Тинчлик ва  миллий бирлик асосчиси – Миллат пешвоси,  Тожикистон   Республикаси Президенти муҳтарам  Эмомали      Раҳмоннинг  мамлакат Олий Мажлисига йўллаган навбатдаги Паёмида юртимиздаги илм-фаннинг кейинги тараққиёти давлат сиёсатининг устувор йўналишларидан бири ҳамда жамият ривожида муҳим ўринга эга эканлиги алоҳида таъкидланди. Шу билан бирга, Тожикистон Республикаси Президенти соҳадаги мавжуд камчиликлар,

жумладан, ихтиро ва янгиликларнинг камлиги,  илм соҳасига ажратилаётган маблағлардан самарали фойдаланмаслик, аниқ, табиатшунослик ва техник фанларнинг ривожи замон талабларига жавоб бермаётганлиги, маҳаллий ишлаб чиқаришда илмий натижалар ва инновацион технологиялар амалга татбиқ этилмаётганлиги, шунингдек, ёшларни илмий ишлар, хусусан, янгилик яратишга жалб этиш борасида ташвиш билдирдилар.

Илм соҳасига ажратилаётган бюджет маблағлардан оқилона фойдаланиш ва  республика илмий-тадқиқот муассасаларига тақсимлаш масаласини ҳал этишга боғлиқ ҳолда, Фанлар академиясига Тожикистон Республикаси Иқтисодий тараққиёт ва савдо вазирлиги ҳамда Тожикистон Республикаси Молия вазирлиги билан биргаликда  илм ва илмий-тадқиқот буюртма мавзулари соҳасини маблағлаштириш янги механизмига оид хулосасини Тожикистон Республикаси Ҳукуматига тавсия этиш топшириғи берилди. Айни пайтда Фанлар академияси бу мавзуларни жиддий ўрганиб, келажакда уларни мамлакат иқтисодиётининг муҳим йўналишларига йўналтиришни мақсад қилган.

Давлат бошлиғининг мамлакат олимлари олдига қўйган асосий вазифаларидан бири, бу илмий ютуқларни ишлаб чиқаришга татбиқ этиш масаласи эди. Илмий-тадқиқот ишлари натижаларини яхшилаш ва улардан маҳаллий ишлаб чиқаришни ривожлантиришда амалда фойдаланиш мақсадида Фанлар академияси тузилмасида Инновацион технологиялар тадқиқоти маркази ташкил этиш топшириғи берилди. Мазкур топшириқни амалга ошириш мақсадида айни пайтда Фанлар академиясида ишчи гуруҳи ташкил этилган бўлиб, у марказнинг вазифа ва мақсадлари ҳамда республика олимларининг илмий ютуқлари ва инновацион технологияларини ишлаб чиқаришда татбиқ этиш борасида тегишли вазирлигу идоралар билан ҳамкорликни йўлга қўйиш йўлларини аниқлаш масалаларини ўрганмоқда.  

Миллат пешвоси Паёмида ёш мутахассислар ва республика олий ўқув юртлари битирувчиларини аниқ, табиатшунослик ва техник фанларга кўпроқ жалб этиш ва улар ҳисобидан олимларни тайёрлаш ҳам муҳим масалалардан бири эканлиги таъкидланди. Фанлар академияси 2017 йил давомида ёшларни магистратура ва аспирантура, шунингдек, ўсмирларни Тожикистон Республикаси кичик Фанлар академиясига қабул қилиш орқали, уларни аниқ ва техника фанлари илмий-тадқиқот муассасаларига жалб этишга ҳаракат қилади. Академия ёшлар ва ўсмирларнинг илмий-техник тафаккурини юксалтириш, шунингдек, аниқ, техника ва технология фанлари соҳасида истеъдодли ёшларни аниқлаш мақсадида республика Маориф ва илм вазирлиги билан биргаликда ҳар йили ёш ихтирочилар танловини ўтказиш, бу йўл билан ёшларни янгилик яратишга жалб этишни ният қилган.

Фанлар академияси олимлари Миллат пешвоси муҳтарам Эмомали Раҳмоннинг мамлакат Олий Мажлисига йўллаган навбатдаги Паёмида белгилаб берилган топшириқ ва кўрсатмаларни ўз вақтида ижро этишга ҳаракат қилади. Улар қўлга киритган илмий натижалари ва инновацион технологияларини маҳаллий ишлаб чиқаришда самарали татбиқ этиб, шу йўл билан мамлакат иқтисодиёти ривожига ўз ҳиссаларини қўшиш ва Миллий бирликнинг 20 йиллигини янги илмий ютуқлар билан кутиб олишни ўз олдиларига мақсад қилиб олганлар.

Фарҳод  РАҲИМИЙ,

Тожикистон Республикаси Фанлар академияси президенти.