табиий офат рўй берган жойларга қилган сафари юзасидан сўзлаб, жумладан, шундай деди:

– “Помир Энержи” ходимларидан беҳад миннатдормиз. Улар  табиий офатнинг нохуш оқибатларини бартараф этиш учун суткада 18 соат ишлаб, астойдил меҳнат қилдилар.

Ҳисоботдан маълум бўлишича, 2015 йилнинг биринчи ярим йиллигида 8 миллиард 658 миллион кВт. соат миқдорида электр энергияси ишлаб чиқарилган бўлиб, бу ўтган йилнинг шу даврига нисбатан 470,3 миллион кВт. соат ёки 5,7 фоиз кўпдир. Жумладан:

- “Барқи Тожик” ширкати 7 миллиард 210 миллион кВт. соат электр энергияси ишлаб чиқарган бўлиб, бу ўтган йилнинг шу даврига нисбатан 406,5 миллион кВт. соат ёки 6 фоиз  миқдорида кўпдир;

- “Сангтўда-1” ГЭСи 993, 2 миллион кВт. соат электр энергияси ишлаб чиқарган бўлиб, бу ўтган йилнинг шу даврига нисбатан 14,3 миллион кВт. соат ёки 1,4  фоиз камдир;

- “Сангтўда-2” ГЭСи 360,4 миллион кВт. соат электр энергияси ишлаб чиқарган бўлиб, бу ўтган йилнинг шу даврига нисбатан 78,7 миллион кВт. соат ёки 27,9 фоиз зиёддир.

Ҳисобот даврида экспорт қилинган электр энергиясининг умумий ҳажми 546,4 миллион  кВт. соатни ташкил этади, жумладан, Афғонистон Ислом Республикасига 504 миллион кВт. соат, Қирғизистон Республикасига 40,3 миллион кВт. соатни ташкил этиб, бу ўтган йилнинг шу даврига нисбатан 47,9 миллион кВт. соат ёки 9,4 фоиз кўпдир.

Ўз.мухбир.