Ёвон ноҳиясида чорвачилик халқ хӯжалиги муҳим тармоқларидан бири ҳисобланади. Айни пайтда йирик шохли моллар парвариши билан машғул хӯжаликлар еттитага етди.

«Баракат» ёпиқ ҳиссадорлик жамияти ноҳиянинг йирик хӯжаликларидан бири ҳисобланиб, бу ерда 934 бошдан ортиқ «Зебушведий» зотли қорамол парвариш қилинмоқда.

           Жумладан, хӯжалик чорвасининг 334 таси соғиладиган сигирдир. Янги зотли чорвани хӯжаликнинг ӯзида сунъий равишда қочириш йӯлга қӯйилган. Хӯжалик аъзолари ва мутахассисларнинг самарали фаолияти натижасида, ҳозир бу ерда 337 та бузоқ зоотехник талаблар даражасида парвариш қилинмоқда.

Суратларда «Баракат» хӯжалиги чорвадорлари фаолиятидан лаҳзалар акс эттирилган

- Хӯжалигимиз Душанбе шаҳри сутни қайта ишлаш корхонаси билан шартнома тузган, - дейди суҳбатда хӯжалик сарвари Шавкат Муқимов. – Мазкур шартнома асосида хӯжалигимиздан комбинатга ҳар куни 3 минг литргача сут жӯнатамиз. Фақатгина ӯтган ойда хӯжалигимиз сут соғувчилари сигирлардан 85 минг литрдан ортиқ сут соғиб олишди. Бу кӯрсаткич ӯтган йилнинг шу даврига нисбатан 2 минг литр ортиқдир.

Дарҳақиқат, қайд этиб ӯтилган рақамларга назар солинса, хӯжаликда чорва парвариши зоотехник қоидалар асосида йӯлга қӯйилганлигига ишонч ҳосил бӯлади.

Ӯтган йили хӯжалик ҳисобидаги ерлардан 1300 тонна ҳӯл беда, 680 тонна силос, 22 тонна кунжара, 20 тонна аралаш ем тайёрланиб, қиш мавсумида чорва парвариши учун қулай имкониятлар яратилганди. Чорва учун тайёрланган озиқалар қишни талафотсиз ӯтказиш омили бӯлиб хизмат қилди. Хӯжалик чорвадорлари жорий йилда ҳам қиш мавсумига атрофлича тайёргарлик кӯриш учун ҳозирданоқ замина яратмоқдалар.

Ӯлкамиз баҳор остонасида турибди. «Баракат» хӯжалиги чорвадорлари баҳорда сут соғиб олишни янада кӯпайтиришни режалаштирганлар.

М. ҲОМИЛОВ, Ёвон ноҳияси