Тожикистон Республикаси Ер бошқаруви ва геодезия давлат комитети ўзининг ўтган – 2016 йилги фаолияти якунларига бағишланган матбуот анжуманини ўтказди. Унда комитет раиси Ражаббой Аҳмадзода иштирок этиб, комитет фаолияти ҳақида журналистларга маълумот берди.

- Тожикистон Республикаси Ер бошқаруви ва геодезия давлат комитети мутахассислари ўтган йили  республиканинг барча шаҳру ноҳияларида

  кузги ва эртачи сабзавотлар, пахта, картошка, шунингдек, такрорий экинларни назорат ўлчовидан ўтказдилар. Назорат ўлчов натижаларига кўра, 224618 гектар майдонга, ундан  97347 гектарига суғориладиган кузги зироат, 160596 гектарга пахта, 20699 гектарга картошка ва 69852 гектар майдонга, улардан 69746 гектар суғориладиган майдонга такрорий экин экилган,-деди комитет раиси.

Унинг сўзларига кўра, ўтказилган текширувлар  2016 йил давомида 12830 гектар майдон, шундан 10247 гектари сувли ер бўлиб,  қишлоқ хўжалиги айланмасидан четда қолганлигини аниқлаган. Бундан ташқари, 9181 гектар ернинг мелиоратив ҳолати ёмонлиги ҳамда 3649 гектар ерларда ўтказилган хўжалик ишларининг қониқарли эмаслиги боис, қишлоқ хўжалиги айланмасидан четда қолган.

 Шунингдек, матбуот анжумани давомида Тожикистон Республикаси Президентининг «Янгидан ташкиллаштириш ва қишлоқ хўжалик ташкилотларини ислоҳ қилишга оид қўшимча тадбирлар тўғрисида»ги фармонини амалга татбиқ этиш борасида 2017 йилнинг 1 январига қадар республика бўйлаб, деҳқон хўжаликлари умумий сони 174 минг 837тани ташкил этиб, улар Ердан фойдаланиш учун сертификат ва Ер гувоҳномаси билан таъминланганликлари маълум қилинди.

Матбуот конференцияси сўнгида журналистлар ўзларини қизиқтирган саволларга атрофлича жавоб олдилар.

Э. Шукуров,

«Халқ овози».