Хўжанддаги Спорт саройида очилган «Суғд-2018» Бешинчи халқаро савдо ярмаркасига тўхтовсиз келиб турган кишилар бу ерда Тожикистонда ишлаб чиқарилаётган маҳсулотлар билан бирга, қўшни Ўзбекистондан келган тадбиркорлар кўргазмаларини астойдил кўздан кечиришди.

Анъанага айланган ва иштирокчилари йил сайин кўпайиб бораётган ярмаркада Ўзбекистондан ташқари Россия, Қозоғистон, Бирлашган Араб

Амирликлари, Қирғизистон каби қатор давлатлардан келган маҳсулот ишлаб чиқарувчилар қатнашишди. Лекин ярмарка ташкилотчиларининг билдиришларича, бу гал энг кўп иштирокчи қўшни Ўзбекистондан келган.

- Мен ўтган йили Душанбеда ўтказилган Ўзбекистон товарлари кўргазмасида қатнашгандим. Хўжанддаги халқаро ярмаркада биринчи марта қатнашяпман. Тожикистонда биз билан ҳамкорлик қилиш истагида бўлган шериклар пайдо бўлганидан хурсандмиз, - деди Намангандаги «Истиқлол Дизайн Маркази» очиқ ҳиссадорлик жамияти вакили Акром Каримов.

«Истиқлол Дизайн Маркази» Хўжандга, асосан, «Идеал» бренди – тамғаси билан ишлаб чиқарилаётган маҳсулотлар олиб келган. Мазкур бренд остидаги костюм-шимлар, кўйлаклар, спорт кийимларини қизиқиб кўраётган ва сотиб олаётган одамлар кўп бўлди.

Энг сифатли матолардан тикилаётган кийимлар дунёнинг ўттиздан ортиқ мамлакатида сотилаётган экан. Марказ вакилларининг айтишларича, маҳсулот сифатининг юқори бўлишида Германия, Италия, Япония каби мамлакатлардан келтирилган замонавий жиҳоз ва мосламаларнинг ўрни катта бўлаётган экан.

Тошкентдаги «Minimaх Elegans» очиқ ҳиссадорлик жамияти кўргазмага келтирган болалар кийимлари Туркия ё бошқа бирор илғор мамлакатда ишлаб чиқарилган маҳсулотлардан асло қолишмайди. Лекин нархи анча арзон.

- Фақат мен эмас, балки ўзбекистонлик жуда кўп тадбиркорлар Тожикистон ва Ўзбекистон ўртасида виза тартибига киритилган енгилликлардан хурсандмиз. Қўшни-қўшнининг бозори, дейдилар. Тўғри, маҳсулотларимизга бошқа мамлакатларда ҳам харидор кўп. Лекин биринчи навбатда, энг яқин қўшни бозорига маҳсулот чиқаришдан хурсандмиз, - деди «Minimaх Elegans» очиқ ҳиссадорлик жамияти вакили Мираброр Баҳодирхўжаев.

Ярмарка шарофати билан тожикистонлик тадбиркорлар ҳам хорижий мамлакатлардан янги шериклар топишга муваффақ бўлишди. Бу галги ярмаркада тожикистонликлар енгил саноат, озиқ-овқат маҳсулотлари билан бирга, металл саноати, халқ ҳунармандчилиги буюмларини ҳам намойиш этишди.

Суғд вилояти раиси Ражаббой Аҳмадзода халқаро ярмарканинг очилиш маросимида сўзлар экан, кейинги уч йилда вилоятда саноат маҳсулотлари ишлаб чиқариш кўлами икки баравар кўпайганини таъкидлади. Ўтган – 2017 йилда вилоятда 1 миллиард АҚШ долларига тенг саноат маҳсулотлари ишлаб чиқарилган.

Айниқса, кейинги бир йил давомида қўшни Ўзбекистон билан савдо-сотиқ кескин ривожланган. Жумладан, Ўзбекистонда Суғд вилоятида ишлаб чиқарилаётган цементга бўлган талабот ортиб бормоқда. Айни бир пайтда Суғд вилояти бозорларида Ўзбекистонда ишлаб чиқарилаётган маҳсулотлар тобора кўпаймоқда.

Ўзбекистон Республикаси Савдо ва саноат палатасининг Тошкент вилояти бўлими бошлиғи Дилшод Менглиев ҳам икки қўшни мамлакат ўртасидаги иқтисодий муносабатлар тобора ривожланаётгани, савдо-сотиқ авж олаётганини айтди.

Россия Федерацияси Савдо ва саноат палатаси қошидаги Тожикистон билан ҳамкорлик кенгаши раиси Сергей Ключарев эса, «Суғд-2018» халқаро ярмаркасининг аҳамияти ҳақида сўзлар экан, тожикистонлик саноатчилар, тадбиркорларнинг энг яхши ва ишончли шерик эканликларини таъкидлаб ўтди.

Икки кун давом этган халқаро ярмаркада Тожикистоннинг турли минтақалари ва хориждан келган 200дан ортиқ ширкат маҳсулотлари намойиш этилди.

Ярмарка давомида бошқа тадбирлар билан бирга, «Суғд вилояти сайёҳлик иқтидори ва имкониятлари» мавзусида форум ўтказилди.

Ўз мухбир.