Биз билан боғланинг:

   

Бизга қӯшилинглар

ХАБАРЛАР

НАЗМ

Муаллиф: Super user Категория: НАЗМ
Чоп этилган 20 Феврал 2019 Кӯришлар: 349
Печат

 

s1200Аҳадқул Аҳмадқулов (Аҳад Аҳмад) Панжакент шаҳрида таваллуд топган. 1975 йили Хўжанд Давлат университетининг филология факултетини битирган. Кўп йиллардан бери ижод билан шуғулланади. Шеърлари ноҳия, вилоят ва республика газеталарида мунтазам чоп этиб келинмоқда.

НАВОИЙ

Машҳур туркий лисон шоирнинг бари

Даҳо қошингизда айлаган таъзим.

Шуаро аҳлин сиз - туғдор сарвари,

Шеърингиз - мунаввар пардаи назм.

 

Руҳият поклигин истар бўлса ким,

Буткул шеърларингиз қалбга этиб жо,

Ўтли шоҳбайтингиз шуурин ёрқин -

Этаркан, руҳида барқ ургай жило.

 

Тафаккур кўкида сиз мисли қуёш

Оламга ёғдусин беғараз сочган.

Сизсиз шоҳ ёнида юртга бўлиб бош,

Халқим, деб мурувват қучоғин очган.

 

Маънолар маҳзани - "Хамса" билан сиз

Шеърият тоқига тиккансиз ялов.

Шеърпараст қалбларда тенгсиз, монандсиз

Даҳри дун тургунча ёққансиз олов.

 

Тилимни камситиб пастлар эрта-кеч

Эл ичра ёйганда мағзи пуч ғоя,

Ўзингиз мардона, бўйин эгмай ҳеч

Улардан тилимни қилган ҳимоя.

 

Порлоқ бир юлдуздай нур тараб абад

Тургайсиз узукка ярашган кўздек.

Алпомиш келбатли чинордек тик қад,

Ўз халқин тимсоли донишманд Ўзбек.

 

ТУПРОҚ

Қўлимда бир ҳовуч муқаддас тупроқ

Заррасида мавжуд не бир синоат.

Руҳимда қўзғалур ҳазин, зил титроқ,

Шу буюк тупроққа қилурман тоат.

 

Бобом Рўдакийнинг ёниқ руҳлари                              

Шу қутлуғ тупроқда бўлур жилвагар.

Ёвқур Деваштичнинг шон-шукуҳлари

Сўнмагай, ўлмасдир мисли самандар.                                                    

 

Темур тулпорининг туёқларидан

Чарсиллаб чақнаган ёлқинлари бор.

Мусаввир Беҳзоднинг бўёқларидан

Тўкилиб битмаган талқинлари бор.

 

Навоий изининг мунаввар хоки

Шу тупроқ қатида турибди, қаранг.

Улуғбек - мунажжим, маърифат моҳи

Тупроққа қоришиб, олмиш ўзга ранг.

              

Ғанимлар хоки ҳам бор эрур бунда,

Унут бўлиб кетган ғаламислар бор.

Рўдакий кўзига мил тортган кунда

Жаҳон қора кийган, ўртанган минг бор.

 

Маънилар ганжисан, эй она-тупроқ,

Бағрингда аёну ноаён маъни.

Кўзимга суртгайман, о, сени кўпроқ,

Аждодлар хокининг дилбар Ватани.

 

Қўлимда бир ҳовуч муқаддас тупроқ,

Заррасида мавжуд не бир синоат.

Руҳимда қўзғалур ҳазин зил титроқ,

Шу буюк тупроқда қилганда тоат...

ҚУТЛОВ

Устоз Абдували Бердиалиевга

 

Ҳайратдан яралган ҳар бир кашфиёт:

Оламни лол қилган Миср эҳроми.

Таҳайюр бешиги мафтункор ҳаёт,

Ижодкор аҳлининг қайноқ илҳоми.

 

Ёшликдан қалбингиз эта олган ром

Кошғарий "Девонин" гавҳар ҳикмати.

Завқингиз жўштирар сеҳрлаб тамом

Мусаввир Беҳзоднинг ўлмас санъати.

 

Тилимни бетиним ўрганиб тун-кун,

Таниқли олимлар сафида борсиз.

Чекилган шу заҳмат эвази учун

Порлоқ саодатга ҳамиша ёрсиз.

 

Тилнинг талқинига юксак иқтидор

Бўлмаса, ўтмасди унга тишингиз.

Илм аҳли ичида топган эътибор

Юракдан қўл урган илмий ишингиз.

 

Саёҳат эттириб сўз мулкига гоҳ,

Сўзнинг чин маъносин сиз этганда шарҳ.

Киши кўз ўнгида жонланар ногоҳ,

Минглаб донишмандга доя бўлган Шарқ.

 

Энг яқин дўст янглиғ вафодор, ҳамдам

Сиздаги санъатга бўлган зўр ихлос.

Руҳан толиққанда олмоқ учун дам

Сувратлар чизгансиз соф юморга хос.

 

Тадқиқ этиб она тилимни ҳамон

Яширин сирларин айлаб ошкора.

Сиз элим руҳида барҳаёт, омон,

Бамисли аллома Маҳмуд Кошғарий.

 

Олимлик аслида игна билан чоҳ -

Қудуқ қазиш каби машаққатли иш.

Тирноқ билан тоғнинг бағрин этиб чок,

Уловлар учун ё хавфсиз йўл очиш.

