Аксарият журналистларнинг қишлоқ хўжалиги экинларини зарарли ҳашаротлардан ҳимоя қилиш усуллари ва шу бўйича амалга оширилаётган чора-тадбирлар ҳақидаги саволларига мамлакат Қишлоқ хўжалиги вазири И.Сатторий қуйидагича жавоб берди:

 -Ҳақиқатдан ҳам, қишлоқ хўжалиги экинларидан юқори ҳосил олиш омилларидан бири - турли хил касалликлардан ҳимоя қилиш ҳисобланади.

Сўнгги йилларда ноқулай об-ҳаво шароити ва бошқа сабабларга кўра, экин майдонларимизда зарарли ҳашаротларнинг кўпайганлиги аянчли ҳолдир. Жорий йилнинг бошида вазиятни бартараф қилиш мақсадида вазирлик қошида Қишлоқ хўжалик экинларини зарарли ҳашоротлардан ҳимоя қилиш комиссияси ташкил этилиб, бу гуруҳ жойларда семинар ва амалий машғулотлар ўтказди. Қишлоқ хўжалиги Фанлар академияси билан ҳамкорликда экин майдонлари ва боғу токзорларни зарарли ҳашаротлардан сақлаш ишлари бўйича қўшимча чора-тадбирлар кўрилди. Жумладан, 96 219 гектар экин майдонларида чигиртка ва бошқа зараркунандаларга қарши химиявий усуллар асосида кураш ишлари олиб борилди. Бу ишни амалга оширишда халқаро ташкилотлар ҳамкорлиги, хусусан, Япониянинг шу соҳа бўйича мутахассислари билан биргаликда «Чигирткага қарши экспедиция» ташкил этилиб, дори сепиш ускуналари билан жиҳозланган 19та «Тайота» русумли автомашина, 5та  МТЗ-82 русумли трактор, қир-адирлардаги ғаллаларни ювиш мақсадида 37та мотоцикл республика хўжаликларига тақсимланди. Ана шу  амалий топшириқлар натижасида дастлабки 6 ойликда 47084 гектар ғалла, 7090 гектар маккажўхори, 86 гектар нўхот, 7240 гектар сабзавот, 363 гектар картошка, 7496 гектар полиз экинлари, 12215 гектар боғ, 12912 гектар узумзор, 30590 гектар пахта, 283 115 гектар чорвачилик озуқаси майдонларида 127 4 миллион сомонийлик зарарли ҳашоротларга қарши кураш ишлари амалга оширилди.

Республикамиз бозорларидаги картошка нархининг баландлиги ҳақидаги саволга вазир атрофлича жавоб бериб, Тоғли Мастчоҳ, Мўминобод ва Ғарм минтақасида янги ҳосил йиғиштира бошланганлигини айтиб, аллақачон, дастлабки маҳсулотлар бозорларга чиқариш арафасида эканлиги ҳақида маълумот берди.

Вазирнинг хабар беришича, қишлоқ хўжалиги маҳсулотлари ярмаркаларининг тез-тез  ташкил этилиши шаҳар ва  ноҳия марказларида бу маҳсулотларнинг нархи арзонлашувига анча ёрдам бермоқда, шунингдек, Тожикистон Ҳукумати дастурлари асосида пойтахт ва унинг ноҳияларидаги «Меҳргон», «Сада» ва бошқа байрамлар арафасида ярмаркалар ташкил  қилиниб, 1582 тонна қишлоқ хўжалик маҳсулотлари бозордан 30-40 фоиз арзон нархда аҳолига тақдим этилганлиги айтиб ўтилди.

Ердан самарали фойдаланиш мақсадида 55943  гектар майдонга такрорий экинлар экилди. Бу жорий йилнинг 1 июлигача бўлган маълумот, йиллик дастурнинг 75 фоизини ташкил этади.

Чет мамлакатлар билан ҳамкорликлар ҳақидаги саволга қишлоқ хўжалик вазирлигининг 17-19 май кунлари Белорус Республикасининг пойтахти Минск шаҳрида ҳукуматлараро биринчи йиғилиш ўтказилиб, икки давлат қишлоқ хўжалик вазирликлари ўртасида 2017-2018 йилларда ўзаро ҳамкорлик  протоколи имзолангани маълум қилинди. Шунингдек, ҳисобот даврида Қувайт давлати, Латвия Республикаси ҳамда Тайванд қишлоқ хўжалиги вазирликлари билан  ўзаро манфаатли ҳужжатлар имзоланганлиги ҳақида ахборот берилди.

Шу кунларда қишлоқ хўжалиги соҳасига оид 3та ташқи инвестиция лойиҳаси, «2012-2020 йилларда қишлоқ хўжалигини ислоҳ қилиш» дастури замирида 4697 миллион сомонийлик амалий ишлардан 1 июлгача 1269 миллион сомонийлиги ўзлаштирилганлиги бу соҳа тараққиётига катта ҳисса қўшади.

Вазирлик мутахассислари журналистларни қизиқтирган бошқа саволларга ҳам атрофлича жавоб беришди.

Ҳайтали БОЕВ,

«Халқ овози».