 

Таваллуд тонгингиз муборак, устоз,

Юзу кўзингизда балқиб турсин нур.

Майли, ҳурмат атанг, майли, бир эъзоз,

Сиз менинг кўксимда шуълабахш ғурур.

 

Абуллайсдек улуғ устози аъзам,

Ҳеч завол кўрмасин қалб қуёшингиз.

Бир тилак айтарман айлаб минг таъзим:

Кошғарий ёшидан ошсин ёшингиз.

 

Тўртликлар

 

Қалблар каъбасига қилдим ибодат,

Руҳимга ёғилди ҳузурбахш ёғду.

Манглайим ёритиб шамси саодат

Бошимдан улуғ Зот раҳмати ёғди.

***

Унга бахт - ўлмоқлик ҳур қучоғида,

Сенга бахт - жон бермоқ дур қучоғида.

Муборак саодат - мен учун ўлмоқ

Ўлмас руҳ бергувчи нур қучоғида.

***

Ким тўкис бахтини менга кам деди,

Ҳар куни, ҳар соат, ҳар дам ғам еди.

Борига шукрона

             келтирган муслим

Муслимлар ичида

                   муҳтарам эди.

***

Бармоқлар чиқариб

                 бир ёқадан бош,

Зарбаси қаттиқ бир

                 муштга айланди.

Ғанимнинг кўзидан қалқиб чиқди ёш:

-Уни енгмоқ энди тушга айланди.

***

Бокира аёллар шаънига бир бор

Агарда тегизсанг беор тилингни,

Кўксингда кўтариб юрмоғинг бекор

Йўлингдан оздирган маккор дилингни.

***

"Сабр таги олтин" дейилмас, бежиз,

Таъмагирнинг нони ейилмас, бежиз.

Қув шайтон измига кирмасин, деб кўп,

Одамзотнинг умри минг йилмас, бежиз.

***

Ёмон ёмон билан улфат бўлсанг, дўст,

Бошга минг бало бу - кулфат, билсанг, дўст.

Ёмондан янада кўп ёмон - ёмон,

Яхшига ноҳақдан туҳмат қилсанг, дўст.

***

Жон юртим, мислингдек маъво топилмас,

Дардимга дардингдек даво топилмас.

Дардингда ҳар нафас чеколмасам дард,

Бир нафас олмоққа ҳаво топилмас.

***

Саломинг агар чин дилингдан келмас,

Нур сочиб эзгу сўз тилингдан келмас.

Аслинг-ку, тупроқдан - бўларсан тупроқ,

Шунда ҳам мушкин ҳид гилингдан келмас.

***

Ҳар сўзнинг изоҳи, шарҳи бор, билсанг,

Бинонинг лойиҳа, тарҳи бор, билсанг.

Сиртдан қараганда ўхшаш бўлса ҳам,

Одамнинг одамдан фарқи бор, билсанг.

***

Улуғлар мақбарин қилдим зиёрат,

Жисмимда мўъжиза юз берди шу тоб.

Қалбимда барқ урди шуъла, ҳарорат,

Худди бош қўйгандек кўксимга офтоб.

***

Жўмард бир отанинг фарзанди эдим,

Ҳалол меҳнати-ла ҳалол нон едим.

Бу ёлғон дунёда ҳамиша ростгўй,

Ва доим ҳақталаб бўлайин дедим.

 

Аҳадқул Аҳмадқулов,

Панжакент шаҳри.

КАЛЕНДАР

« Июн 2020 »
Дш Сш Чш Пш Жм Шб Яб
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          

МАҚОЛАЛАР

БУНЁДКОРЛИКДАН САЙЁҲЛИККАЧА МУҲИМ ЙЎНАЛИШ БЎЙЛАБ…

 

Жорий 2019 йил тўртинчи уч ойлигида турар эканмиз, йил мундарижасига бирров назар ташлаб, унинг ўта хайрли ва баракали ўтаётганига амин бўласан, киши.

Йил бошида Тинчлик ва миллий бирлик асосчиси – Миллат пешвоси муҳтарам Президентимиз Жаноби олийлари томонидан 2019-2021 йиллар «Қишлоқлар, сайёҳлик ва халқ ҳунармандчилигини ривожлантириш йиллари»,

Муфассал...

Безовта руҳ

 

Халқимизда:-Қиз чиқарганга қирқ йил тегма,- деган гап бор. Содиқ ака яқиндагина қизи Гулнорани узатди. Энди дўхтирга кўриниб, касалхонада ётиб, даволанишни ният қилганди. Зайнабнинг қўлини сўраб келишди. Тўй яхши нарса-ю, лекин ўз-ўзидан бўлмайди. Айниқса, қиз узатиш. Ҳалима опа ҳам: - Яхши жой, ёлғиз ўғил экан, бир бало қилиб, шу қизимизни ҳам чиқариб олайлик, - дея таъкидлагани-таъкидлаган. 

Муфассал...

СТАТИСТИКА

Сайтга кирганлар
1
Мақолалар
869
Мақолаларни кӯрганлар сони
734792

ӮҚУВЧИЛАР СОНИ

2986627
Бугун
Кеча
Шу ҳафта
Ӯтган ҳафта
Шу ой
Ӯтган ой
Ҳаммаси
2132
2212
8191
2960349
8191
115041
2986627

Сизнинг IPнгиз: 34.204.176.125
Бугун: 04-06-2020 19:36:47

ҲАМКОРЛАР

 

 

   

2015